Sofonias 1 - Ja yab'al ja Dyosi

¹ Ja ke'n Sofoniason, ja jtat ja Cusi. Ja jtati, ja yintil ja Guedaliasi, ja Amarias sok ja Ezequiasi. Ja Dyosi, ja yala kab, ja lo'il it ja k'ak'u ye'n mandaranum b'a Juda ja Josias yunin ja Amoni.

Ja Dyosi, oj sch'ak el ja swinkil ja chonab' Juda

^2-3 Ja Dyos kujtiki, jach' wax yala jastal iti: —Oj ch'ak sna'jel spetsanil ja jas ay b'a lu'umi. Oj ch'ak sna'jel spetsanil ja kristyano jumasa, sok jach'ni ja chante jumasa, ja jupjup chan jumasa sok ja chay jumasa. —Mi oj ka eluke k'ot slekil ja ma' mi sb'ejuk ja jastal ayi— Ke'n Dyos yuj ja israelenio, ja jas wax kala yujni jach' oj k'u'l merana.

⁴ —Oj ka stup ja smul ja swinkil ja chonab' Juda; oj ch'ak ka eluk ja k'u'lub'al dyos jumasa b'a Jerusaleni; oj ch'ak ka eluk ja spagre'e jumasa,

⁵ ja ma'tik wax k'e stoy'e ja k'anal jumasa b'a s'olom ja snaje'i, sok ja ma'tik wa stoyowon ja ke'n, wax cho stoyowe ja dyos Milcomi.

⁶ Lajan oj sch'ak'e sna'jele sok ja ma'tik ch'akta spil sb'aj jmoki sok ja ma'tik mi sle'awe ja ab'al jumasa wax ka'a.

⁷ —Ch'ab'ananik. —Wan xa mojxel ja sk'ak'u'il ja wokoli. —Spetsanil nakaxa chapan. —Ja lok jumasa nakaxa tey ili. —Oj ch'ak sna'jel ja kuntikili.

⁸ —Ja k'ak'u jawi oj ka stup ja smul ja yuntikil jumasa ja mandaranumi, ja ma'tik jel niwak ja ya'tele'i sok ja ma'tik wa snochowe ja ma' mini jun sb'ej ja jastal ayi ja ma'tik mi sk'u'anon ja ke'ni.

⁹ Ja k'ak'u jawi oj ni cho ka stup'e ja ma'tik wa stoyo tuktukil dyos jumasa sok ja ma' wa sb'ut'uwe ja snajtsil tsomjel sok ja sdyose jumasa jawi sok ja jastik jumasa sta'uneje jan sok lo'lanel ma' b'a yajb'esneli.

¹⁰ —Ja k'ak'u jawi, oj awanuke b'a oj sk'an skoltajele man b'a wax ochye ja chay jumasa; oj maklaxuk jun tsatsal awanel man b'a schab'il chonab' cho jach'ni, ja man b'a loman yaman jumasa.

¹¹ —Cho awananik ja we'nlex, ma'tik mojan ayex sok ja barrio Mortero. —Ja k'ak'u jawi, oj ch'ak chamuk ja b'olmalanum jumasa sok ja ma'tik wa spojowe tak'ini.

¹² —Yaj nix k'ot ja k'ak'u jawi, oj ki jun joko b'a oj le' b'a chonab' Jerusalen ja ma'tik laman aye'i; yaj nix ta'awe'i, oj ka stup ja smule'i. Ja oj slaj e' ja ya'lel ts'usub' b'a it wax kan nolani, man wantox b'ob' yal'e': —Ja Dyos mi jas lek wa sk'u'lan, cho mini jas b'a mi sb'ejuk wa sk'u'lana.

¹³ Ja na'its jumasa sk'u'lane'i, mi ye'n ti oj ajyuke b'a na'its jawi; ya'teltaye ja ts'usub' jumasa, kechan mi ye'n oj yu'e' ja ya'leli; —ja jastik sb'aje'i, oj ch'ak japjuk yi'e, jaxa snaje jumasa oj ch'ak jom spetsanil.

¹⁴ —Jel xa mojan ay ja k'ak'u mi kwalkyera'uk b'a oj jak a'ji jtuptik ja jmultiki. —Wa'nxta mojuk jani. —Ja k'ak'u jawi, mixa oj ab'xuk sb'ej ja awanel jumasa asta ja ma'tik jel tsatsi oj ok'uke.

¹⁵ Jun niwan sk'ak'u'il b'a oj ya' el ja skoraja ja Dyosi, jun sk'ak'u'il cham k'ujol sok wokol, jun sk'ak'u'il b'a oj ch'ak sna'jel spetsanil, jun k'ak'u oj k'ik'b'uk el yuj ja asoni, jun k'ak'u k'ik'inal oj waj.

¹⁶ B'a yoj awanel sok b'a yok'el ja korneta, ja k'ak'u jawi, ti oj aljuk k'ot ja k'ak'u oj ch'ak jomuk ja ts'akab' ton smakb'al ja chonab' jumasa cho jach'ni ja altar jumasa sok ja chanil ts'akab' ton jumasa.

¹⁷ —Spetsanile sle'ani smule jmoka. Ja'yuj oj ni ka'a yi'e lek ja wokola sok jach' oj b'ejyuke jastal ma'tik mix ilwani. Ja schik'ele'i jach' oj lechechuk jastal ja sts'ub'il ja lu'umi, ja sb'ak'tele'i, jach' waj jastal k'oy chante.

¹⁸ Ja k'ak'u oj tajkukon ja ke'n, oj lap sk'aj k'al ja lu'umi. Mi jas oj b'ob' kolta juke yuj; —Mini ja oro sok mini ja sakal tak'in yi'oje'i. —Juts'in altiro oj ch'ak sna'jel spetsanil ja ma' tey b'a lu'um iti.