Judas 1 - Ja yab'al ja Dyosi

Spatulab'il k'ujolal

¹ Ja ke'n Judas jb'i'il, ya'tijumon ja Kajwaltik Jesusi, ja kijts'in ja Santiago. Ja ju'un iti, ja wax ts'ijb'a yi ja ma' wanxax yajtajiye yuj ja Dyos Tatali, yujni tsajiyeta'a, cho talnanub'alxa aye yuj ja Kajwaltik Jesusi.

² Wax k'ana yi ja Dyos a stalnayex lek, sok syajal sk'ujol a ya'wex laman.

Talna b'ajik yuj ja le'a ab'ali

³ Jmoj aljel jumasa yuj ja Kajwaltik Jesusi, ayxa k'ak'u wax k'ana oj ts'ijb'a a wi'ex ja jastal ya'ki'tik ja jkoltanumtik ja Dyosi. Jaxa ya'n k'ot sk'ak'u'il wax ts'ijb'a a wi'ex, wax k'ana a wi'ex pavor, tsatsal k'ujolan a b'ajex moka ch'ay a k'ujolex ja jas tola bida wa sje'a yi ja yuntikil ja Dyos b'a tsa'ub'al yuji.

⁴ Jel wax cham jk'ujol a wujilex, yuj ja ay chab' oxe winik, wajto a na'ex ti'xa ch'ikan a mokex, b'a kechan oj slolayex. Ja ye'nle'i, wax yalawe ja Kajwaltik Jesusi, mi b'i yuj kechanuk ye'n ajwalal, sok mi b'i kechanuk ye'n sb'ajotik, ja'yuj mi sb'ejuk oj k'u'uktik ja jas wax yalawe'i. Ja ye'nle'i, yuj wax ek' sk'ujole ke jel wa syajtayotik ja Dyosi, wax yalawe' ke mi oj ya jtuptik ja jas mi lek wax k'u'lantiki. Man najate lek wa'n yaljel ja b'a ts'ijb'anub'al ja yab'al ja Dyosi, ja Dyosi, ojni ya stup ja smul ja kristyano jumasa jawa.

⁵ A'nima waxa na'awex ja we'nlexi, wax k'ana oj ka jul a k'ujolex ja jas sk'u'lan ja Dyosi, tsa'anxa ja yajni ch'akta ya eluk ja yuntikil israelenio b'a Egipto, sch'aya sna'jel ja ma'tik sk'okowe ja smandari.

⁶ Cho jach'ni ek' sb'aje ja anjel jumasa ma'tik sk'okowe ja smandar ja Dyosi, yuj ja lom cho sjipawe kan ja tsamal lugar it a'jiyi'e yuj ja Dyosi. Tola bida mochob'ale sok jun kadena yuj ja Dyosi, jaxa b'a lutub'ale'i, k'ik'inalni'a, jaxa ya'n kechan wa'ne smajlajel oj k'ot tik'an ja k'ak'u b'a oj a'ji stup ja smule'i.

⁷ Ja iti, ja' oj slaj ja jastal ch'ak ja chab' chonab' b'a Sodoma sok b'a Gomorra, sok ja yal ch'in chonab' jumasa b'a mojan yi'oj sb'aj soki. Ja ma'tik ti ajyi tiwi, jel xa tuk ja jas sk'ulunejani, mixani jun sb'e ja jastal wax yi'a talajan sb'aje'i. Ja'yuj jel tajki yujile ja Dyosi, a'ji stup ja smule'i, jipji ye b'a yoj k'ak', ja k'ak' jawi ja oj slaj ja b'a it mix tupi, b'a jach' ti a yi'e lek wokol tiwi. Ja jastal utjiye ja kristyano jumasa it yuj ja Dyosi, oj makunuk kujtik b'a jpetsaniltik ja ke'ntiki.

⁸ Jach' oj cho ek' sb'aj ja tantik ma' jel malo ja jas wa'ne sku'lajel, it wa'non sta'jel t'i'i. Wa swaychine kosa jumasa b'a jel malo, wa sch'aya sb'aje sok ja skwerpo'e'i, wa sjipawe kan ja yab'al ja Dyosi, mi sb'ejuk ja jastal wax och sta'e ti' ja anjel jumasa.

⁹ Ja anjel Miguel it ye'n mas niwan ja ya'tel yuj ja anjel jumasa, mix jak sk'ujol oj sk'u'luk ja jastal sk'u'lan ja it jumasa. Ja k'ak'u wa'n tiro'anel ja Miguel sok ja tan pukuji b'a wa sjapakan yi ja skwerpo ja Moisesi, mi yutaj, kechan yal yab'i: —Ye'n ja Dyos oj ya'a tup ja wa muli—.

¹⁰ Jaxa tantik it wax kala, lom k'ik'inal wax och utanuke. Ja' smoje ja chante'i, ay jas wa sna'awe kechan mini t'un jas wax yabye sb'eja, ja'yuj ye'nle' ita wa sle'awe ja sch'ayelale'i.

¹¹ —Ajula sb'aj ja kristyano jumasa jawi—. Ja wa slaja ja jastal ja Caini. Kechan ja wajel sk'ujole jastal oj ya'we eluk ja tak'ini, jach' wa cho sk'u'lane jastal sk'u'lan ja Balaami. Mi t'un lekuk ja jas wa sk'u'lane'i, yuj ja jawi, jach' oj chamuke jastal cham ja Coreji.

