Isaias 1 - Ja yab'al ja Dyosi

B'a wa stuluyi sts'ijb'ajel

¹ Ja Dyosi, sk'uman ja aluman Dyos Isaias yunin ja Amosi, ti' alji yab' jitsan lo'il b'a oj yal yab' spetsanil ja israelenio jumasa it ti wax a'jiyi'e mandar ajyi b'a chonab' Juda. Ja iti, ja jach' ek' ja yajni ye'n mandaranum aye ja Oziasi, ja Jotami, ja Ahaz sok ja Ezequiasi.

Ja Dyosi, yala ja smul ja yuntikili

^2-3 Ja Dyosi, yal yab' ja Isaiasi: —Ay jun jtiro sok ja israelenio jumasa, ja satk'inal sok ja lu'umi wa sna'awe ja iti. —Ja wakax sok ja burro wa sna'awe sb'aj ja yajwale'i sok wa sna'awe sb'aj ja ma' wax a'ji wa'uke yuj; jaxa israelenio, ja ma' ke'n jk'u'luneji, mi ja sna'awe, —mini t'un lekuk ja jas wa sk'u'lane ki'a—

⁴ —Spetsanil ja ye'nle'i, mulanume ja' b'ut'ele sok ja jas mi lekuki. Ch'ak sjip'one kan ja ke'n, ke'n Dyoson yuj ja israelenio; —sjipawone kan—

^5-6 —Mi lekuke, sok jelxa ka'ta yi'e ja wokoli, mixani xe'n b'a lek ay yujile'a. Man b'a yoke, man masan b'a s'olome nakaxa ka'el. Mi ma' wax ajnajiye yuj sok mi ma' wax potsji yi'e yuj, mixa ma'x a'ji och yi'e aceite b'a oj lamxuk ja syajali. —Mixani jun yip aye'a—

Ja niwan chonab'i, kanta jipan

⁷ —Ja israelenio ch'ayta sna'jele, ja schonab'ile jumasa wa'nxta tiltunuk sk'ajk'al; ti wax yilawe ja swinkil jumasa ja chonab' wax ch'ak jiyi'e ja jastik sb'aje yuj ja matik mi xyi'ab'aje soki. Ja niwan chonab'i, kanta jipan, ja skontra'e'i, jitsan soldado ja nol k'ab'ijiye yuji, man ch'ak miljuke.

⁸ —Ja swinkil ja Jerusaleni, skolta sb'aj ja b'a chamel ch'akeli, kechan kani jipan'a, stuch'il jastal jun talna yaljil melon jumasa; jach' jastal jun chonab' joyb'anub'al sok ja matik mix yi'a sb'a soki.

⁹ —Lek mokxta ke'nuk ja Dyos it jel ja kip, koltane chab' oxe'i, ja chonab' Jerusaleni, kantani jipan ajyi'a, jach' jastal ek' ja b'a Sodoma sok b'a Gomorra—.

Ja israelenio mi sna'a jastal oj stoy ja Dyosi

¹⁰ Ja aluman Dyos Isaiasi, yal yab' ja ma'tik jel niwak ja ya'tel yuj ja israelenio: —Ja we'nlexi, jel kistalex jastal ja ma'tik jel niwak ja ya'tel b'a Sodoma sok ja swinkil jumasa ja chonab' Gomorra, —Maklayik lek ja jas oj kal a wabyexi— —K'u'lanik ja jas oj yala wabyex ja Dyosi—

¹¹ —Ja Dyosi, wax ya'a na'ex k'inal: —¿Jasyuj ja jel jitsan waxa wi'ajex jan ki ja chante jumasa b'a oj ja tsik ex ki b'a sat kaltari? —Jelxa axwelon yuj ja majtanal jumasa jawi; jelxa kistal wax kila ja schik'el ja wakax jumasa, ja chej sok ja chivo jumasa—.

¹² —Ja ke'n mini b'a jk'ana a wi'ex b'a oj ja wi'ex jan ki ja chante jumasa jaw ja yajni oj jak a toy'onexi; kechani wax jak a b'al'ex kistal ja jnaji sok wax jaka wa'wex tajkukon. —Mas lek, ch'akan elanik ja b'a jnaji—

^13-14 —Ja ke'n yuj ja majtanal jumasa jawi mini jun ya'tel kuj ja— —Mixa xk'ana ja wa'ntoxa wi'ajex jani— Mokxa cho a tsik ex ki pom mixax kuch kuj ja yik'ili. Cho jach' mix kuch kuj ja k'in jumasa waxa k'u'lanex b'a sk'ak'u'il jijleli, sok ja b'a jujune wax k'e' ja ixawi, mini ja stsomjel ja ma'tik mi lek ja jastale'i. Kechan ita wa sjomo ki j'olom mixanix kuch kujila.

