Jonas 1 - Ja yab'al ja Dyosi

Ja Jonasi sk'oko ja jas alji yab' yuj ja Dyosi

¹ Jun k'ak'u, jun winik sb'i'il Jonas ja yunin ja Amitai k'umaji yuj ja Dyosi:

² —Tulu ab'aj, ka'ax b'a niwan chonab' Ninive, ala yabye kilata ja jas mi lek was k'ulane'i.

³ Jaxa Jonasi mini sk'u'an oj wajuk ja b'a Ninive, ek sk'ujol oj waj najat lek, b'a jun chonab' b'a mi oj b'ob' ta'juk yuj ja Dyosi. Yajni k'ot ja b'a sti ja paman ja' b'a Jope ti sta'a jun barco ojxa wajuk. Stupu kani k'e ja b'a barco, tsamal lek wajum ja b'a lu'um mi ti jekub'aluk yuj ja Dyosi.

⁴ Yaj ni ti'xa aye' man b'a schanil ja niwan paman ja'i, ti sjeka jun tsatsal ik' ja Dyosi, ti'xta sutu sb'aj jun tsatsal ja' sok ik'. Jaxa barco t'usan me'x el xenti yaman.

⁵ Jaxa ma'tik was yama ja barco, xk'itk'uniye xta yuj ja xiweli, tsatsal awanel was paya ja dyos yujile'i. Jel xa cham k'ujol aye', ch'ak sjip'e' kan b'a yoj niwan paman ja' spetsanil ja yijkats ja barco b'a oj ya'we ko t'unuk ja yalali. Jaxa Jonasi tsamal lek wan wayel ja b'a wax nolxi ja jastik jumasa b'a barco.

⁶ Jaxa kapitan b'a barco ti waj yal yab'a: —Jasyuj ja ti wana wayel il ja we'n. —K'e'an k'anayi jkoltajeltik ja wa Dyosi, b'ob' ta oj b'ob' skoltayotik ja oj yil t'usan me'x ch'ay jna'jeltiki—

⁷ Ja jun xta ora jaw ja ma'tik was yama ja barco ti yalawe'a: —La ka'tik el mach'a smul ja wokoltik iti. Ti yawe eluka, jaxa ma el smuli ja Jonasi.

⁸ Ja'yuj ja ma'tik was yama ja barco ti sjob'owe yi ja Jonasi: —Ala kab'tikon jasyuj ja wa'notik yi'jel wokol lajan spetsanil ja iti Jasunk'a wa wa'teli ¿B'a jakela'a? ¿B'ay jas niwanil wa chonab'ili? ¿Sok ja schonab'il aya ja we'n?

⁹ Jaxa Jonasi ti yala'a: —Ja ke'n hebreo'on wax toyo ja Dyos it jel niwan ma sk'u'lan spetsanil ja jastik jumasa. Ja jas wan ek'eli jmul ni ke'na'a, yuj ja wa'non spakjel ajnel yuj ja ye'n.

^10-11 Jaxa ma'tik was yama ja barco, jel xiwele, ti yalawe yab'a: —¿Jas lom jach' waxa k'u'lan jastal iti? ¿Jasun oj k'uluktikon awi? —Ja ja'i ojxa smus oj tikani jaxa ik'i jel xa tsats ay—

¹² —Ti yala ja Jonasi jipawaniko b'a yoj niwan paman ja', b'ob' ta jachuki, oj lajmajuk ja niwan paman ja'i—. Ja tsatsal ik' iti ti wan jakel ab'ajex yuj ja mul ke'ni.

¹³ Jaxa ma'tik was yama ja barco och slok'e' tsats ja ja' sok jastal wa slokowe ja ja' sok ja barco, sle'awe jastal oj yawe mojxuk och b'a lu'um; jayuj mi b'ob' yujile. Ja jastal was nika sb'a ja ja'i jel tsats wan wajel kada juts'in, jaxa ik'i t'usan mex ch'ak sjom'el ja barco.

¹⁴ Jel xa cham k'ujol aye', jaxa ma'tik was yama ja barco ti awaniye tsatsa: —Dyos. A'a wa syajal wa k'ujoli, mok a mil'otikon yuj ja oj ja mil jun winik mis k'u'an ja wa wab'ali— Mok wa jmuluktikon yuj ja oj chamuki, yuj ja we'nani'a, Dyos kuj, ja ma was k'ana oj sk'ul spetsanil ja iti—.

¹⁵ Ja'yuj ja ma'tik was yama ja barco syamawe ja Jonasi sjimaweko b'a yoj niwan paman ja'. Jaxa niwan paman ja'i juts'in lamxi.

¹⁶ Yaj ni yilawe ja jas ek' ja ma'tik was yama ja barco, ti sk'u'ane ja Dyos b'a Israel jastal Dyos yujile'i, ya'we yi jun smajtan yalawe jelb'i oj stoy'e'.

¹⁷ Ja'yuj ja Dyosi, ti sjeka ja niwan chay, b'a sb'uk' ko ja Jonasi. Jaxa Jonasi ti ajyi b'a yojol ja chay jaw oxe k'ak'u sok oxe a'kwal.