Oseas 1 - Ja yab'al ja Dyosi

Ja Oseasi nupani sok jun ixuk tuktukil winik wax yi'aj sb'aj sok

¹ Ja Dyosi sk'uman ja aluman Dyos Oseas yunin ja Beeri, ja yajni ye'n mandaranum ay ja Jeroboam yunin ja Joas b'a Israeli. Ja ek' ja it ja yajni ye'n wane sk'ulajel mandar ja Ozias, ja Jotam, ja Ahaz sok ja Ezequias b'a Juda.

² Ja jas b'ajtan yala yab' ja Dyos ja Oseasi ja iti: kax nupanan sok jun ixuk ma tuk tukil winik wax yi'a sb'a sok, oj cho ajyuk awuntikil sok ja ye'n, yuj ja israelenio jumasa ya'woneta kani, jach' wa sje'a sb'aje jastal jun ixuk ma tuk tukil winik wax yi'a sb'aj sok—.

³ Ja Oseasi sk'u'an nupani sok ja Gomer yunin ja Diblaimi. Jaxa ye'ni tukb'i satk'inal yila sat jun yal.

^4-5 Ja'yuj ja Dyosi ti yala yab' ja Oseasi: Ja mandaranum Jehu jel xa niwak ja smul sle'unej ja b'a loman yaman b'a Jezreeli. Ja'yuj ja b'a jun xta loman yaman jawi oj k'ul ganar jas soldado jumasa yi'oji. Oj ka stup'e' ja yintile jumasa sok oj ch'ay sna'jel ja schonab'il ja israelenio. Ja'yujil ja wa wunini oj wa sb'i'iluk Jezreel—.

⁶ Ek' ja k'ak'u, ja Gomeri, cho tukb'i satk'inal cho yila sat jun yal ak'ix. Jaxa Dyosi ti yala yab' ja Oseasi. Ja yal ak'ix iti oj wa sb'i'iluk Lo-ruhama, was k'ana yale Mi yajtanub'aluk, yuj ja mixa oj ch'ayi ja smul sok mixa oj talnana slastima'ile ja b'a wax k'ulan mandar ja israelenio jumasa.

⁷ Kechan ja oj talna slastima'il ja swinkil jumasa ja chonab' Juda. Ke'n oj koltaye, sok ja jawi mi oj makunuk kuj saldado sok mini tujk'anub' b'a tiro'anel—.

⁸ Jaxa Gomer ja yajni mixa wax ya chu'nuk ja Lo-ruhama, cho tukb'i satk'inal pilan majke; jaxa majke iti yal kerem yila sat ja yali.

⁹ Ja'yuj ja Dyosi ti yala yab' ja Oseasi: Ja yal kerem iti oj wa sb'i'iluk Lo-ami, wa sk'ana yale Mi chonab'ilukex. Ja'yuj ja israelenio jumasa mixa kuntikiluke sok mixa ni sDyosukonea.

¹⁰ Jayuj jun k'ak'u ja israelenio jach' oj wajuke jastal ja jijkab' b'a sti' ja niwan paman ja'i, mix b'ob' ajtab'axuk. —Yaj nix k'ot ja k'ak'u jawi, mixa oj b'ob' kal yabye: Ja we'nlexi mi kuntikilukex; ja oj kal yabye'i: Ja we'nlexi kuntikilexni'a, yuj ja ke'non ja Dyos ma wax ya'a ja wa sak'anilexi.

¹¹ Ja k'ak'u jawi jel niwan, yuj ja oj ka kumxuk yi'e ja lu'um jumasa b'a Juda sok b'a Israel yuj ja jel niwan ja jas sk'u'lane'i. Oj sk'u'luke jun xta schonab'ile; sok june'ita smandaranume, sok ti oj kumxuke b'a Jerusalen ja ma'tik i'jiye b'a pilan chonab' jumasa.