¹⁵ —Ja we'nlexi, jel waxa k'umanex ja Dyosi, ja yajni waxa k'umanexi, waxa lika wa k'ab'exi, jaxa ke'n mix k'ila sok mix kab'i. —Jelxa jitsan a milawexta ja kristyano'i ja wa k'ab' waxa likawexi b'ats'anxta chik'—

¹⁶ —A'wikxa kan t'unuk ja sle'jel wa mulexi— —Mixax k'ana oj kil ja jas mi lek waxa k'u'lanexi— —A'wikxa kan sk'u'lajel ja b'a mi leki

¹⁷ neb'awik sk'u'lajel ja b'a leki— koltayik ja ma' wokol ayi, ilawik lek ja meb'a koltayik ja viwuda.

^18-19 —La'ik, oj jlo'lanukotik smeranil, ya'n oj kilta oj jlaj b'ajtikiki. Ta yuj k'a oj ja k'u'ukonexi, ja ke'n mi oj k'a'a tup wa mulexi. Ja wa mulexi, jelxa kux ayex yuj jastal jun chakal pintura; jaxa ke'n ojni jsak' a wi'exa. —Sak lek oj ka'ex kan jastal ja yelo— —Ja jachuki, oj b'ob' a wabyex ja jas jel lek wax ajyi b'a lu'umi;

²⁰ kechan ta yujni jach' kistal oj ajyuk ja jastalexi, tini oj chamanik kan b'a yoj tiro'anela. Ja jas wax kala yujni jach' oj ek'uka—.

Ja Dyosi, ya stup ja smul ja ma'tik mi lek wane' sk'ulajeli

²¹ Ti yala ja Isaiasi: —Ja swinkil ja chonab' Jerusaleni jel leke ajyi, jel tsamal ja jastale'i, sok jel toj ajyiye' jaxa ya'n jun tantik milwanume.

²² Lajane sok ajyi ja tak'ini, jaxa juts'in lajane sok ts'i'leli; lajane sok ajyi ja ya'lel ts'usub' b'a jel leki, jaxa ya'n lajane sok ja ka'jte'i.

²³ —Ja mandaranum jumasa jel kistale'i jel lek wax yila sb'aje sok ja tantik elk'anum jumasa. Wa syamawe tak'in sok ay jas wax k'eb'jiyi'e, ti'xa wax yalawe ayni smul ja ma' toj ayi. Ixta wax yilawe ja meb'a sok mi skoltaye ja viwuda jumasa.

^24-25 —Ja'yuj, ja Dyos it jel ja yipi, ti yala'a: —Malanxa'a— Ja we'nlexi, minix ki'a jb'ajtikika, sok ojni ka'a tup wa mulexa. Yuj ja wa mulexi, jach' oj ch'ay spetsanil jastal wax stsikxi ja ts'i'leli, ma jastal ma' wax ya el jun kux.

²⁶ —Ja jwes jumasa sok ja ma'tik wax ya'awe rasoni, ke'n oj ka tsamalb'uk ja jastale'i, sok toj oj ka ajyuke. Oj cho ka yal'e ja b'a chonab' Jerusaleni jel toj ja jas wa'n k'u'laxeli jaxa swinkil jumasa, jelni toj aye jmoka.

²⁷ —Ja swinkil jumasa ja chonab' Jerusalen ojni cho sk'u'ukone pilan majke'a, sok spetsanil kip oj ka eluke yib' k'ab'ala ja b'a niwan wokol jawi.

²⁸ Xe'ntiyaman oj ka wajuk ja ma'tik mi lek jastali sok ja ma'tik wax ya'wone kan jun sts'e'el.

²⁹ —Ja we'nlexi, jel oj k'ixwanik yuj ja te' jumasa sok ja yaljil nichim jumasa, ja ma'tik jel niwan waxa wa'a a b'ajexi.

³⁰ —Ja we'nlexi, tsepub'al oj ka'ex kani, lajanex sok ja te' b'a mey spo'wil jastal ja yaljil nichim b'a takin.

³¹ Ja ma' jel tsats a wujilex ja we'nlexi jach' oj ajluk jastal ja takin ts'i'leli; —Ja ye'n mini jas oj na'xuk ja jas ch'ak sk'u'luka—