Jueces 1 - Ja yab'al ja Dyosi

Ja Juda sok ja Simeoni, syamawe ja Adonisedec

¹ Tsa'an yajni chamta ja Josue, ja israelenio jumasa ti sjob'owe yi ja Dyosi: —¿Mach' ma k'ole'il ja janek' aytikon ja oj k'e' tiro'anel b'ajtan sok ja cananeo jumasa?

² Jaxa Dyosi, ti yala'a: —Ja' b'ajtan oj k'e'uke ja k'ole sb'a Juda, yujni ye'n oj ka'yi'e ja lu'um jawa.

³ Jaxa k'ole sb'a Juda, cho yalawe yab' ja k'ole sb'a Simeoni: —La'ik jmoktikon ja tiro'anel sok ja cananeo jumasa. Wajtikik b'ajtan ja b'a oj ki' ke'ntikoni, ti la wajtik tsa'an b'a oj ja wi' we'nlexi. Ja k'ole b'a Juda sok ja b'a Simeoni lekni yabye'a,

^4-5 jachuk lajan wajye ja tiro'aneli, Dyosni koltajiye yuj a'ji b'a sk'ab'e ja cananeo sok ja ferezeo jumasa ch'akni sna'jele'a. Ch'ak sna'jele lajune mil cananeo sok ja ferezeo jumasa b'a Bezec, sok ja kristyano jumasa jawi, tey ja mandaranum Adonisedec.

⁶ Yoj tiro'anel spaka ajnel ja Adonisedec, yi'aje spatik man syamawe, sk'utsuwe yi ja snan sk'ab' sok ja snan yoki.

⁷ Ti yala ja Adonisedec: —Ja Dyosi, cho jach' sk'u'lan ki ja ke'n ja jastal jk'u'lan yi ja ox tajb'e lajune mandaranumi: jk'utsu yi, ja snan sk'ab'e sok ja snan yoke'i, ti wa stuluwe b'a yib' jmesa ja sts'ub'il jwa'el wax mok' kuji. Tsa'an, ti i'ji och b'a Jerusalen ja Adonisedec, ti cham tiwi.

Ja k'ole sb'a Juda, yi'aje kan ja Jerusalen sok ja Hebroni

⁸ Ja k'ole sb'a Juda, snol k'ab'ine ja swinkil ja Jerusaleni, man yi'aje kan ye'nle ja chonab' jawi, smilawe spetsanil ja swinkili, slapawe kan sk'ajk'al.

⁹ Tsa'an snol k'ab'ine ja cananeo jumasa it ti ajyiye b'a yaxk'ul jumasa, b'a wits b'a ko'el k'inal sok b'a lajan k'inali.

¹⁰ Cho snol k'ab'ine ja cananeo jumasa ma ti ajyiye b'a Hebroni, ja sb'i'il ajyi ja chonab' jawi, Quiriat-arba. Ti k'ulajiye ganar tiw ja Sesai, ja Ahiman sok ja Talmai.

Ja Otonieli, yi'aj kan ja chonab' Debir

¹¹ Tsa'an ja k'ole b'a Juda, ti wajye b'a chonab' Debir, ja sb'i'il ajyi ja chonab' jawi, Quiriat-sefer.

¹² Ti yala ja Calebi, ja ma' oj ya' el kan ja chonab' Debir, oj ka nupanuk sok ja kunin Acsa,

¹³ jaxa ma' ya el kan ja chonab' jawi, ja Otoniel smoj alijeli. Ja'yuj ja Calebi, ja ya nupanuk sok ja Otoniel ja yak'ix Acsa. Ja Otonieli, ja stat ja Quenaz yijts'in ja Calebi.

¹⁴ Ja k'ak'u nupaniye ja Otonieli, ti yala yab' ja sche'um Acsa, a sk'an yi slu'um ja stati. Yajni yila ja Caleb ko' ja b'a sburro k'e'el ja yunin Acsa, ti sjob'oyi jasunk'a wa sk'ana;

¹⁵ Ti yala ja Acsa: Ja lu'um jumasa a wa'oj ki'i mey ja'. Ts'akataluka'a cho a'ki ja b'a ay sat ja'i. Jachuk ja Caleb, ya'yi slu'um b'a wax k'e' ya'lel b'a cha'ani, cho jach'ni b'a kusani.

Ja b'a wa sk'ana oj yi'e kan ja k'ole jumasa b'a Juda sok b'a Benjamini

¹⁶ Ja quenita jumasa yintil ja sni'al ja Moisesi, elye b'a Jerico sok ja k'ole jumasa b'a Juda, ti wajye b'a takin lu'um k'inal it tey b'a ko'el k'inal yuj ja Arad. Ti'xani kanye tiwa.

¹⁷ Tsa'an ja swinkil Juda lajan sok ja Simeoni, ilk'ujolaniye ja cananeo jumasa ma' ti ajyiye b'a Sefat. Yuj ja sch'akawe sna'jel ja chonab' jawi, ja'yuj ya'we sb'i'iluk Horma.

