Lucas 1 - Ja yab'al ja Dyosi

^1-4 Lek ay moj alijel Teofilo: Ja we'n waxa na'a jel jitsan ja ma'tik wa sk'ana schojlal oj tsi'jb'aye ja jastal ek' kujtikoni. Oj ch'ak sts'ijb'aye ja jastal yala kab'tikon ja ma'tik ti ajyiye sok ja Kajwaltik Jesús ja k'ak'u k'e ja ya'teli, ja ye'nle'i ye'n jek jiye yuj ja Kajwaltik Jesús b'a oj slo'iltaye ek' ja yab'al ja Dyosi: Cho jach'ni ja ke'n, jk'elata lek spetsanil ja jastal ek'i, ja mas lek wax kab'i oj ts'ijb'uk a wi' spetsanil ja jas ch'ak ek'uki. B'a jach' oj cho a na' ja we'n ta smeranil ja jas ch'ak aljuk a wab'i, —xchi ja Lucasi.

Ja anjel Gabriel sok ja Zacariasi

⁵ Ja k'ak'u ye'n mandaranum ay ja Herodes b'ankilal mandaranum yuj ja judio jumasa, Ja Zacariasi, ye'n pagre ay ja tiempo jawi, ti wa'n a'tel b'a snajtsil tsomjel sok ja smoj jumasa ja pagre Abiasi. Jaxa sche'umi sb'i'il Elisabet sok ja' yintil ja pagre Aaroni.

⁶ Ja Elisabet sok ja Zacariasi, jel lek ja smodo'e'i, sok wa sk'u'ane spetsanil ja yab'al ja Dyosi.

⁷ Jasa mey yuntikile, ja Elizabeti yujni mix b'ob' untikanuka, sok schawanile jelxa byejo'e.

⁸ Jun k'ak'u ko' sb'aje a'tel b'a snajtsil stsomjel ja Dyos ja pagre jumasa smoj a'tel ja Zacariasi,

⁹ Jach'ni kulan yujile' ja pagre jumasa, wa stsa'awe' june ja smoje oj ochuk b'a yoj snajtsil stsomjel ja Dyos b'a oj stsik ja pomi, jaxa k'ak'u jawi ye'n ko' schol ja Zacariasi,

¹⁰ Yajni wa'n stsikjel ja pom b'a yoj snaj ja Dyosi, spetsanil ja kristyano jumasa ti wa'ne sk'umajel ja Dyos b'a sti snajtsil tsomjel.

¹¹ Waj yil ja Zacariasi tey jun yanjel ja Dyosi, ti tek'an ek' b'a lado stojol sk'ab' ja b'ay ja tsikub' pomi.

¹² Jaxa Zacariasi, jel xiwi mi sna'a jas oj sk'u'luk.

¹³ Jaxa anjeli ti yala'a: —Mi lom ja xiw Zacarias. Ja jas wa'na sk'anjeli, smaklanta ja Dyosi. Ja wa che'um Elizabeti oj sman jun yal kerem, jaxa alats jawi oj wa sb'i'iluk Juan.

¹⁴ Ja yajnix manxi jel tsamal oj ja wile jach'ni ja kristyano jumasa jel gusto oj yil'e.

¹⁵ Yuja alats jawi jel niwan oj wajuk ja b'a sti' sat ja Dyosi, mi oj yu' pajal ya'al ts'usub': yuj ja ti'ni ay sok ja Espiritu Santo desde me'x manxi.

¹⁶ —Yuj ja yal kerem iti, jel jitsan ja israelenio oj a'ji ya'we kan sk'uljel b'a mi leki, sok ja oj sk'u'uke ja Dyosi.

¹⁷ Ja ye'n b'ajtan ay yuj ja Mesiasi, ja'ni oj stul ja jastal ja aluman Dyos Eliasi. Ja jastal jel tsats a'tiji ja Eliasi, ja jas wax yala, oj koltajuk ja nanal tatal b'a junxta oj ajyuk sok ja yuntikile'i. Jaxa ma'tik mi sk'u'ani, ojni ya sk'u'uka jastal ja ma wa sk'u'ani, jach' jastal it oj sje'yi ja kristyano b'a chapan oj jak sta' ja Mesiasi, —xchi ja anjeli.

