Nahum 1 - Ja yab'al ja Dyosi

Ja jas alji yab' ja swinkil ja chonab' Ninive, ja sniwanil ja schonab'ili, ja Asiria

¹ Ja ke'n Nahum jb'i'il ti kulanon b'a Elcos. B'a jun jwayich ti sk'umanon ja Dyosi, yala kab' yuj ja jastal ay ja swinkil ja chonab' Ninive, sok ja'ni ja lo'il it ts'ijb'a yi b'a mi slekiluk ja swinkil ja chonab'i:

² Ja Dyos kujtiki, wa sk'ana toj oj ajyukotik sok. Yajni wax tajki, ay jas wax kan b'uk'an yuj b'a oj ya stup ja kontra jumasa sok ja ma mix ilji yuj leki.

³ Ja Dyos kujtiki, jel ja yipi sok wanix ya stup ja smul ja ma' sb'ej ni oj ya stupi, cho jach'ni jun Dyos jel ja spasensia, sok mix tajki wego. Ja Dyos kujtiki, ti wax b'eyi b'a yojol ja tsatsal wokoli; ja ason jumasa ja sts'ub'il ja lu'um it wax k'e'i.

⁴ Ta yuj k'a wax ya' tek'an ja ja' b'a mar sok ja niwan ja' jumasa ja it jumasa takin wax kanye sok wax takji ja nichim jumasa b'a Libano, ja wits jumasa sb'a Basan sok ja wits Carmelo.

⁵ Ja b'a sti' sat ja Dyos kujtiki oj k'itk'unuk ja lu'um sok ja swinkil jumasa, jach'ni ja wits jumasa sok ja yax k'ul jumasa tsats lek oj nijkuk.

⁶ Yaj ni wax tajki, ja Dyos kujtiki, ts'ub' lu'um wax ya wajuk ja ton jumasa, jach' jastal wa spojo ja chawuki; yajni wax tajki ja Dyos kujtiki, mi ma oj b'ob' tek'anuk toj.

⁷ Ja Dyos kujtiki jel ja syajal sk'ujoli sok was talna ja ma'tik wax k'u'aji yuji. Ja yajni ay wokoli, ja ye'n wanix koltani'a.

⁸ Cho jach'ni sch'aya yi sna'jel ja skontra jumasa; jach' wa skicha ek' jastal ja b'ut' ja'i, —Was nocho asta man b'a yoj k'ik'inal.

^9-11 Ja we'nlex swinkil ja chonab' Ninive, ¿Jas lom waxa lajawex oj ja k'u'lukex jastik jumasa b'a mi lekuki? Ay ma' tey a mokex june ja ma' wax ya'wi'ex rason b'a mi lekuki, wa'n schapjel jastik mi lekuk b'a oj sk'u'lyi ja Dyos kujtiki, jaxa Dyosi, oj ni sch'ak a na'jelex ja we'nlexa; oj sch'ak a na'jelex, sok mixani ojto ya'wi'ex otro tiempo'a; oj slap a k'ajk'alex jastal ts'i'lel, ma jastal jun monton k'i'ix.

Ja jas alji yab' ja schonab'il ja Dyosi

^12-14 Ja Dyos kujtiki, jach' yaloj jastal iti: —Ja Asiria jun chonab' jel jitsan ja swinkili, jaxa ke'n oj ni jch'aj sna'jele'a. Oj ch'ak sna'jel ja snajtsil stsomjele'i, ja sk'u'lub'al dyose jumasa sok ja retrato'il ja sdyose'i, sok spetsanil oj ch'ak sch'ay sk'ujole ja jawi. Ja sniwanil ja schonab'ile'i, oj kan jipan, kechan altiro ja wa'ne smajlajel mi lek oj kil'e'. —Chonab' Juda, a'nima jel ka'a wi'ex wokol ja mas b'ajtani, ja ya'n mixa oj ka'a wi'ex wokol mas. B'ato oj k'u'luk a wi'ex jachuka ojxa ka' elanik libre mixani oj ochanik moso'il pilan majke'a.

¹⁵ Chonab' Juda: —Ti'xa jakume b'a yoj wits ja ma'tik yi'oje jan ja yajk'achil tsamal lo'ili —Tiempo xa oj ja k'u'lukex jun k'in sok k'u'lanik xa smeranil ja jas a walunejexi. Ja ke'ni, ojni jch'ay sna'jel ja tantik ma' jel kistal jastale'i, sok mixani nunka ojto cho kil'ex kontra'a.