१ थेस्लोनिकि 1 - याक्खा1 निङ्वाफुमा पा नुङ् हाङ्बा येसु खिरिस्टपे बिस्वास चोक्खुबा थेस्लोनिकेबेॽहा बिस्वासिचि का पावाल, सिलास नुङ् तिमोथिङा ना छेप्फा छेप्मासिमेॽनेनिन्हा॥ निङ्वाफुमाङा न्निङ्दा आनुगाराहा नुङ् हाङ्हाङ् पिइगानि॥ थेस्लोनिकिचिगा बिस्वास 2 कानिङ् न्निङ्दा घाक्का लागि निङ्वाफुमा नुनिङ्वा पिवाम्ङा, न्हाङ् न्निङ्गा लागि साधाइ पार्थाना चोगिॽवाङ्हा॥ 3 एङ्गा निङ्वाफुमा पागा उयुम्बे एङ्गा हाङ्बा येसु खिरिस्टपे न्निङ्गा बिस्वासङा चोगुम्घा काम, लुङ्मा तुक्साङ् चोगिघा तुखि नुङ् एङ्गा हाङ्बा येसु खिरिस्ट तामाना आसाभाङ् तोक्माना धाइर्याता कानिङ् साधाइ मितुनेस्वाम्ङाहा॥ 4 निङ्वाफुमाङा उलुङ्मा तुक्तिघा आफुआनुन्छा आनाआनुन्छाचि, उङा न्निङ्दा उका याॽमि लेङ्मागा सेगिघा चेॽया कानिङ् था वान्ने, 5 इजाङ्बाङ्निङ् कानिङ् न्निङ्दा खेम्मेॽनेनिन्हा नुसाला ब्यार्थाहा चेॽया न्सायान, ङ्खाॽनिङ्गो पाबित्तारा आत्मा, साक्तिनुङ् खेम्मेॽनेनिन्हा साङ्का चोक्मायि मेयामाहा जेप्पाहा चेॽया साया॥ कानिङ् न्निङ्दानुङ् वाइङ्निङ् न्निङ्गा उचुन्गा लागि कानिङ् इमिन्हा याॽमि साइङ्हा, ङ्खा चेॽया न्निङ्दा था वान्ने॥ 6 न्निङ्दा कानिङ् नुङ् हाङ्बा लोॽवा चोगिमिगा॥ न्निङ्दा इमिन्हा तुखि आङ्दुम्गाहोङ्चा पाबित्तारा आत्माङा पिइघा नुसाला चोन्सिसाङ् गाराहान चोगुम्गा॥ 7 खाॽला न्निङ्दा माकेडोनिया लिङ्खामगा हेकोना ठोङ् नुङ् आखाइया लिङ्खामबेॽहा घाक बिस्वासिचिगा लागि नामुना लेक्सिमिगा॥ 8 इजाङ्बाङ्निङ् न्निङ्दाभाङ् निङ्वाफुमागा चेॽया माकेडोनिया नुङ् आखाइयाबे से ङ्हिसान, ङ्खाॽनिङ्गो न्निङ्दा निङ्वाफुमाबे चोगुम्गाना न्निङ्गा बिस्वासका चेॽया घाकपोटि हिसा॥ ङ्खोङ्माङ् खा चेॽयागा उतुम्बे कानिङ् इहाचा लुन्नुङ्मा पोरान्जोगानिन, 9 इजाङ्बाङ्निङ् कानिङ् न्निङ्दाबे ताइङ्निङ् कानिङ् इमिन स्वागात चोगाघा, न्हाङा इमिन मुर्तिचिगा सेवा चोक्मा लेप्तिम्गाहोङ् जेप्पागा नुङ् हिङ्गिलिक्ना निङ्वाफुमा पोटि लासिघा, खा चेॽया गो याॽमिचि उङ्चि आफाइङा ङ्गायामा॥ 10 उङ्चिङा ङ्गाया, न्निङ्दा वालोकपाहाङ् निङ्वाफुमागा उच्या तामेॽनाभोङ् लाम्बु सोनेसुक्सुम्गाना बु॥ उङ् निङ्वाफुमाङा स्यानाभाङ् हिङ्गिलिक लेङ्मेतुना येसु ओम॥ उङामाङ् कानिङ्बे ताहेक्साहा निङ्वाफुमागा दान्डाभाङ् हिङ्मेमेहा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.