¹⁸ Ja Zacariasi, ti yal yab' ja anjeli. Ja ke'n sok ja jche'umi, jelxa byejo'otikon ¿Jastal oj na' ta jach' oj ek' spetsanil ja jastal waxa wala b'a?

¹⁹ Ti yala ja anjeli: —Ke'non ja Gabriel ya'tijum tsa'ub'al yuj ja Dyosi. Ye'n sjekunejon b'a oj kala wab' ja tsamal ab'al iti.

²⁰ Yuj ja mi a k'u'an ja jas kal a wab'i, mi oj b'ob' k'umanan man oj k'ot smeranil ja jas kala wab'i, —xchi ja anjeli.

²¹ Jaxa kristyano jumasa tey b'a sti snajtsil stsomjeli wa'nexta smajlajel ja Zacariasi jelxa cham k'ujol aye yuj ja jelxa alb'ita k'ot ja b'a yoj snajtsil stsomjel ja Dyosi.

²² Yajni el jan ja Zacariasi, mix b'ob' k'umanuk, ti jak sk'ujol ja kristyano jumasa ay jas naj satin ja b'a yoj snaj ja Dyosi, kechan senya wa sje'a yuj ja mix b'ob' k'umanuki.

²³ Yajni ts'ikwi ja k'ak'u wa'n a'tel ja Zacarias b'a snajtsil stsomjel ja Dyosi, ti'xa kumxi b'a snaj ja.

²⁴ Ek' chab' oxe k'ak'u ja sche'um Elizabeti, ti'xa tukb'i'a, jo'e ixaw mi t'un el ja b'a snaji, ti wax yala jastal it ja b'a sk'ujoli:

²⁵ —Ja jastal ayoni ye'n ya'oj ki ja Dyosi, b'a jach' mixa oj sk'e'nayone ja kristyano jumasa.

Ja anjel Gabriel sok ja Maria

²⁶ Jaxa yajni ayxa yi'oj wake ixaw tuk ay ja Elizabeti, ja anjel Gabrieli, ti cho jekji pilan majke yuj ja Dyos b'a Nazaret b'a jun chonab' b'a Galilea,

²⁷ Jaxa anjeli, yi'aj ochyi jun lo'il ja ak'ix Maria. Ja ye'n ja smakb'en winik ja Jose ja yintil ja mandaranum Davidi.

²⁸ Ja anjeli ti och ja b'a'y ja Maria ya'yi dyos, ti yal yab'a: —Ja Dyosi, jel lek wax yilawa— Ja Kajwaltiki, tey a moka, —xchi ja anjeli.

²⁹ Jaxa Maria jel cham ja sk'ujol yuj ja jas alji yab'i, ti och ek' sk'ujola: Jas ma jun wa sk'ana jyal ja jawi, —xchi.

³⁰ Ja'yuj ti alji yab' yuj ja anjeli: —Maria, mok xiwan, ja Dyosi jel lek ja jas ya'ta a wi'i.

³¹ Ja'yuj, ojxa tukb'an satk'inal oj ajyuk jun yala walats kerem oj wa' sb'i'iluk Jesús,

³² Ja yal kerem iti, jel niwan oj iljuk, oj aljuk sb'aj —Ja Yunin ja Dyos it jel niwani— Jaxa Dyosi, oj ya och mandaranumil jach'ni jastal sk'u'lan sok ja David ma' ek' paxta yuji;

³³ spetsanil ja k'ak'u ja oj ya'telta ja schonab'il ja israelenio jumasa, jaxa ya'teli, mini oj ch'akuka, —xchi ja anjeli.

³⁴ Jaxa Maria ti sjob'oyi ja anjeli: ¿Jastal ay ja it b'a, mey jtatam ja ke'n tak? —xchi.

³⁵ Ti alji yab' yuj ja anjeli: —Ja Espiritu Santo ti oj ajyuk amoka; cho ja oj skoltaya ja yip ja Dyos it jel Niwani, ja'yuj ja yal keremi, kechani ja oj ya'telta ja Dyosi, oj aljuk sb'aj, —Yunin Dyos—.

³⁶ Cho jach'ni wa wats Elisabet ayxa lek sk'ujol oj cho sman jun yal skerema. Ja kristyano jumasa wa'ne jan yaljel mini sb'a oj yil sat untikanel ja ye'na, ayxa wake ixaw tuk ay.