^18-19 Yuj ja koltajiye yuj ja Dyos ja k'ole sb'a Juda, ja'yuj yi'aje kan ja yaxk'ul jumasa, mi ja'uk ja lajan k'inali, kechan ja kristyano jumasa ma tey b'a lu'um jumasa jawi, ay skarro'e, b'a toj tak'in. Jaxa lu'um jumasa b'a mi b'ob' ya'we eluk ja it jumasa, ja b'a Gaza, b'a Ascalon, b'a Ecron, cho mini ja chonab' jumasa b'a mojan yi'oj sb'aji.

²⁰ Yujni yalunej ja Moisesa, ja lu'um jumasa b'a Hebroni, ja a'jiyi ja Caleb b'a ti oj ajyuk tiwi. Ja'yuj ja Calebi, snutsu el ja tiw ja oxe yuntikil ja cha'anil winik Anac.

²¹ Jaxa k'ole jumasa sb'a Benjamini, mi b'ob' ya'we eluk ja jebuseo jumasa ma ti ajyiye b'a Jerusaleni. Ja'yuj man ya'n ti aye b'a Jerusalen lajan sok ja k'ole sb'a Benjamini.

Ja k'ole jumasa sb'a Efrain sok b'a Manasesi, ya'we el kan ja Beteli

^22-23 Ja k'ole jumasa sb'a Efrain sok sb'a Manasesi, yalawe oj snol k'ab'uke ja swinkil ja Beteli, ja sb'i'il ajyi ja chonab' jawi, wax ijlab'ani; ja'yuj sjekawe k'eluman ja chonab' jawi, cho koltajiye yuj ja Dyosi.

²⁴ Ja ma waj sk'el ja chonab'i, ti yilawe eljan jun winik b'a yoj chonab'i, ti yalwe yab'a: Ta wan k'axa je'aki'tikon jastal oj ochkotikon ja b'a yoj chonab'i, mini jas b'a mi sb'ejuk oj k'u'ltikon a wi'a.

²⁵ Jaxa winik jawi sje'ani jastal wax ajyi ochel ja b'a yoj chonab'a, jach' b'ob' ochuke ja ma sjeka ja Efrain sok ja Manasesi. Smilawe spetsanil ja kristyano ma tey tiwi, jaxa winik ma koltajiye yuji, mini ja sk'u'lane yi'a, cho jach'ni ja swinikil snaji.

²⁶ Tsa'an ja winik jawi, el ja b'a schonab'il ja hitita jumasa, stojb'es jun yajk'achil chonab' ja ye'n ya sb'i'iluk wax ijlab'ani; man yan jach'ni ja sb'i'ila.

Ja lu'um jumasa b'a mitox och swinkili

²⁷ Ja k'ole jumasa sb'a Manasesi, mi b'ob' ya'we eluk ja kristyano jumasa b'a chonab' jumasa iti, b'a Bet-sean, b'a Taanac, b'a Dor, b'a Ibleam sok b'a Meguido, mini ja yal ch'in chonab' jumasa b'a mojan ayi. Ja'yuj ja cananeo jumasa ti'ni ajyiye tiwa.

²⁸ Tsa'an sta'a lek yip ja israelenio jumasa, b'ob' st'en e' ja cananeo jumasa, b'a ti oj a'tijuke sok ye'nle ja israelenio, b'a mini b'ob' ya'we eluk ja b'a schonab'ile'a.

²⁹ Ja k'ole sb'a Efraini, mi b'ob' ya'we eluk ja cananeo jumasa ma ti ajyiye b'a Guezeri, ja'yuj ja cananeo jumasa jawi, ti'ni kanye tiwa, ti ajyiye lajan sok ja k'ole sb'a Efraini.

³⁰ Ja k'ole sb'a Zabuloni, mi b'ob' ya'we eluk ja cananeo jumasa ma ti ajyiye b'a Quitron sok b'a Najalal, jachuk ja it jumasa ti'ni ajyiye tiwa, kechanxta yuj t'enub'alni, a'tijiye sok ja k'ole sb'a Zabulona.

^31-32 Mini ja k'ole b'a Aseri, mi b'ob' ya'we eluk ja cananeo jumasa ma ti ajyiye b'a chonab' b'a Aco, b'a Sidoni, b'a Ahlab, b'a Aczib, b'a Helba, b'a Afec sok b'a Rehob, jachuk ti'ni ch'ak kanuke lajan sok ja cananeo jumasa ma tey tiwa.

³³ Mini ja k'ole b'a Neftali, mi b'ob' ya'we eluk ja cananeo jumasa ma ti ajyiye b'a Bet-semes sok b'a Bet-anati, Jachuk ja it jumasa ti'ni ajyiye tiwa, kechanxta yuj t'enub'alni a'tijiye sok ja k'ole b'a Neftali.

³⁴ Jaxa k'ole b'a Dani, a'ji kumxuke b'a yaxk'ul yuj ja amorreo jumasa, mi a'ji ko'uke b'a lajan k'inali.

³⁵ Ja'yuj ja amorreo jumasa ti kanye b'a chonab' jumasa b'a Jeres, b'a Aialon sok b'a Saalbim. Tsa'an, yajni sta'a lek yip ja k'ole b'a Efrain sok b'a Manasesi, st'enawe ja amorreo jumasa ti oj a'tijuke sok ye'nle ja chab' k'ole jawi.

³⁶ Ja mojon sb'a amorreo jumasa, ti wa stulu yi b'a b'ej Acrabim, wax k'ot man b'a Sela, man tiwi ti wax waj b'a yoj yaxk'ula.