२ युहान्ना 1 - याक्खा1 छुम्वाङ्गा एल्डारभाङ् निङ्वाफुमाङा सेगुना मामु नुङ् उच्याचि का ना छेप्फा छेप्मासिमेॽनेनिन्हा॥ का न्निङ्दा जेप्पा आलुङ्मा तुङ्मेॽनेनिन, का से मेन्ना ङ्खाॽनिङ्गो सात्या चिनाचोक्खुबा घाकङा लुङ्मा तुक्तिॽवाघा॥ 2 इजाङ्बाङ्निङ् सात्या चेॽया कानिङ्बे वान्ने, न्हाङ् साधाइ वान्नुङ्मेॽना॥ 3 निङ्वाफुमा पा नुङ् उका उच्या येसु खिरिस्टङा कानिङ् आनुगाराहा, किर्पा नुङ् हाङ्हाङ् पिॽनि॥ न्हाङ् खा घाक सात्याता नुङ् लुङ्मा तुक्तायिबे एङ्गा लेङ्नि॥ जेप्पा चेॽया नुङ् लुङ्मा तुक्तायि 4 न्ज्याचि माध्येबे इखिङ् च्हेन निङ्वाफुमा पाङा पियाहा आग्गे लोॽवा जेप्पाहा चेॽयाबे न्लाम्मासिमेहा चेॽया खेप्सुङ्होङ् का इब्बे-इब्बे चोन्दास्यामाङ्ना॥ 5 हाकु ओ आनुन्छा मामु, का ओछोङा आग्गे मेन्ना, ङ्खाॽनिङ्गो न्दानुङ् सुरुनाहाङ्तो वान्नेॽना आग्गेमाङ् छेप्मासिमेॽनेन्ना॥ न्ना इनाबाङ्निङ्, कानिङ् घाक एकोङा हेकोना लुङ्मा तुक्खुसा चाइभोङ् का न्दानुङ् आमुक फाक्त्वाङ्चिङ्हा॥ 6 लुङ्मा तुक्खुसा चामामाङ् निङ्वाफुमागा आग्गे लोॽवा लाम्मा ओम, न्हाङ् “न्निङ्दा घाक लुङ्मा लुक्खुसा चायानि” बाङ्ना आग्गेमाङ् न्निङ्दा सुरु न्नाहाङ्तो खेप्सुम्गाना आग्गे ओम॥ 7 इजाङ्बाङ्निङ् न्निङ्दा तोम्सिॽमेखुबा प्याक याॽमिचि ना कायुङ्लेनबे न्दायामा, न्हाङ् ङ्खाचिङा येसु खिरिस्ट सालुङ्बे तायाना ओमभोङ् सुइकार न्जोग्वानिन॥ खाॽलाहा याॽमिचिमाङ् लेम्चाखुबा नुङ् खिरिस्ट बिरोधि ओम्चि॥ 8 न्हाङामाङ् न्निङ्दा चोक्मासिइवाघा कामगा इनाम मेमाॽनिमागा लागि थाङ्थाङ् वायानि॥ न्निङ्दा इनाम माॽनिखुबा मेन्ना, ङ्खाॽनिङ्गो घाक इनाम तोक्खुबा लेक्सानि॥ 9 खिरिस्टङा चिन्दाहा चेॽया लोॽवा मेन्जोक्खुबा याॽमिनुङ् निङ्वाफुमा ङ्वामेन्ना॥ ङ्खाॽनिङ्गो उङा चिन्दाहा चेॽया लोॽवा चोक्खुबानुङ् पा नुङ् उच्या हिपापाङ् वामेचिहा॥ 10 ङ्खोङ्माङ् खा चेॽया हाक्निङ् हेकोहा चेॽया ताखुबा याॽमिचि न्निङ्दाबे न्दायाभोङ् पाङ्बे उमा म्बियानुम्चिम्निन, न्सेमेतानुम्चिम्निन चा॥ 11 इजाङ्बाङ्निङ् न्ना सेमेॽमामाङ् न्नागा इसिॽहा कामबे उङ्नुङ् लाचोक्मा ओम॥ 12 न्निङ्दा लुॽमाहा चेॽया गो प्याक वान्ने, ङ्खोङ्चा ङ्खा चेॽया छेप्माहोङ् मेन्ना ङ्खाॽनिङ्गो न्निङ्दानुङ् हानि तुम्माहोङ् लुॽमा मिन्नुङ्नेनिन्हा॥ ङ्खिङ्बेला जेप्पा कानिङ् इब्बे-इब्बे चोन्दिसिइवाहा॥ 13 निङ्वाफुमाङा सेगुना न्नुन्छा मामुगा उच्याचिङा चा न्दा सेवायो न्लुयामागाना॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.