Josue 1 - Ja yab'al ja Dyosi

Ja Dyosi, spaya yajk'achil ma' och ya'tel

^1-2 Yajni chamta ja Moisesi, jaxa Dyosi ti sk'uman sb'aj sok ja Josue yunin ja Nun, ja' ma wax koltaji yuj ajyi ja Moisesi. Ti alji yab' ja Josue yuj ja Dyosi: —Ja ka'tijum Moisesi chamta, jaxa ya'n we'n wax ko' a b'aj oj ja je'yi ja israelenio jumasa. Jastal oj ek' sk'uts e' ja niwan ja' Jordani, spetsanile ti oj ja wi'e och b'a chonab' oj ka' yi'e'i.

³ Spetsanil ja lu'um b'a oj ja b'at'exi, ojni ka' wi'exa, yujni jach' kaloj yab' ja Moisesa.

⁴ Oj ch'ak ka'wi'ex spetsanil ja lu'um b'a takin lu'um k'inal b'a ko'el k'inali, man b'a yaxk'ul jumasa b'a k'e'el k'inal b'a Libano, man b'a niwan ja' Eufrates b'a stojol wax jak ja k'ak'u, man b'a niwan paman ja' Mediterraneo b'a stojol wax och ja k'ak'u, ti'xa lajan ay sok ja slujmal ja hitita jumasa.

⁵ —Mi ma oj yil a k'ujol, ke'n oj koltaya, jach'ni jastal jkoltan ja Moisesi. Ti'ni oj ajyukon a moka cho mi oj ka'a kan a tuch'il.

⁶ Jaxa we'n jel t'ilan oj ja tsatsal k'ujoluk a b'aj sok tsats ajyan, we'nani oj ek'an b'ajtan yuj ja israelenio jumasa ja yajni oj ochuke b'a chonab' kalunej yabye ja ma ek' paxta a wujilexi.

⁷ Kechan wax k'ana a wi, tsatsal k'ujolan a b'aj sok tsats ajyan. Jach' oj b'ob' a k'u'uk spetsanil ja jas wax yala b'a ts'ijb'anub'al yab'al ya'wi ja kunin Moisesi. Mini jun oj b'ob' a k'ok ja jaw jumasa'a, b'a jachuk chikan b'a aya ek'a lekni oj ek'uk a wuja.

⁸ Mok a wa'kan sk'umajel ja sju'unil ja jastik ts'ijb'anub'ali; k'ak'u a'kwal neb'a, cho k'ulan, b'a jach' lek oj ek'uk a wuj sok spetsanil ja jas oj ja k'u'luki.

⁹ —Ja ke'n wax k'ana tsats a ab'aj sok tsatsal k'ujolan a b'aj, mok axwan, mok xiwan, ke'nani a Dyosona, chikan b'a oj wajana ojni jkoltaya'a.

Schapa sb'aje b'a oj ochuke b'a lu'umi

¹⁰ Ja Josue, yala yab' ja ma'tik ay ya'tel yuj ja kristyano'i:

¹¹ —Ka'axik ja b'a na'its k'u'lub'al sok k'u'uts jumasa ja b'ay ja kristyano'i, spetsanile alawik yabye a schap sb'aje sok swa'ele, b'a yoxil k'ak'u oj ek' jk'utstik ja niwan ja' Jordani sok oj ochkotik ja b'a chonab' it oj ya'ki'tik ja Dyos kujtiki.

¹² Ja Josue, cho yala yab' jas oj sk'u'luke ja k'ole jumasa sb'a Rubeni, sb'a Gadi, sok snalan ja sb'a Manasesi, ti yala'a:

¹³ —Na'awik t'unuk ja jas yala wabyex ja Moisesi, ja Dyos kujtiki oj ya'wi'ex ja lu'um iti, ja b'a laman oj ajyaniki.

¹⁴ Spetsanil ja wa chante'exi, wa che'umexi, wa wuntikilexi, tix ch'aka wa'wex kan jul il b'a sk'axil ja niwan ja' Jordan jach'ni jastal yaloj a wabyex ja Moisesi. Jaxa spetsanil ja winik jumasa ma ay stujk'anub'i, a ek' sk'uts e' ja ja'i, b'a oj skoltaye ja smoje'i.

¹⁵ Mok jilanik man oj ja wi'ex kan ja lu'um it oj a'juk yi'e yuj ja Dyos ja jastal cho ya'wi'ex ja we'nlexi. Yajnixa wilawex yi'ajeta kan ja sb'aje'i, ojxa b'ob' kumxanik ja we'nlex b'a lu'um ya'wi'ex ja Moises b'a sk'axil ja niwan ja' Jordani.

¹⁶ Jaxa ye'nle'i, ti yalawe yab' ja Josue: —Oj k'u'luktikon spetsanil ja jas waxa k'ana oj k'u'luktikoni, oj wajkotikon ja b'a waxa k'ana oj wajkotikoni.

¹⁷ Spetsanil ja jas oj ja wali oj k'u'uktikon, jach'ni jastal jk'u'antikon ja jas yala kab'tikon ja Moisesi, kechan ja' ta yuj k'a wa skoltaya ja Dyos jastal koltaji ja Moisesi.

¹⁸ Kechan ta ayk'a ma mi oj sk'u'uk ja jas oj ja wali, sb'ejni oj ch'ayxuk sna'jela. Kechan wax k'anatikon a wi, tsatsal k'ujolan a b'aj ja we'n sok tsats ajyan.