³⁷ Yuj ja Dyosi, mini jas mi oj b'ob' sk'u'luka, —xchi ja anjeli.

³⁸ Ja'yuj ti yala ja Maria: Lek ay yujni ti' ayon b'a sk'ab' ja Kajwaltika. A' sk'u'lki ja jastal waxa wala kab'i, —xchi ja Maria. Jaxa anjeli ti'xa waja.

Ja Maria waj yulata ja Elizabeti

³⁹ Ja Maria, mi ya ek' k'ak'u ti waj b'a jun chonab' b'a yaxk'ul jumasa sb'a Judea.

⁴⁰ Yajni k'oti, ti och ja b'a snaj ja Zacariasi ya'yi dyos ja Elizabeti.

⁴¹ Yajni yab' a'jiyi dyos ja Elizabeth yuj ja Maria, jel tsamal yab' ja alats ti kuchan yuji tsats lek snika sb'aj. Jaxa ye'n b'ut' kan yuj ja Espiritu Santo.

⁴² Ti sk'uman tsats lek ja Maria: —Ja Dyosi, mas lek wax yilawa ja we'n ke yuj ja tuk ixuke jumasa— Cho jach'ni jel lek wax yila ja wa wal oj ja mani.

⁴³ ¿Jas yuj ja we'n wax jak a wulatayoni, we'nani snana ja Kajwaltak?

⁴⁴ Kechan ch'ak a waki dyosi, ja yal alats ti ki'oji, jel gusto yab'i tsats lek snika sb'aj ja b'a jlukumi.

⁴⁵ —Jel lek wax yilawa ja Dyos yuj a k'u'an ja jas yal awab'i, xchi ja Elizabeti.

Ja Maria wa stoyo ja Dyosi

⁴⁶ Ti yala ja Maria: —Sok spetsanil jk'ujol wax ka'yi ts'akatal ja Dyosi,

⁴⁷ Sok jel gusto ayon yuj ja ye'nani ja jkoltanumi—

⁴⁸ —Ja Dyosi, jel niwan ja jastal wa skoltayoni yujni jun ya'tijum jel ch'in wax ka'a b'aj yi'a. —Man ya'n, spetsanil ja kristyano oj yal'e jb'aj: —Maria, ja Dyosi, jel lek wax yilawa—.

⁴⁹ —Ja Dyos it jel ja yipi jel niwan ja jas sk'u'lantaki'i. —Ja sb'i'ili, mi kwalkyera'uk—.

⁵⁰ —Ja ye'n mix ya'kan syajtajel spetsanil ja ma' wax toyji yuji.

⁵¹ —Ja Dyosi, wa sje'a ja yipi, mix yi'aj lek ja ma' jel stoyo sb'aji.

⁵² —Wax ya elyi ja ya'tel ja ma' jel niwan wax ya'a sb'aji, wax ya'yi yip ja ma' jel ajula sb'aji.

⁵³ —Wax ya'yi jas oj yab' ja ma' wa'in xya'b'i, jaxa ma' jel ja jastik sb'aji telan sk'ab' wax ch'ak sjek ele.

⁵⁴ —Wa skolta ja israelenio ja ya'tijum jumasa mini b'a mi oj ya'yi syajal sk'ujol ja jaw jumasa.

⁵⁵ —Jach' yal yab' ja ma' ek' paxta kujtiki, ja Abraham sok ja yintil jumasa, ti b'i oj ayuk petsanil k'ak'u soka, —xchi ja Maria.

⁵⁶ Ja Maria ti kan sok oxe ixaw ja Elizabeti. Jaxa tsa'ani ti'xa kumxi b'a snaja.

Manxi ja Juan it ma' ya'a yijel ja'i

⁵⁷ Yajni manxi ja yal ja Elizabeti,

⁵⁸ spetsanil ja ma mojan yi'oj sb'a soki sok ja smoj alijel jumasa jel tsamal yilawe, yuj ja yilawe jel lek ilji yuj ja Dyosi.

⁵⁹ Yajni ayxa yi'oj waxake k'ak'u ja alats jawi, ti yi'aje b'a oj kupjuyi jas k'unili. Ja ma'tik tey tiwi wa sk'ana oj ya'we sb'i'iluk Zacarias yuj ja jach' sb'i'il ja stati.

