Joel 1 - Ja yab'al ja Dyosi

Ja nol k'ab'inel sb'a k'ujlub' jumasa

¹ Ja Dyosi, yal yab' jun lo'il ja Joel yunin ja Petueli, jaxa Joeli, yal yab' ja israelenio:

^2-4 —Maklayik lek: ja we'nlex ma'tik niwak a wa'telex b'a chonab', sok a petsanilex ja ma' ti ayex b'a niwan chonab' iti— —Chane wokol oj ya' ja yal k'ujlub' jumasa ti'xa aye b'a jlu'umtiki sch'akaweta ja jas jts'ununejtiki— ¿Mini b'a a wilunejex ja jastal ita? —Mini ja ma ek' paxta awujilexi mi b'a yilawe ja ye'nle ja jastal it ja janek' ajyi sak'anile'i— —Alwik yab' wa wuntikilexi, cho jach'ni ja ye'nle'i, oj yalwe yab' ja yije' jumasa, b'a schab'il ma' b'a yoxil lame wa wijexi—

⁵ —Wajtikik yakb'um jumasa, k'e'anik— —Sak'tesik k'inal ochan ok'anik yuj ja mixa oj ja ta'ex ja ya'al ts'usub'i—

⁶ Jun wokol sb'a k'ujlub' jumasa yi'ajeta kan ja niwan jchonab'iltiki, lajane sok jastal jitsan soldado jumasa. Ja yeje'i ja yikxta lajane sok ja k'ak'al choj jumasa

⁷ Sch'akaweta ja yaljil ts'usub'i ch'akta sk'ok e jas te'il ja igo; —ch'akta yujile ja sk'ab' jumasa—

⁸ —Ja kristyano jumasa wax ok' ye yuj ja cham k'ujoli, jach' jastal ja ak'ix was ok' yuj ja cham k'ujol yuj ja ch'am jas makb'en keremi.

⁹ Cho jach'ni wax ok' ja pagre jumasa ma' ti wax a'tiji ye sok ja Dyos yuj ja mixa ma wax yi'aj och b'a snajtsil tsomjel ja majtanal ya'lel ts'usub' sok b'akb'el itaj jumasa.

¹⁰ —Mixa ay trigo, mixa ay ya'lel ts'usub' sok aceite, ja'yuj ja yaljil jumasa ch'ak takjuk jach' kan jastal jun takin lu'um k'inal.

¹¹ —Ja we'nlex ma'tik wala a'tijiyex b'a alaj, sok ja we'nlex ma'tik wax ya'telta ja lu'umi: —Ok'anik yuj ja cham k'ujoli— ch'ayta ja sb'a'al wa walajexi jastal ja trigo sok ja sebada;

¹² Ch'akta takjuk ja yaljil ja ts'usub' jumasa, ch'akta takjuk ja igo cho jach'ni ja granada, ja xa'an jumasa sok ja mansana sok spetsanil ja te' jumasa b'a k'uli; —cho jach'ni ja kristyano jumasa mixa tsamal ayuke—

¹³ —Ja we'nlex pagre jumasa, waxa wa'teltayex ja Dyos b'a altari, lapa ak'u'ex jastal koton ok'anik snajtil a'kwal yuj ja mixa ma wax yi'aj och b'a snajtsil tsomjel ja majtanal ya'lel ts'usub' sok mini ja b'akb'el itaj jumasa.

¹⁴ Tsomowik b'a snajtsil tsomjel ja israelenio sok ja ma'tik niwak ya'tele'i, a skom ja swa'ele'i, a cho sk'umuke ja Dyosi.

¹⁵ —Ja Dyos kujtiki, jakumxa— —Jelxa mojan ja k'ak'u'i— —jun k'ak'u b'a jch'akelaltik oj ya' ja Dyos it jel ja yipi—

¹⁶ —B'a sti jsat ke'ntik sjapaweki'tik ja wa'eli; sjapaweki'tik ja tsamalil ja ti aytik b'a snajtsil stsomjel ja Dyos kujtiki.

¹⁷ Ja trigo b'a jts'unxi ch'ak takjuk, ja'yuj mi jas ay ja b'a wax nolotiki.

¹⁸ —Wax awani ja jwakaxtik jumasa cho jach' jel wax yi'aj ja wokol ja jchejtik jumasa— —Ja wakax jumasa chamye wa'in yuj ja mixa sta'awe ak' oj yabye'i—

¹⁹ —Dyos kujtikon —sok we'n wax le'a jkoltajeltikon yuj ja stsikata ja jk'ultikon sok ja jwitstikoni—

²⁰ —Cho sk'anawe' awi skoltajele ja chante jumasa b'a k'uli, yuj ja yal yok ja' jumasa ch'akta tupuk jaxa k'ak'i sch'akata ja ak jumasa—