Numeros 1 - Ja yab'al ja Dyosi

Ja soldado sb'a israelenio

¹ Ja israelenio jumasa, ti aye b'a takin lu'um k'inal b'a wits Sinai ja k'ak'u k'umaji yuj ja Dyos ja Moises b'a lu'um tsa'ub'ali. Ja k'ak'u jawi, ek'ta ox lajune ixaw elele b'a Egipto. Jaxa Dyosi, ti yal yab' ja Moisesi:

² —A och ju'un pilan pilan spetsanil ja israelenio b'a jujun k'ole sok b'a jujune na'its spetsanil ja sb'i'il ja israelenio jumasa. B'a jach' oj ja na' janek' aye sok ja sb'i'ile b'a spetsanile'i,

³ ja winik jumasa b'a ay yi'oj jun tajb'e jab'il b'a ojxa b'ob' wajuke b'a tiro'aneli. A och ju'un ja sk'ole'il aye sok, a skoltaya stojb'esjel ja Aaroni,

^4-16 jach'ni ja lok'olal jumasa b'a jujun k'ole'i. Oj b'ob' skoltaya ja ye'nle'i: Sk'ole ja lok'olali ja sb'a Rubeni Elisur ja stat ja Sedeuri ja sb'a Simeoni Salumiel ja stat ja Surisadai ja sb'a Judai Nahason ja stat ja Aminadabi ja sb'a Isacari Natanael ja stat ja Suari ja sb'a Zabuloni Eliab ja stat ja Heloni ja sb'a Efraini Elisama ja stat ja Amihudi ja sb'a Manasesi Gamaliel ja stat ja Pedasuri ja sb'a Benjamini Abidan ja stat ja Guidoni ja sb'a Dani Ahiezer ja stat ja Amisadai ja sb'a Aseri Paguiel ja stat ja Ocrani ja sb'a Gadi Eliasaf ja stat ja Reueli ja sb'a Neftali Ahira ja stat ja Enani

Sk'ole ja lok'olali

^17-19 Jun ixaw tsa'an, ti'to aye b'a takin lu'um k'inal b'a wits Sinai. Jachuk ja Moises sok ja Aaroni, stsomowe spetsanil ja winike jumasa ma'tik tsajiye yuj ja Dyosi sok ja winik jumasa ma'tik ek'elxa yuj ja jun tajb'e (20) jab'ili. Jaxa janek' kani cho ti'ni aye tiwa. Ja'yuj yajtab'ane sok ya'we och ju'un chikan ja sk'ole aye yuj ja israelenio. Jach' sk'u'lane ja jastal alji yab' ja Moises yuj ja Dyosi.

^20-46 Ja' spetsanil ja it jumasa ja ma'tik ojxa b'ob' wajuke b'a tiro'aneli: Sk'ole ja janek' ja sb'a Rubeni 46,500 ja sb'a Simeoni 59,300 ja sb'a Gadi 45,650 ja sb'a Judai 74,650 ja sb'a Isacari 54,400 ja sb'a Zabuloni 57,400 ja sb'a Efraini 40,500 ja sb'a Manasesi 32,200 ja sb'a Benjamini 35,400 ja sb'a Dani 62,700 ja sb'a Aseri 41,500 ja sb'a Neftali 53,400 ja' spetsanil 603,550

Sk'ole ja janek' Ja yintil jumasa ja Levi

⁴⁷ Ja yintil jumasa ja Levi, mi ajtab'ajiye sok ja ma ek' paxta yujile ja jastal ja tuk jumasa,

⁴⁸ yujni jach' alub'al yab' ja Moises yuj ja Dyosi:

⁴⁹ —Yajnixa wajtab'en ja israelenio jumasa, mok wa ochuk ja yintil jumasa ja Levi.

⁵⁰ Ja ye'nle'i, jel t'ilan oj wa' a'tijuke b'a na'its tsa'ub'al, b'a jach' ye'n oj stalnaye spetsanil ja jas tey tiwi. Ye'n schol oj stukb'ese b'a oj ajyuk ja na'its jawi, sok spetsanil ja jas tey yojoli, cho ti oj stojb'es ja snaj ye'nle b'a sjoyanal.

⁵¹ —Mi kechanuka, ja k'ole jumasa sb'a Levi, ye'n oj cho sjom'e' ja na'its tsa'ub'al ja yajni ojxa cho b'ejyuke ja kristyano jumasa; yajnix cho k'otye tek'ani, oj cho stojb'ese pilan majke. —Spetsanil ja ma oj och mojan sok ja na'its tsa'ub'ali, ta yuj k'a mi ja'uk ja k'ole jumasa sb'a Levi, ojni chamuke'a.

⁵² —Jaxa tuk juluch k'ole israelenio, jach' oj schol ja snaje jastal wa scholo sb'aj ja soldado jumasa: b'a jujune ti oj ajyuke tiw b'a yoj snaje sok ja sbandera'e'i.

⁵³ Ja k'ole jumasa sb'a Levi, ti oj sk'u'l ja snaje b'a sjoyanal ja b'ay ja na'its tsa'ub'ali sok ye'n oj stalnaye, b'a mi oj tajkuk ja Dyos sok ja yuntikili.

⁵⁴ Ja israelenio jumasa, ch'ak sk'u'luke spetsanil ja jastal alji yab' ja Moises yuj ja Dyosi.