⁶⁰ Jaxa Elizabeti ti yala: Miyuk, Juan oj sb'i'iluk, —xchi.

⁶¹ Jaxa ye'nle'i, ti yalawe'a: Mini june wa moj alijel jumasa ayuk sb'i'il ja jastal itak, —xchiye.

⁶² Sok senya sjoboweyi ja stat jastal wa sk'ana oj ya sb'i'iluk ja ye'n,

⁶³ Jaxa Zacariasi, ti sk'ana jun yal ak'inte' ti sts'ijb'ana: Juan oj sb'i'iluk, xchi ja b'a sts'ijb'ani, jaxa smoj jumasa ti ch'ak kanuke jak'ana.

⁶⁴ Ja ora jawi, ti jamxi ja sti' ja Zacariasi, tsamal lek el ja sk'umali, jel stoyo ja Dyosi.

⁶⁵ Spetsanil ja ma mojan yi'oj sb'aj soki jel xiwye, sok spetsanil ja ma' tey b'a yaxk'ul b'a Judea, ti'xta ch'ak yabye ja jastal ek'i.

⁶⁶ Jaxa ma'tik ch'ak yab'i, ti wax yala sb'aje'a: ¿jastal ma oj wajuk ja alats jaw ja yajnix k'i'i? —xchiye, yuj ja wa sna'awe tey b'a sk'ab' ja Dyosi.

Ja Zacariasi, jel stoyo ja Dyosi

⁶⁷ Jaxa Zacariasi, b'ut'el sok ja Espiritu Santo, ti yala'a:

⁶⁸ —Sts'akatal lek ja jDyos yuj ja israelenio, yuj ja jakta skoltayotiki.

⁶⁹ —Ya'ata ki'tik jun jkoltanumtik b'a jel ja yipi, ja' yintil ja mandaranum David ya'tijumi.

⁷⁰ —Ja iti ayxa lek k'ak'u sk'apunej yi, ja aluman Dyos jumasa it tsa'ub'ale'i:

⁷¹ ye'n oj skoltayotik b'a sk'ab' ja ma mi lek wax yilawotiki cho jach'ni sok spetsanil ja ma' wax tajki moktiki.

⁷² —Ye'n yala oj stalna sya'ujlal ja yuntikili, ja jas jel tsamal sk'apuneji, ojni k'ot smeranila.

⁷³ —Jach' yal yab' ja Abraham it ma' ek' paxta kujtiki,

⁷⁴ oj b'i skoltayotik ja b'a sk'ab' ja ma mi lek xyilawotiki. —B'a jach' mey jun xiwel oj ka'teltatik ja Dyosi,

⁷⁵ Sok kechan ye'n oj toytik, la ajyukotik toj b'a spetsanil ja k'ak'u janek' oj ajyuk jsak'aniltiki.

⁷⁶ —Jaxa we'n kala unin oj ja b'i'iluk: Aluman yuj ja Dyos it jel Niwani. —We'n b'ajtan oj ek'an yuj ja Mesiasi, b'a oj a chap ja kristyano jumasa, yuj ja oj juluki.

⁷⁷ —Oj a wal yab' ja yuntikili, sta'awetani ja skoltajele'a cho mi oj aji stup ja smule yuj ja Dyosi.

⁷⁸ —Ja jtatik Dyosi, jel wa syajtayotik man b'a satk'inal sjekakon ki'tik jun jkoltanumtik, lajan sok jastal wax lijpi ja k'ak'u b'a jun tsamal sakb'el.

⁷⁹ —Ye'n oj skolta ja ma' tey b'a yoj wokol b'a chamel ch'akeli. —Lajan sok jastal jun k'ak' wa'n ijlab'anel ja b'a yoj k'ik'inali oj sje' ki'tik ja b'a oj ekotiki b'a jun b'ej b'a laman, —xchi ja Zacariasi.

⁸⁰ Ja yal kerem Juani k'i'i, jel tsats ay sok ja Dyosi, ti ajyi b'a chayan lugar, man alji yab' yuj ja Dyos ojxa waj slo'ilta yab' ja israelenio jumasa ja ab'al it jel tsamali.