Job 1 - Ja yab'al ja Dyosi

¿Machunk'a Jobi?

¹ B'a jun chonab' sb'i'il Uz, ajyi jun winik jel toj ajyi, ja sb'i'ili Job. Wa sk'u'an spetsanil ja yab'al ja Dyosi, wa stalna lek sb'aj b'a mi ma' oj sk'u'l yi b'a mi sb'ejuk,

^2-3 kechan ye'n jel ja jastik sb'aj ja b'a k'e'el k'inali. Ay juke (7) yuntikil kerem sok oxe (3) ak'ix, cho jel jitsan ja ya'tijum jumasa. Mi kechanuka, ay yi'oj juke mil (7,000) chej, oxe mil (3,000) cameyo, jun mil wakax, jo'e syen (500) burro.

⁴ Ja yuntikil ja Jobi, wa sk'u'lane niwak k'in, b'a jujune k'in wa sk'u'lane'i, wani slokowe ja smoj alijel ixuk b'a lajan oj wa'uke'a. Jel jitsan ja k'in wa sk'u'lane'i, chol wax ek' ye sk'u'lajel ja k'in jawi.

⁵ Tsa'an yajni wax ek' ja k'ini, ti wa spaya ja yuntikil ja Jobi, wa stsomo sb'aje, b'a oj sk'an e' yi ja Dyos a ch'ayjuk yi'e ja chikan jas tik'e mulalil sk'u'luneje'i. Saj to lek wax k'e'ye ja yuntikil, wax waj ya'we yi smajtan ja Dyosi. Jach' wa sk'u'lan jastal it ja Jobi, ja'yuj ja wax yalata lek wa'nuke sk'u'lajel yi b'a mi sb'ejuk ja Dyos ja yuntikili, ma yuj lek wa'nuke ko'el mulal sok. Ja ye'n ja Jobi, yujni jach' k'ajyel wa sk'u'lan spetsanil ja k'ak'u jumasa'a.

Ja anjel le'a mulal

⁶ Ja k'ak'u k'ajyel wax ch'ak stsom sb'aj ja anjel jumasa b'a sti' sat ja Dyosi, ti cho k'ot ja tan anjel it jel sle'a mulali.

⁷ Ti yala ja Dyosi: —¿B'a' jakela ja a we'n b'a? Jaxa tan anjel jawi, ti yala'a: —Ja' wa'non ek sb'ejtesjel ek' ajyi spetsanil ja lu'um iti, ti elyon jan tiwi. Ti cho job'ji yi yuj ja Dyosi:

⁸ —¿Jasun waxa wala ja we'n yuj ja Job ka'tijum it jel toj ay jmoki? Mi' mach' ay pilan ja b'a lu'um it ja jastal jel lek ja ye'n. Spetsanil k'ak'u wa sk'u'an ja kab'ali, wa stalna lek sb'aj b'a mi jas mi sb'ejuk oj sk'u'luk.

⁹ Ja anjel le'a mulali, ti yala'a: —Jastal mi oj sk'u'uka ja Jobi, ay yi'oj spetsanil ja jas wa sk'anata.

¹⁰ Cho we'nani waxa talna ja ye'n sok spetsanil ja swinkil snaji; waxa talna yi spetsanil ja jas yi'oji, jel lek waxa wila ja we'n ja jas wa sk'u'lani. —Ja swakax sok ja schej jumasa wa sb'ut'u'el ja lu'umi—.

¹¹ Jaxa ke'n wax na'a lek, yuj k'a waj a milyi ja schanste'i, ma' oj ch'ak a japyi spetsanil ja jastik sb'aji, —Ti b'a sti' a sat oj sta'a ti' b'a mi sb'ejuk—.

¹² Ja'yuj ja Dyosi, ti cho yal yab' ja tan le'a mulal jawi: —Lek ay, k'u'lan ja jas waxa k'ana oj a ja k'u'l yi sok spetsanil ja jas yi'oji, kechan ja ye'n mok jas a k'u'l yi. Yajni yab' ja anjel ja jastal jawi, ti'xa el ja b'a sti' sat ja Dyosi.

Ja sb'ajtanil wokol jumasa sb'a Jobi

^13-14 Jun k'ak'u ja yuntikil ja Jobi, wa'ne sk'u'lajel jun k'in b'a snaj ja b'ankilali, ti k'ot jun ma waj aljuk yab' yuj ja Jobi: —Jun tantik elk'anum b'a slujmal Saba snol k'ab'inotikone, ch'ak yelk'ane ja chante jumasa— Ja ke'ntikoni, wa'ntikon jutuj lu'um, jaxa burro jumasa ti wa'ne ek' wa'el b'a ti' alaj.

¹⁵ Jun ita ch'ay k'ujol ja tantik elk'anum jawi, och milwanuke, kechan ke'n a kanyon sak'an b'a oj kal a wab' ja jas ch'ak ek'uki—.

¹⁶ Ti'to wa'n yaljel ja winik jaw ja jas yila ch'ak ek'uki, cho k'ot ja juni, ti yal yab' ja Jobi: —Ja b'aytikoni ko' jun chawuk ch'ak smil ja chej sok ja talnuman jumasa. Kechan ke'n kanyon sak'an, b'a oj jak kal a wab' ja jas ek'i—.

¹⁷ Mitox ch'ak k'umanuk ja winik iti cho k'ot ja pilan winiki, ti alji yab' ja Jobi: —Ox k'ole tantik elk'anum sb'aje b'a Caldea snol k'ab'inotikone, smilawe ja baldiyano, ch'ak yi'e ja cameyo jumasa. Kechan ke'n b'ob' jpak ajnel, b'a jak kal a wab' ja jas ek'i—.

¹⁸ Mitox ch'ak k'umanuk ja winik jawi, cho k'ot ja pilan winiki, ti cho yal yab' ja Jobi: —Spetsanil ja wa wuntikil jumasa, wa'ne sk'u'lajel jun k'in b'a snaj ja b'ankilali.

¹⁹ Jun ita ch'ay k'ujol jak jun ik' b'a takin lu'um k'inal sjipa ja na'itsi. —Spetsanil ja wa wuntikili, ti ch'ak t'enjuke kana, ch'ak chamuke. Kechan ke'n kanyon sak'an b'a wax jak kal a wab' ja jas ek'i—.

²⁰ Yajni ch'ak yab' ja Job ja jas ch'ak ek'uki, ti k'e' tek'ana sch'i'a ja sk'u' yuj ja jel yaj xyab' ja jas ch'ak ek'uki; tsa'an sjoxo'el k'ub'an ja stso'otsil s'olomi, ti snujts'in sb'aj man sta'a k'ot ja lu'um jas spatan yuj ja wa stoyo ja Dyosi.

²¹ Ti yala'a: —Yuj ja b'asan smanawon ja jnani cho jach'ni b'asan oj kumxukona. —Wax ka'yi ts'akatal ja Dyos yuj ja wax ya' ki'i— —Cho wanix ka'yi ts'akatal ja yajni wax yi'aj ki'i—.

²² Jachuk spetsanil ja jas ch'ak ek' yuj ja Jobi, mini t'un sta'a ti' b'a mi sb'ejuk ja Dyosi, cho mi jas ya smuluk.