१ पात्तुरुस 1 - याक्खा1 का येसु खिरिस्टका सेगुम्पाक पात्तुरुसङा, पोन्टास, गालातिया, कापाडोकिया, एसिया नुङ् बिथिनिया लिङ्खामबे खेइघोङ् ङ्खाबे हिसिनेसिघा निङ्वाफुमाङा सेगिघा उका याॽमिचि, का ना छेप्फा न्निङ्दा छेप्मासिमेॽनेनिन्हा॥ 2 निङ्वाफुमा पाङा ओन्दाङ्माङ् उका योजाना आन्सार न्निङ्दा उका याॽमि लेङ्मागा सेगिगा, न्हाङ् पाबित्तारा आत्माङा पाबित्तारा चोगिगा॥ ङ्खोङ्माङ् न्निङ्दा येसु खिरिस्टका आग्गे खेप्स्वाम्गा, न्हाङ् उका हेलिङा सुद्दा लेक्सिमिगा॥ निङ्वाफुमागा न्निङ्दा प्याक-प्याक आनुगाराहा नुङ् हाङ्हाङ् पिइगानि॥ हिङ्गिलिक्ना आसा 3 एङ्गा हाङ्बा येसु खिरिस्टका उप्पा निङ्वाफुमागा माहिमा लेङ्नि॥ उङा येसु खिरिस्ट स्यानाभाङ् हिङ्गिलिक लेङ्मेतुहोङ् उका माडा किर्पाङा कानिङ् ओछोङा वाम पिया, न्हाङामाङ् कानिङ् हिङ्गिलिक्ना आसा तोक्तुक्सुम॥ 4 न्हाङा निङ्वाफुमाङा न्निङ्गा लागि वालोकपे हेॽनिङ्चा नास मेलेङ्खुबा, मेङ्खोङ्दिखुबा नुङ् हेॽनिङ्चा मेमान्दिखुबा उत्ताराधिकार त्यार चोक्तुबिइमिघा॥ 5 न्निङ्गा बिस्वासङा गार्दा न्निङ्दा निङ्वाफुमागा साक्तिङा मुक्तिगा लागि जोगाचोगिॽवाघा॥ न्ना मुक्ति न्निङ्गा लागि त्यार चोगामा, न्हाङ् न्ना आखेरि सामायाबे पार्काट लेङ्मेॽना॥ 6 न्निङ्दा खा चेॽयाबेॽमाङ् चोन्दास्यानि, ङ्खाॽनिङ्गो खिङ्बेलाक च्हेन न्निङ्दा एहिलेन प्याक खाले तुखि आङ्मा पोराचोङ्मेहा॥ 7 खागा कारान च्हेन न्निङ्गा बिस्वास जेप्पाना बाङ्ना चेॽया सोॽमेमा ओम॥ साम्मेङ् मिङा खारेचोङ्मे ङ्खाॽनिङ्गो ङ्खा नास लेङ्खेमे॥ ङ्खा नास लेङ्खेखुबा साम्मेङ् हाक्निङ् न्निङ्गा बिस्वास प्याक ओमेन्गा ओम॥ ङ्खोङ्माङ् न्ना बिस्वास जेप्पा ओॽनिभोङ् जाच चोङ्मे, न्हाङा येसु खिरिस्ट तामाना लेनबे न्निङ्दा निङ्ला, माहिमा नुङ् आदार तोक्त्वाम्घा॥ 8 न्निङ्दा उङ् न्निसुक्सुम्गान्होङ्चा लुङ्मा तुक्त्वाम्गा॥ न्निङ्दा लोप उङ् न्निस्वाम्गान, ङ्खोङ्चा उङ् बिस्वास चोग्वाम्गा न्हाङ् कामायि मेयामाहा प्याक आनान्दाङा न्निङ्गा निङ्वा इप्तुक्सु॥ 9 इजाङ्बाङ्निङ् न्निङ्दा उङ्बे बिस्वास चोगुम्गानाङा न्निङ्दा न्निङ्गा आत्मागा मुक्ति तोक्त्वाम्गाना॥ 10 न्निङ्दा तोक्तुम्गाना ना मुक्तिगा उतुम्बे निङ्वाफुमाभाङ् चेक्खुबाचिङा उचुन ङ्योगु न्हाङ् न्ना मुक्तिगा पिनिक्लागा उतुम्बे ओन्दाङ्माङ् लुइमिसिगा॥ 11 ङ्खाचिङा खा इमिन नुङ् हेॽनिङ् लेङ्मेहाभोङ् था तोक्मागा ङ्योगु॥ उङ्चिबे वायाना खिरिस्टका आत्माङा ङ्खाचि ओन्दाङ्माङ् खिरिस्टङा आङ्माहा तुखि नुङ् उका हेक्साङ्ना माहिमागा उतुम्बे योक्मेतुक्साचि॥ 12 निङ्वाफुमाङा खा चेॽया च्हेन उङ्चिगा फाइदागा लागि मेन्ना, ङ्खाॽनिङ्गो न्निङ्गा लागि ओमभोङ् सोॽमेतुक्साचि॥ न्हाङ् खा चेॽया वालोकपाहाङ् पाक्साना पाबित्तारा आत्माभाङ् न्निङ्दा खेप्सुम्घा नुसाला खेम्मेखुबाचिभाङ् लोप न्निङ्दा खेप्सुक्सुम्गा॥ वालोक्दुतचिङा चा खा चेॽया तुक्नुङ् सोॽमा म्मितुक्सुहा॥ पाबित्तारा लेङ्माहा चेॽयागा उतुम्बे 13 न्हाङामाङ् काम चोक्मागा न्निङ् निङ्वा त्यार चोगानुम॥ थाङ्थाङ् वायानि न्हाङ् हाङ्बा येसु तामेॽनिङ् तोक्माना मुक्तिगा पिनिक्लाबेॽमाङ् भोरोसा युक्सानुम॥ 14 न्निङ्दा निङ्वाफुमागा आग्गे येन्खुबा पिछाचि लेक्सिघाङा ओन्दाङ् इहाचा था मेन्दोक्लेनिङा चोगुम्घा लोॽवा इसिॽहा काम हाकु न्जोगानुम्निन॥ 15 ङ्खाॽनिङ्गो न्निङ्दा काखुबा निङ्वाफुमा इमिन पाबित्ताराना, न्निङ्दा चा ङ्खाॽलामाङ् घाक चेॽयाबे पाबित्तारा लेक्सानि॥ 16 इजाङ्बाङ्निङ् धार्मासाप्लाबे खाॽला छेप्तामा, “पाबित्तारा लेक्सानि इजाङ्बाङ्निङ् का पाबित्ताराङाना॥” 17 न्निङ्दा निङ्वाफुमानुङ् पार्थाना चोगिॽवागानिङ् उङ् आप्पा लुसाङ् कावाम्गा॥ उङा इसा चा तो-मो मेन्सोॽले उङ्चिगा काम आन्सार निरिक चोग्वाहा, ङ्खोङ्माङ् न्निङ्दा कायुङ्लेनबे वाइगानुङ् सोम्मा उङ् आदार चोक्साङ् हिङानि॥ 18 न्निङ्दा था वान्ने, न्निङ्दा न्निङ् पा-पुम्चिभाङ् लेक्सुक्साहा बित्थाहा चेॽयाभाङ् नास लेङ्खेखुबा साम्मेङ् युप्पाङा ओमेन हुङुहोङ् फोक्सिघा मेन्ना, 19 ङ्खाॽनिङ्गो पाप नुङ् इहाचा खोट् मेॽनिङ्हा थुमागा लोॽवाहा खिरिस्टका इम्मायि मेयामाहा हेलिङा न्निङ्दा फोक्सिघा ओम॥ 20 निङ्वाफुमाङा उङ् कायुङ्लेन चोक्मा हाक्निङ् ओन्दाङ्माङ् सेगुक्सा, ङ्खाॽनिङ्गो न्निङ्गा लागि हेक्साङ्हा लेनचिबे पार्काट लेक्सा॥ 21 उङ्भाङ्माङ् न्निङ्दा निङ्वाफुमाबे बिस्वास चोगुम्गा॥ निङ्वाफुमाङा खिरिस्ट स्यानाभाङ् हिङ्गिलिक लेङ्मेतु न्हाङ् न्निङ्गा बिस्वास नुङ् आसा निङ्वाफुमाबे वानिभोङ् उङ् माहिमा पि॥ 22 हाकु न्निङ्दा जेप्पाहा चेॽया येनुम्गाहोङ् न्निङ् निङ्वा सुद्दा चोगुक्सुम्चिम्गा, ङ्खोङ्माङ् फुनुन्छा नानुन्छाचि जेप्पा लुङ्मा तुक्तानुम्चिम॥ न्हाङ् न्निङ्दा निङ्वाभाङ् एकोङा हेकोना लुङ्मा तुक्खुसा चायानि॥ 23 निङ्वाफुमागा हिङ्गिलिक्हा नुङ् साधाइ वान्नुङ्खुबा चेॽयाभाङ् न्निङ्गा ओछोङा वाम लेक्सामा॥ न्निङ्दा नास लेङ्खुबा पागा सान्तान म्मेतिसिगान्हा, ङ्खाॽनिङ्गो नास मेलेङ्खुबा पागा सान्तानसिगान॥ 24 धार्मासाप्लाबे खाॽला छेप्तामा, “घाक याॽमि याक्साङ् लोॽवाहाचि, न्हाङ् ङ्खाचिगा गाउराब चा फुङ् लोॽवाहा॥ घास चोम्दिमे, न्हाङ् फुङ् आङ्खेमे, 25 ङ्खाॽनिङ्गो हाङ्बागा चेॽया साधाइ वान्नुङ्मेहा॥” हाङ्बागा खा चेॽयामाङ् न्निङ्दा खेम्मेॽनेनिन्हा नुसाला ओम॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.