२ कोरिन्थि 1 - याक्खा1 निङ्वाफुमागा उनिङ्वाङा खिरिस्ट येसुगा सेगुम्पाक लेङ्मागा सेगाङ्ना का पावाल, नुङ् आनुन्छा तिमोथिङा, कोरिन्थ साहारबेॽना निङ्वाफुमागा छुम्वाङ् नुङ् आखाइया लिङ्खामबेॽहा निङ्वाफुमागा घाक याॽमिचिगा लागि ना छेप्फा छेप्मासिमेङ्चिङ्हा॥ 2 एङ्गा निङ्वाफुमा पा नुङ् हाङ्बा येसु खिरिस्टङा न्निङ्दा आनुगाराहा नुङ् हाङ्हाङ् पिइगानि॥ 3 एङ्गा हाङ्बा येसु खिरिस्टका उप्पा, निङ्वाफुमागा जायजायकार लेङ्नि॥ उङ् कानिङ् लुङ्मा तुक्खुबा नुङ् घाक चेॽयाबे सान्त्वाना पिखुबा निङ्वाफुमा पा ओम॥ 4 निङ्वाफुमाभाङ् तोक्तुम्हा सान्त्वानाङा कानिङ् चा तुखिबे ङ्ङायाहा याॽमिचि सान्त्वाना पिॽमा यासुम्चिम्निभोङ् उङा कानिङ् एङ्गा घाक तुखिबे सान्त्वाना पिमेहा॥ 5 ङ्खाॽलामाङ् खिरिस्टका लागि कानिङ् इखिङ् प्याक तुखि आङ्द्वाम, निङ्वाफुमाङा कानिङ् खिरिस्टपाहाङ् ङ्खिङ्माङ् प्याक सान्त्वाना चा पिमेहा॥ 6 कानिङ् तुखि आङ्दुम्ङाभोङ्, ङ्खा न्निङ्गा सान्त्वाना नुङ् मुक्तिगा लागि ओम॥ कानिङ् सान्त्वाना तोक्तुम्ङाभोङ्चा ङ्खा न्निङ्गा सान्त्वानागा लागि ओम॥ कानिङ् आङ्दुम्ङाहा ङ्खा तुखि न्निङ्दा चा आत्ते मेन्जोक्ले आङ्दुम्गाभोङ् तुखि आङ्माहा नुङ् साहाचोक्माहा साक्ति तोक्त्वाम्घा॥ 7 न्हाङ् कानिङ् न्निङ्दाबे युक्सुम्ङाना आनिङ्गा आसा चात्तुनुङ् वान्नुङ्मेॽना॥ कानिङ् खा चेॽया था वान्ने, कानिङ् आङ्दुम्ङाहा लोॽवा तुखि न्निङ्दा चा आङ्द्वाम्गा न्हाङ् कानिङ् तोक्तुम्ङाहा लोॽवा सान्त्वाना न्निङ्दा चा तोक्त्वाम्घा॥ 8 आफुआनुन्छा आनाआनुन्छाचि, कानिङ् एसिया लिङ्खामबे आङ्दुम्ङाहा तुखिगा उतुम्बे न्निङ्दा चा था तोक्तुम्गानि बाङ्ना कानिङ् एतिॽवाङ्हा॥ न्नाबे कानिङ् खिङ् प्याक तुखि आङ्मा पोराचोगा, कानिङ् हिङिॽवाङ्हा बाङ्ना आस चा म्मायान॥ 9 कानिङ् गो “लु हाकु एङ्गा सिमाना बेला तायाना” लोॽवा एतिबिमिसिङ्॥ खा घाक चेॽया च्हेन कानिङ् आफाइबे मेन्ना ङ्खाॽनिङ्गो न्स्याहाचि हिङ्मेखुबा निङ्वाफुमाबे से भोरोसा युक्सुम्ङानिभोङ् लेक्सामासा॥ 10 उङा कानिङ् कालगा उयाभाङ् हिङ्मेता न्हाङ् हिङ्मेमेहा चा॥ उङ्बेॽमाङ् आनिङ्गा घाक भोरोसा युक्सुक्सुम्ङा, उङा फेरि चा कानिङ् हिङ्मेमेहा॥ 11 खा चेॽयागा लागि न्निङ्गा पार्थानागा चा खाचोना॥ खाॽला आनिङ्गा लागि चोक्ताब्याघा प्याक पार्थाना निङ्वाफुमाङा खेप्स्वाहोङ् कानिङ् आसिक पिमे न्हाङ् प्याक याॽमिचिङा नुनिङ्वागा भेटि निङ्वाफुमाबे न्दिस्वाहा॥ पावालङा उका योजाना बाद्ले चोगुना 12 कानिङ् कायुङ्लेनबेॽहा याॽमिचिगा सोयायिबे से मेन्ना, ङ्खाॽनिङ्गो न्निङ्गा ओन्दाङ् चा निङ्वाफुमागा उनिङ्वा लोॽवा चाल्चालानबे सोझो नुङ् इमान्दार वाइङ्हा चेॽया आनिङ्गा निङ्वाभाङ् आप्ठेरो मेएॽले कामा यासिॽवाङ्हा॥ खाॽलाना निङ्वा च्हेन कानिङ् निङ्वाफुमागा आनुगाराहाङा तोक्तुम्ङाना ओम, याॽमिगा बुद्दिङा मेन्ना॥ 13-14 इजाङ्बाङ्निङ् न्निङ्दा पोढाचोक्मा मेयामाहा, आमामेयामाहा चेॽया इहाचा कानिङ् न्छेम्मेॽनेनिन्हा॥ खिङ् सोम्मा न्निङ्दा आनिङ्गा उतुम्बे घाक चेॽया ङ्ङासुक्सुम्गान, ङ्खाॽनिङ्गो इलेन घाक आस्वाम्घा बाङ्ना आस वान्नेॽना॥ न्हाङ् एङ्गा हाङ्बा येसु तामाना लेनबे कानिङ् न्निङ्गा उतुम्बे घामान्डा चोगिॽवाङ्हा लोॽवा न्निङ्दा चा आनिङ्गा उतुम्बे घामान्डा चोगिॽवाघा॥ 15 कानिङ् एकोङा हेकोना उचुन चिनाचोक्खुसा चाइवाहा बाङ्ना चेॽयाबे का ढुक्काइ सायाङ्, ङ्खोङ्माङ् न्निङ्दा हिप्मा आसिक तोक्तुम्गानिभोङ् का ओन्दाङ् न्निङ्दा तुप्से तामा मितामासाङ्॥ 16 माकेडोनिया लिङ्खामबे खेमेङ्निङ्चा न्निङ्दानुङ् तुम्मेङ्होङ् खेमेङ् न्हाङ् लामेङ्निङ्चा न्निङ्दा तुम्मेॽनेनिन, न्हाङा का याहुदिया खेमेङ्निङ् न्निङ्दा फामेकाहाभोङ् मितामासाङ्॥ 17 खाॽला चोक्मा ङ्यासाङान्निङ् इना का उचुन मेमिॽले आका योजाना लेक्तुङ्ना मितिॽवाघायि? इना का कायुङ्लेनबेॽहा याॽमिचि लोॽवा एक्छिनङा “लेङ्मेॽना” एक्छिनङा “न्लेङ्मेन्ना” काखुबा लोॽवा एमेकाहा? 18 निङ्वाफुमा बिस्वास योग्याना लोॽवा आनिङ्गा चेॽया चा बिस्वास योग्याहा॥ कानिङ् चा “लेङ्मेहा” काइङ्हा चेॽया एक्छिनङा “न्लेङ्मेन्हा” कामा ङ्यासिॽवाङान्हा॥ 19 इजाङ्बाङ्निङ् निङ्वाफुमागा उच्या येसु खिरिस्टपे “लेङ्मेहा” नुङ् “न्लेङ्मेन्हा” बाङ्ना मान्ना॥ ङ्खाॽनिङ्गो सिलास, तिमोथि नुङ् का न्निङ्लुम्बे पार्चार चोगुम्ङाना निङ्वाफुमागा उच्या येसु खिरिस्टपे “लेङ्मेहा” बाङ्ना से वेॽना॥ 20 इजाङ्बाङ्निङ् निङ्वाफुमागा घाक बाचा च्हेन येसु खिरिस्टपे पुरा लेङ्मेहा॥ न्हाङामाङ् उङ्भाङ्माङ् निङ्वाफुमागा माहिमा लेङ्निभोङ् कानिङ् “आमेन” काइवा॥ 21 निङ्वाफुमाङामाङ् कानिङ् नुङ् न्निङ्दा खिरिस्टपे चात्तु चोगामा, न्हाङ् उङामाङ् कानिङ् कायामाहा॥ 22 उङा कानिङ् उकासिनभोङ् सोॽमेमागा पाबित्तारा आत्मागा छाप एङ्गा निङ्वाबे एन्दाब्यामाहा॥ खाॽला कानिङ् पाबित्तारा आत्मा तोक्तुक्सुम्होङ्माङ् उङा बाचा पियाहा घाक चेॽया कानिङ् तोक्त्वाम्हा॥ 23 आनिङ्वाबेॽहा घाक चेॽया निखुबा निङ्वाफुमा साचि युक्स्वाङ्होङ् का कामेङ्, न्निङ्दा आप्ठेरोबे ङ्ङाॽइगान्निभोङ्माङ् का कोरिन्थबे न्दायाङान्ना ओम॥ 24 कानिङ् न्निङ्गा हिङ्लुङ् नुङ् बिस्वास छोङ्बे चोक्तोक चोक्मा योगुम्ङाहा मेन्ना, इजाङ्बाङ्निङ् न्निङ्दा बिस्वासपे को चात्तुसिगान॥ कानिङ् न्निङ्गा उचुन्गा लागिमाङ् न्निङ्दानुङ् काम चोगिॽवाङ्हा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.