Tito 1 - Ja yab'al ja Dyosi

Spatulab'il k'ujolal

^1-4 Moj aljel Tito: Ke'n jkoltaya b'a oj ja k'u'uk ja Kajwaltik Jesusi, ja'yuj ja we'n jach' wax kilawa jastal jun kuntikil. Ja we'n sok ja ke'n ja'ni sniwanil jk'ujoltik ja Dyosi; Ja'yuj wax k'ana yi ja ye'n yuj ja ye'n Tatal kujtiki, sok ja Kajwaltik Jesús yuj a ye'n jkoltanumtiki, a ya'wi spetsanil ja syajal sk'ujoli, sok a ya' laman wa k'ujoli. Yuj ja wanixa na'a ja ke'n jun ya'tijumon ja Dyosi, sok sjekab'anumon ja Kajwaltik Jesusi. Ye'n sjekawon, b'a jach' oj k'u'ajuk lek yuj ja ma' stsa'unej ja Dyosi, sok jach' oj sna'e yujni meran ja jas wax je'xi ja b'a jas wax na'atiki. B'a jach' oj sna'e ojni sta'e ja sak'anile b'a mini oj ch'akuki, yujni man najate jach' yalunej ja Dyos ja jkoltanumtika. Sok wanix na'atik leka, ja Dyosi, mini oj sle' ab'ala. Ye'n yal'a jas k'ak'u oj waj kal ek' yab', ja tuk jumasa ja yab'ali.

Ja jas oj sk'u'luk ja Tito b'a Creta

⁵ Yuj ja ka'wakan b'a xe'n takin lu'um b'a yoj niwan paman ja' b'a Creta, ja sb'a oj ja tojb'es ja ab'al k'umal jumasa it ti kechan ayi, sok b'a oj ja t'oj ja ma'tik oj och ya'tel b'a snajtsil ja tsomjel jumasa b'a jujune chonab'i. Jach'ni jastal ch'ak kal a wab'i.

⁶ Jun ma' ay ya'tel b'a snajtsil tsomjel sb'ej mini jun smul oj ta'juk yi'a. Jel t'ilan kechan jun ixuk oj ajyuk sok, jaxa yuntikili, t'ilan oj sk'u'uke ja Kajwaltik Jesusi, a' ajyuke toj sok a sk'u'uke ab'al.

⁷ Ja Dyosi, ya'a b'a sk'ab'e ja ma'tik ay ya'tel b'a snajtsil tsomjel a sk'el'e ja ya'tel ja tuk jumasa, b'a jach' oj b'ob' lek spetsanil. Ja'yuj mi sb'ejuk kechan oj ja wal'ex, cho mi sb'ejuk jel wego oj tajkanik, mini sb'ejuk oj yakb'anik mok a le'ex tiro'anel, mok ma' a lo'layex yajni waxa chono wa jas ab'ajexi.

⁸ Ja'yuj sb'ej kada k'ak'u lek ja jas oj ja k'u'lukexi, gusto i'ajik b'a wa najex ja ma wax yulatayexi. B'ajtan oja pensarukex ja mitoxa k'u'lanexi, toj ajyanik, b'a spetsanil je'awik tsamal ja wa modo'exi.

⁹ Mok a k'u'ukex tuk ab'al ke mi ja'uk ja yab'al ja Dyos jastal it wa'nex sk'u'ajeli, sok mi oj b'ob' a je'ex ta yuj k'a mi ja'uk ja yab'al ja Dyosi. Jach' oj b'ob' a wal'ex yab' ke mok axwuke ja tuk jumasa b'a oj sk'u'uke ja yab'al ja Dyosi, sok oj ja mon'ex ja ma' mi sk'u'ane'i.

¹⁰ Jasyuj ja tiwi, jel ja ma wa'n b'ejyel ek' mi wa sk'u'ane ja yab'al ja Dyosi, mas lek wax yilawe slo'lajel ja kristyano sok ja jas wa sje'awe b'a mey sb'eji. Ja iti jach' wax ek' yuj ja ay chab' oxe ja we'nlex mi sk'ana oj ya'kan sk'u'lajel ja jastal wax yi'aj senya ja b'a wa k'unilexi.

¹¹ Mok a wa' sje'e jachuk, jasyuj wa sjomowe yi s'olom jitsan kristyano, jach' wa sk'u'lane yuj ja kechan wa sk'ana oj ya'we el lom tak'ini.

¹² Jun aluman Dyos b'a Creta ja ma' jach' yala jastal iti: —Ja jaw jumasa swinkil Creta jel sle'awe ab'al, jel xw'ay'e, mi ja sk'ana oj sk'uluke. Lajane sok ja chante b'a k'uli—.

¹³ —Ja iti Yuj smeranil—. Ja'yuj jel t'ilan oj a kom'e ja yintil ja jaw jumasa, cho koltaye b'a oj sk'u'uke otro bwelta ja Kajwaltik Jesús ja jastal ni ja sb'eji.

¹⁴ Koltaye b'a mok smaklaye ja ab'al jumasa, wax ya'awe ja tantik kristyano ma' ja' schol ja le'uj ab'ali, cho mini ja lo'il jumasa, b'a ye'n stojb'esnej ja judio jumasa.

¹⁵ Ja ma' toj lek wa sk'u'ane ja Kajwaltik Jesusi, wa sk'u'ane spetsanil lek. Jaxa ma mi wa sk'u'ane'i, sok ja ma' mey sniwanil sk'ujol soki, wax yalawe ke mini jas leka; kechan ja wajel sk'ujole ja b'a mi lekuki sok mini t'un malo'uk wax yabye'a.

¹⁶ Wax yalawe ke wa sna'awe sb'aj ja Dyosi, jaxa yajni wax kilatikon ja jas mi lek wa'ne sk'u'lajeli, ti wax na'atikon ke mi meranuk ja wa sna'awe sb'aj ja Dyosi. Korajaxta ay'e mi ja sk'u'ane, mini t'un sna'awe jastal oj sk'u'luke ja b'a leki.