१ कोरिन्थि 1 - याक्खा1 ना छेप्फा निङ्वाफुमागा उनिङ्वाभाङ् येसु खिरिस्टका सेगुम्पाक लेङ्मागा सेगाङ्ना का पावाल नुङ् नुन्छा सोस्थेनेस पाहाङ्, 2 येसु खिरिस्टपे पाबित्तारा चोगाना कोरिन्थबेॽना निङ्वाफुमागा छुम्वाङ्, न्हाङ् घाक ठोङ्भाङ् खिरिस्टका याॽमि लेङ्मागा ङ्गायाहाचि घाक्का लागि छेप्मासिमेङ्ना॥ उङ्चि हाङ्बा येसु खिरिस्टनुङ् पार्थाना न्जोङ्मे, उङ्माङ् ङ्खाचि नुङ् कानिङ् घाक्का हाङ्बा ओम॥ 3 एङ्गा निङ्वाफुमा पा नुङ् एङ्गा हाङ्बा येसु खिरिस्टङा आनुगाराहा नुङ् हाङ्हाङ् पिइगानि॥ पावालङा निङ्वाफुमा नुनिङ्वा पिना 4 का न्निङ्गा लागि निङ्वाफुमा साधाइ नुनिङ्वा पिवाङ् इजाङ्बाङ्निङ् खिरिस्ट येसुबे न्निङ्दा निङ्वाफुमाभाङ् आनुगाराहा तोक्तुक्सुम्गा॥ 5 उङा न्निङ्गा छुम्वाङ्बे निङ्वाफुमाङा घाक खाले आसिक पिइमिगा॥ ङ्खोङ्माङ् न्निङ्दानुङ् घाक खाले चेक्माहा साक्ति नुङ् घाक चेॽया आमायामाहा ग्यान वान्नेहा॥ 6 हाकु कानिङ् खिरिस्टका उतुम्बे घाक चेॽया योक्मेनेनिन, न्हाङ् ङ्खा चेॽया जेप्पा ओम बाङ्ना चेॽयाबे न्निङ्दा निस्चित लेक्सिमिगा॥ 7 ङ्खोङ्माङ् एङ्गा हाङ्बा येसु खिरिस्ट तामाना लाम्बु सोनेस्वाम्गानिङ् न्निङ्दा हेखाचा आत्मिक पिनिक्लागा खाचो ङ्ङाइवागान्हा॥ 8 एङ्गा हाङ्बा येसु तामाना लेनबे न्निङ्दा इहाचा आप्दिक मेॽनिङ्हा लेक्सिगानिभोङ् उङा आखेरि सोम्मा न्निङ्दा बिस्वासपे चात्तु चोगिनेसिॽवाघा॥ 9 निङ्वाफुमा बिस्वास योग्याना॥ उङामाङ् उका उच्या एङ्गा हाङ्बा येसु खिरिस्टनुङ् साङ्गाति चोक्से न्निङ्दा काइमिघा॥ 10 आफुआनुन्छा आनाआनुन्छाचि, हाङ्बा येसु खिरिस्टका उनिङ्बे का आमुक फाक्साङ् लुमेॽनेनिन, न्निङ्दा घाक तोङिघोङ् वायानि, न्निङ्दाबे फोङ्माहा चेॽया न्लेङ्निन्नि॥ ङ्खाॽनिङ्गो एको निङ्वागा लेक्सिघोङ् एको चेॽयाबे निङ्वा पिखुबा लेक्सानि॥ 11 इजाङ्बाङ्निङ् आफुआनुन्छा आनाआनुन्छाचि, न्निङ्दाबे खिमा-तुमाहा चेॽया लेङ्मासिमेहाभोङ् क्लोएगा पाङ्बेॽहाचिङा का लुयामाहा॥ 12 का कामा योगाङ्ना चेॽया खा ओम, न्निङ्दा कोइङा “का पावालगा” कोइङा “का आपोल्लोसका” कोइङा “का पात्तुरुसका” न्हाङ् कोइङा च्हेन “का खिरिस्टका याॽमिङान” काइवाघाबु॥ 13 इना खिरिस्ट हाप्सामानायि? इना न्निङ्गा लागि पावाल कुरुसपे बोलि लेक्सानायि? इना न्निङ्दा पावालगा उनिङ्बे बाप्तिस्मा लेक्सिघायि? 14 निङ्वाफुमा नुनिङ्वा पिवाङ्, किरिस्पास नुङ् गायास बाहेक इसा चा का बाप्तिस्मा म्बिक्सुन्चिङान्हा॥ 15 न्हाङामाङ् न्निङ्दा इसाङा चा आका आनिङ्बे बाप्तिस्मा लेक्सिङ्हा ओमभोङ् कामा न्दोक्त्वाम्गान्ना॥ 16 (ओम्बा, खा चेॽया जेप्पा ओम, का स्तिफानासका पाङ्बेॽहाचि बाप्तिस्मा पिङ्चिङ्हा॥ ङ्खाचि हाक्निङ् हेकोहाचि का बाप्तिस्मा पिङ्चिङ्हायेम म्बिन्चिङान्हायेम का था मान्ना॥) 17 इजाङ्बाङ्निङ् खिरिस्टङा का बाप्तिस्मा पिसे मेन्ना, ङ्खाॽनिङ्गो नुसाला खेम्मेसे पाक्साङ्ना ओम॥ का पार्चार चोगुङ्निङ् याॽमिचिबे वान्नेहा बुद्दिङा पार्चार न्जोगुङान, मानुङ्गो खिरिस्टका कुरुसपेॽना बोलिदान ब्यार्था लेक्साबि॥ निङ्वाफुमागा बुद्दि 18 खिरिस्ट कुरुसपे बोलि लेक्साना नुसाला गो नास लेङ्खुबाचिगा लागि मुर्खा चेॽया ओम, ङ्खाॽनिङ्गो मुक्ति तोक्मासिइवाहा एङ्गा लागि च्हेन निङ्वाफुमागा साक्ति ओम॥ 19 धार्मासाप्लाबे निङ्वाफुमाङा खाॽलामाङ् कायामा, “बुद्दिमानिचिगा बुद्दि नास चोग्वाङ्, न्हाङ् चोम्बुहाचिगा चोम्बुना निङ्वा इनाचा मेन्नाभोङ् सोॽमेत्वाङ्चिङ्हा॥” 20 हेखायि बुद्दिमानि याॽमिचि हेॽने ङ्वेॽहा? ब्यावास्था चिन्खुबाचि हेॽने ङ्वेॽहा? ना युगका चेॽया तुमेखुबाचि हेॽने ङ्वेॽहा? इना निङ्वाफुमाङा याॽमिबे वेॽहा बुद्दि काम लामेन्जोक्खुबा न्लेङ्मेतुन्हायि? 21 कायुङ्लेनबेॽहा याॽमिचिङा उङ्चि बुद्दिङा निङ्वाफुमा चिनातोक्मा ङ्यास्वानिन्ना बाङ्ना चेॽया उका बुद्दिमानि योजाना आन्सार ठारेचोगु॥ ङ्खाॽलाहोङ्माङ् निङ्वाफुमाङा गो कानिङ् पार्चार चोगुम्ङाहा मुर्खा चेॽयाभाङ्माङ् बिस्वास चोक्खुबाचि हिङ्मेॽमा मितुचि॥ 22 याहुदि याॽमिचिङा पार्मानगा लागि वालोकपाहाङ् चिङ्गो सोॽमा ङ्योग्वा न्हाङ् गिरिक जातिगा याॽमिचिङा च्हेन बुद्दिगा चेॽया खेम्मा ङ्योग्वा॥ 23 ङ्खाॽनिङ्गो कानिङ् च्हेन कुरुसपे छुयाना येसुगा नुसाला पार्चार चोग्वाम्ङाहा॥ खा सालेन याहुदिचिगा लागि लुङ्सिॽमाहा चेॽया लेक्सा, न्हाङ् हेकोहा जातिचिगा लागि मुर्खा चेॽया ठारेचोगा॥ 24 ङ्खाॽनिङ्गो निङ्वाफुमाङा काचिहा याहुदिहोङ्चा, गिरिक जातिगा याॽमि होङ्चा, खिरिस्टभाङ्माङ् ङ्खाचिङा निङ्वाफुमागा साक्ति नुङ् बुद्दि न्निसुक्सुहा॥ 25 इजाङ्बाङ्निङ् निङ्वाफुमागा मुर्खा चेॽया याॽमिचिगा बुद्दि हाक्निङ् प्याक बुद्दिमानिहा, न्हाङ् निङ्वाफुमागा माङ्चुमाङ्हा चेॽया चा याॽमिचिगा साक्ति हाक्निङ् साक्तिसालिहा॥ 26 आफुआनुन्छा आनाआनुन्छाचि, निङ्वाफुमाङा काइगानिङ् न्निङ्दा इमिन्हा साइघा? ङ्खा मितानुम॥ कायुङ्लेनगा सोयायिबे न्निङ्दा माध्येबे मिॽयाङ्से बुद्दिमानि, मिॽयाङ्से साक्तिसालि न्हाङ् मिॽयाङ्से थुङ्दुहा साइगा॥ 27 ङ्खाॽनिङ्गो बुद्दिमानि याॽमिचि ङोन्सिॽमाबे आमेॽमागा निङ्वाफुमाङा कायुङ्लेनगा सोयायिबे मुर्खा ठारेन्जोगाहाचि सेगुचि, न्हाङ् साक्तिसालिचि ङोन्सिॽमाबे आमेॽमागा कायुङ्लेनगा सोयायिबे साक्ति मेॽनिङ्हाचि सेगुचि॥ 28 निङ्वाफुमाङा काङान काखुबाचि ङोन्सिॽमाबे आमेॽमागा कायुङ्लेनगा सोयायिबे काम लामेन्जोक्खुबाचि नुङ् इसिॽहा ठारेन्जोगाहाचि सेगुचि॥ 29 निङ्वाफुमागा उयुम्बे इसा चा घामान्डा न्जोक्निन्निभोङ् उङा खा चोगु॥ 30 न्निङ्दा खिरिस्ट येसुबे वेतिगा, निङ्वाफुमाङा खिरिस्ट येसु एङ्गा बुद्दिगा मुल चोगुक्सु॥ खिरिस्टभाङ्माङ् कानिङ् निङ्वाफुमागा ओन्दाङ् ठिक ठारेचोगिॽवा, न्हाङ् निङ्वाफुमागा पाबित्तारा नुङ् मुक्ति तोक्खुबा याॽमि लेक्सिॽवाहा॥ 31 न्हाङामाङ् खाॽला छेप्तामा, “घामान्डा चोक्खुबा हाङ्बाङा चोगुहा कामबेॽमाङ् घामान्डा चोक्नि॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.