¹² Jel k'ixwela sb'aj ja oj wajuke ja kristyano jumasa jaw ja b'a k'in waxa sk'u'lanex b'a syajal sk'ujoli, wax way'e sok wax xyu'aje pero mis kisa sb'aje. Jaxa tantik winik it wax kala wabyexi, ay ya'tele kechan ita ye'n wa stalna sb'aje. Ja lajane sok ja ason it mey yi'oj ja'i', yajni wax jak ja ik'i wax ju'ji'el yuj. Ja lajane sok ja tek'ul mix satini, jotsxita el man b'a yech, sok chamelexani'a.

¹³ Ja kristyano jumasa jawi lajane sok ja k'ak'al kawuji. Spetsanil ja jas mi lek wa sk'u'lane'i wax yilawe ke lek, ja jas mi lek wa sk'u'lane'i, jach' jastal ja spu'xil ja' niwan paman ja'i. Cho lajane sok ja ch'ayel k'anal jumasa spetsanil k'ak'u ti wa'ne b'ejyel ek' b'a yoj k'ik'inal.

¹⁴ Man najate lek ay jun winik sb'i'il Enoc, ja winik jawi man b'a Adan b'ajtan ay yuj wake winik, b'a sjukil ti jak manxuk ja Enoki, ti yal yab' ja kristyano jumasa jawi: —K'elawilex, ja Dyosi, jakum sok jitsan lek ja yanjel jumasa.

¹⁵ Ja ye'n jakum ja' oj jak ya stup spetsanil ja smul ja ma' mini jun sb'ej ja jas wa'n sk'u'lajeli, oj cho ya stup ja smul ja ma' mi lek sta'awe ti ja Dyosi, xchi ja Enoki.

¹⁶ Ja kristyano jumasa iti, spetsanil ja jastik wax yalawe'i sok spetsanil ja jastik wax yochelane'i, kechan ja jel gusto wax yabye ja ilk'ujoli sok ja stoyjel sb'aje'i, yuj k'a ay ma lek oj sk'umuke, yuj ay jas oj ya'we elyi ja kristyano jawi.

Ja lo'il b'a lek

¹⁷ Jaxa we'nlex jmoj aljel jumasa, na'awik t'unuk ja jas yalaweta a wabyex ja sjekab'anum jumasa ja Kajwaltik Jesusi.

¹⁸ Ja ye'nle'i, yala a wabyex ja yajni jelxa mojan oj k'ot tik'an ja k'ak'u, ay kristyano kechan ja oj scholuk ja k'e'naneli, kechan ja oj sk'u'luk ja jas mi lek jex k'ank'uni oj sk'u'luke'i.

¹⁹ Ye'nle ja kristyano jumasa it ja lom wax och ya stakla b'aj ja kristyano wax yalawe a b'i spil sb'aje', ja wa sk'u'lane ja jas wa sk'ana ja ye'nle'i, mi tey soke ja Yespiritu ja Dyosi.

²⁰ Jaxa we'nlex jmoj aljel jumasa, mok ch'ayuka k'ujolex a lek sniwanil a k'ujolex ja Dyosi. Ja sniwanil a k'ujolex jawi, mini kwalkyera'uka. Yajni oj ja k'umukex ja Dyosi, a'wik sk'u'l ye'n ja Espiritu Santo it mi kwalkyera'uki ye'n oj yal jasunk'a oj ja wal'exi.

²¹ Tola bida a lek sniwanil a k'ujolex ja syajal sk'ujol ja Dyosi, sok majlayik ja k'ak'u oj ya'wi'ex ja wa sak'anilex b'a mi oj ch'akuk ja Kajwaltik Jesusi, cho jach'ni ja ye'n jel wa syajtayex.

²² Koltanik sok spetsanil a k'ujolex ja ma'tik mi sna'awe meran ta ojni sta' ja skoltajele'i.

²³ Koltanik ja ma wa sk'ana oj eluk ja b'a yoj wokoli, talnayik sya'ujlal ja ma wa sk'ana oj talnaxuk sya'ujlali. Kechan talna lek a b'ajex b'a mi oj ja k'u'lukex ja we'nlex ja jas mi lek wa sk'u'lane ja ye'nle'i.

Ja ts'eb'oj ja Dyos b'a stik'anili

²⁴ Ye'n oj b'ob' skoltayex ja Dyos b'a mi oj ja k'u'lukex ja b'a mi sb'ejuki, sok ay yip b'a oj stalnayex ja yajnix waj ja je' a b'ajex b'a sti' sat ja ye'n, mini jun oj sta'a wa mulexa. Jel gusto oj waj ja je' a b'ajex ja b'a sti' sat yuj ja sak ayexi, cho jach'ni yuj ja mini jun a mul ayexi, jach' oj sta'ex jastal jun k'u' wexal b'a yajk'achil.

²⁵ Ja'yuj toyowik lek ja sb'i'il ja Dyos it ma' wa skoltayotiki. Cho jach'ni ja Kajwaltik Jesusi, na'awik jastal jel niwan ja yip sok ja yab'ali. Ja'yuj toyotik lek ja sb'i'il ja Dyos yuj ja k'ak'u b'a ek'ta, cho jach'ni ja k'ak'u b'a aytik ja ya'n, sok man b'a stik'anal. —Jach'ni'a.