Levitico 1 - Ja yab'al ja Dyosi

Ja majtanal jumasa b'a lek wax yila ja Dyosi

¹ Ja Dyosi, spaya ja Moises man b'a snajtsil tsomjel, ti alji yab'a

² ab'i yal yab' ja israelenio jumasa ja lo'il iti: —Yajni ay ma' oj ya'ki jun jmajtan b'a oj stsik yuj ja wa stoyowoni, oj b'ob' ya'ki jun yal wakax, jun yal chivo, ma jun yal chej.

³ —Ay k'a ma oj ya'ki jun yal wakax sb'aj majtan, t'ilan oj ya' jun yal swaw b'a mi yajb'eluk. A yi' och b'a wax ajyi ochel b'a snajtsil tsomjeli,

^4-5 tix ya' kajan ja sk'ab' b'a s'olom ja yal wakax jawi, a smile'. Jaxa ke'n ojni ki' lek ja majtanal jawa, ojni cho jch'ayi ja smule'i. Jaxa pagre jumasa oj ya'we ki ja schik'el ja yal wakax jawi, tsa'an ti oj spek' e b'a schanil sts'e'el ja b'a wax axi kajan ja smajtan ja dyosi.

^6-9 Ja ma oj ya'ki ja majtani, ye'n oj ya elyi ja sts'ujmili, ye'n oj ch'ak schok'b'es. Jaxa schaktop sok ja yok sk'ab' jumasa, a sak' lek sok a ya' yi ja pagre jumasa. Jaxa ye'nle'i, oj stsom'e k'ak' b'a sat b'a wax axi kajan ja smajtan ja dyosi ti oj ch'ak stsik e' tiw spetsanil ja yal sts'ub'il jumasa sok ja s'olomi, cho jach'ni ja schaktopi, ja skojlelal sok ja yok sk'ab' jumasa oj tsikxuk, ja iti, jun majtanal b'a jex ajb'ani yik'il wax kab'i, jach' wax ya'weki, yuj ja jel wa stoyowone'i.

¹⁰ —Ay k'a ma oj ya'ki jun yal chej ma jun yal chivo, t'ilan oj ya' jun swaw b'a mi yajb'eluk.

¹¹ Ti oj smil b'a jun sts'e'el ja b'a wax axi kajan ja jmajtani, jaxa pagre jumasa ti oj spek' e' ja schik'el b'a schanil sts'e'el ja b'a wax axi kajan ja jmajtani.

^12-13 Jaxa ma oj ya'ki ja majtanali, ye'n oj ch'ak schok'b'es. Ja schaktop sok ja yok sk'ab' jumasa oj sak' lek, spetsanil oj ch'ak ya'yi b'a sk'ab' ja pagre jumasa. Jaxa ye'nle'i ti oj ch'ak stsik e' b'a wax axi kajan ja jmajtani ja yal sts'ub'il jumasa sok ja s'olomi, ja schaktopi, ja skojlelal sok ja yok sk'ab' jumasa oj tsikxuk, ja iti jun majtanal b'a jex ajb'ani yik'il wax kab'i, jach' wax ya'weki yuj ja jel wa stoyowone'i.

¹⁴ —Ay k'a ma' yal chan oj ya'ki ja jmajtani, t'ilan yal pumus ma yal tortola.

¹⁵ Jaxa pagre ti oj ya' kajan b'a sat ja b'a wax axi kajan ja jmajtani, oj sk'uts yi ja s'olomi oj stsike, jaxa schik'eli a'nima tix ch'ak pek' b'a sts'e'el jumasa ja b'a wax axi kajan ja jmajtani.

¹⁶ Oj eluk ja sb'uch sok ja schaktopi, ti oj jipxuk b'a sts'e'el ja b'a wax axi kajan ja jmajtani b'a wax nolxi ja ta'ani.

¹⁷ Tsa'an oj pojxuk snalan ja yal chani, b'a jun sts'e'eli oj waj sok jun sk'ab', kechan mi oj spil sb'aj, jaxa pagre ti oj stsik b'a sat si' b'a wa'n ajleli. Ja iti jun majtanal b'a jex ajb'ani yik'il wax kab'i, jach' wax ya'weki yuj ja jel wa stoyowone'i.