Proverbios 1 - Ja yab'al ja Dyosi

Ja st'ilanil ja ju'un iti

¹ Ja' senya lo'il jumasa it sb'a Salomon yunin ja David mandaranum yuj ja israelenio.

^2-4 Ja st'ilanil yuj ja senya lo'il jumasa iti b'aj ja we'nlex untik jumasa, jelto ja jas oj ja na'exi, tojb'es ja jastalexi abyik sb'ej ja lo'il jumasa b'a lek wax alji cho neb'awik lek. Cho makunanik b'a sje'jel yi ja ma'tik mi ja sna'awe'i, b'a jach' oj sna' jastal oj stalna sb'aje, jun k'ujol sok toj oj ajyuke b'a spetsanil; a sje' b'aj yujni ay ja swa sna'awe'a; sok a sna'e lek ja jas oj sk'u'luke'i.

⁵ Ja we'nlex, ma'tik jel waxa na'awexi, maklayik lek ja jas oj kala wabyexi. B'a jach' ojto cho a neb'ex lek sok ayni jas ojto a na'ex.

⁶ B'a jach' oj b'ob' a na'ex ja sb'ej jun senya lo'ili sok ja sb'ej ja wax a'xi slaji, sok ja sb'ej ja oj ja k'inta.

⁷ Spetsanil ja ma' wa sk'ana jel oj sna'i jel t'ilan oj k'e sk'u'uk b'ajtan ja Dyosi. Jaxa ma' mini t'un jas wa sna'awe'i mi sk'ana oj tojxuk jastale'i sok mini jas jel sneb'awe'a.

Ja jas mi lek wax yala wab' ja ma mi lek wax yilawa

⁸ Kala kerem makla ja jas oj yal wa tat ja yajni ay jas oj yal awab'i, cho je'a ja jastal waxa kisa ja wa nan ja yajni ay ja swa sje' awi'i.

⁹ Ja jastik oj sje' awi'i, oj sb'on lek jastal jun korona b'a wa olomi, jach' jastal jun a ujal b'a wa nuk'i.

¹⁰ Kala kerem, ja ma'tik mi lekuki wan k'ax yal awab'i oj ja k'uluk ja b'a mi lekuki mok a laj ja jastal ja ye'nle'i, mok a wa'a b'aj yi'e.

^11-12 B'ob'ta oj yal'e a wab'i: —La' jmoktikon, la jnol k'ab'uktik ja ma' oj ek' b'ajtani la japtik yi spetsanil ja jas oj yi' jani. Ta ti chama, tix chama, a ch'akjuk yuj ja yal ja' jumasa. —La jmiltik, wax ya'a jun tsamaliltik ja milwaneli—

¹³ Sok ja jas oj kelk'antik yi'i oj b'ut'tik ja jnajtik jumasa sok jel oj jitsan oj ajyuk ja jastik b'ajtiki.

¹⁴ —Ochan jmoktikon, lajan oj k'ep jb'ajtik spetsanil ja jas oj ta'tiki—

¹⁵ —Jaxa we'n kala kerem mok a k'u'luk— —Mok a noch ja jastal jel tuk— —Mok a wa' a b'aj yi'e lo'lajel—

¹⁶ —Lajan sok jel juts'in wa sk'ana oj sk'u'luke ja b'a mi lekuki sok wani sk'ana oj milwanuke'a—

¹⁷ Mini jun yal chan oj ko' k'ab'al ta yuj k'a wax yila ja ma' oj yamjuk yuji.

¹⁸ Jaxa it jumasa, yuj ja jel tuk ja jastale'i ixta wax yixtalane ja sak'anile'i sok jach'ni oj ch'ay sna'jele'a.

¹⁹ Jel ajula sb'aj ja jastal oj ch'ay sna'jel ja ma'tik wa sk'ana jel oj ajyuk ja jastik sb'aje'i b'aj mi yuj ya'teluk ye'n ja jas oj sta'i: —jach' oj ch'ay sna'jele ja sak'anili—

Ja jas wax na'xi, wa sloko ja keremtik jumasa

²⁰ Ja jas wax k'anxi, wax b'ob' maklaxuk ja b'a kaye jumasa.

²¹ B'a chikin b'a ay ma' jel wax ek'i sok ja k'inal jumasa b'a jel wax ajyi swinkili ti wax maklaxi petsanil k'ak'u ja jas wax yala'i.

²² —Ja we'nlex keremtik jumasa b'a mi jas waxa na'awex, jel tsamal ayex sok ja jastal mi jas wa sna'awexi; sok ja we'nlex keremtik jumasa, b'a jel tuk ja jastalexi, lajan sok jel lek ayex sok ja jastal mi jas waxa na'awexi, ¿Jach'ni ma oj ajyanik petsanil k'ak'u b'a'a? Jaxa we'nlex ja ma'tik mi jasxa na'awex ¿yujni ma spetsanil k'ak'u mi lek oj ja wil'ex ja jas wax na'xi b'a?

²³ —Kisawonik ja yajni wax je'a wi'ex jas oj ja k'u'lukexi— jach' oj b'ob' k'ep a wi'ex ja we'nlex ja jas tey b'a olomi oj je'a wi'exi.

²⁴ Ke'n wax payawex, jaxa we'nlexi, mixa k'anawex; wax je'a wi'ex, jaxa we'nlexi, mini t'unxa waxa kisa wonexa.

²⁵ Mini t'unxa kisawex ja jas wax ka'wi'exi, lomni wax kutajexa mini t'unxa k'u'anexa.

^26-27 —Cho jach'ni ja ke'n jel oj tse'ukex ja yajni oj kil b'aj jel wa'nex xiweli, sok ja yajni la kanyex jipani— jach' jastal oj sju'ex el ja ik'i ma jastal mi wokoluk oj ko'uk a b'ajex jun wokol.

²⁸ Oj ja k'umukonex jasa mi oj maklayex; oj ja le'onex jasa mi oj ja ta'onex.

²⁹ Ja we'nlexi, mixa k'ana oj ja neb'ex cho mixa k'ana oj ja k'u'ukex ja Dyosi;

³⁰ Mixa k'u'anex ja ab'al jumasa ja jastik wax je'a wi'exi.

³¹ Ja'yuj ojni a tup wa mulexa: —Mini oj ch'akuk ja ab'al k'umal a b'ajexa—

³² —Yuj ja jas ch'ak a neb'ex oj ja k'u'lukexi jel oj ja wi'ex ja wokoli cho jach'ni yuj ja jel tuk ja jastalexi— —Jach' oj ch'ay a na'jelex yuj jastal jel tukexi sok yuj ja jel ko'el waxa maklayexi—

³³ Jaxa ma'tik wa skisawone'i, jel tsamal sok jel laman oj ajyuke, sok mi oj xiwuke yuj ja wokol jumasa—.