Hechos 1 - Ja yab'al ja Dyosi

Ja Jesús, sok ja Espiritu Santo

¹ Lek ay jmoj aljel Teofilo: Ja sb'ajtanil ju'un jts'ijb'an a wi'i, ja' jastik sk'u'lan sok ja jastik je'a ja Jesús ja yajni k'e stul ja ya'teli

^2-4 Man k'ot ja k'ak'u, i'ji k'e b'a satk'inali. Ja Jesusi, ti cham b'a cruz cho sak'wi, tsa'an b'a yojol chab' tajb'e (40) k'ak'u sje'a sb'aj yi ja sjekab'anum jumasa, sak'wini merana, sok mini ya'kan yaljel ja yab'al ja Dyosi. Jun k'ak'u tsomane spetsanile, ja Jesús sok ja yip ja Espiritu Santo, ti yala'a: —Mok elanik ja b'a Jerusaleni. Ti'xa majlayex il oj ya'wi'ex ja jtat ja jas sk'apunej a wi'exi, jach'ni jastal kalunej a wabyexi.

⁵ Ja yi'jel ja' ya'a ja Juani, sok toj ja', mixa oj ek' mas k'ak'u ja Dyosi, oj jak ya'a wi'ex ja' ja'ni sok ja Espiritu Santo—.

⁶ Jun k'ak'u ti tsoman ja sjekab'anum jumasa, ti sjob'owe yi ja Jesusi: —Kajwal, ¿mi ma tiempo uk' xa ja lek wanukxa wa'yi'e jun smandaranume ja israelenio jumasa b'a?

⁷ Ti jak'ji yi'e yuj ja Jesusi: —Kechan ye'n wa sna'a ja Dyos jas ora oj sk'u'luk ja jas wan pensar oj k'u'luki.

⁸ Kechan wax k'ana oj a na'ex ja Espiritu Santo, ojni jak a mokexa, oj ya' a wipex b'a oj waj a wal'ex b'a Jerusalen ja jastal a wilawex ek' kujil, jach'ni b'a sutanal ja Samaria b'a Judea sok b'a chonab' jumasa b'a mas najat ayi.

Ja Jesusi, k'e' b'a satk'inal

⁹ Tsa'an, ja jekab'anum jumasa yilawe jastal i'ji k'e b'a satk'inal ja Jesusi, man musji el yuj jun nole ason, tsa'an mixa b'ob'to yil'e.

¹⁰ Wajto yil'e ti sje'a sb'aj chab' winik sok ja jekab'anum jumasa. Ja sk'u' lapan yujile'i, sak lek, jaxa jekab'anum jumasa mi yilawe yuj ja ti wa'ne sk'eljel b'a satk'inali.

¹¹ Ti alji yabye yuj ja chab' winike jawi: —Winike jumasa sb'a Galilea, ¿jasyuj ja ti kanyex k'elan b'a satk'inal b'a? Wantox ch'ak a wil'ex jastal i'ji k'e b'a satk'inal ja Jesusi, ja jastal a wilawex waji, jun k'ak'u jach' oj cho kumxuk jastal jawi, —x'utji ye.

Ja slok'ol ja Judasi

^12-13 Ja jekab'anum jumasa ma yilawe waj b'a satk'inal ja Jesusi, ja Pedro, Juan, Santiago, Andres, Felipe, Tomas, Bartolome, Mateo, Santiago yunin ja Alfeo, ja Simon it wax alji sb'aj Zelote, sok ja Judas yunin ja Santiago. Spetsanile ch'ak kumxuke' ja b'a wits Olivosi, ti ch'ak wajuke b'a Jerusalen. Yajni k'otye b'a na'its wax ajyiye'i, ti' k'eye b'a jun kaje mas cha'an.

^14-15 Ja sneb'uman jumasa it ja Jesusi, k'ajyelni wa stsomo sb'aje b'a wa sk'umane ja Dyosi, ti wax ajyi soke chab' oxe ixuke, sok ja Maria snan ja Jesusi, ja spetsanil ja k'ole iti, aye jun syen sok jun tajb'e (120) winik, jun k'ak'u tsoman aye spetsanile, ti k'e tek'an ja Pedro, ti yala'a:

¹⁶ —Jmoj alijel jumasa, jpetsaniltik wax na'atik jastal yamji ja Jesusi, yuj ja ma'tik mi lek wax ilji yuji, ye'n yi'aj och ja Judas man b'a'y ja Jesusi. Ja jawi, alub'alxani yab' ja David yuj ja Espiritu Santo, cho jach'ni wax yala b'a ts'ijb'anub'al ja yab'al ja Dyosi, jach'ni ek'a.

¹⁷ —Mok ch'ay jk'ujoltik ja Judasi, jmoj ni b'ajtik sok ajyi'a, a'tijini jmoktika.

¹⁸ Ja yajni snak'ul satin ja Jesusi, sok ja tak'in it a'ji yi'i, smana sok xe'n lu'um, mi ek' k'ak'u ti'xta chama, toj b'ojtel ko' ja slukumi, ch'ak pek'uk ja sb'a'al slukumi.

¹⁹ Spetsanil ja swinkil Jerusaleni ch'ak yabye jastal waji, ja'yuj ja lu'um jawi ya'we sb'i'iluk, Slujmal chik'.

²⁰ Ja ya'ni, ojni k'ot smeranil ja jas wax yala ja b'a sju'unil ja salmo jumasa: —Oj b'i kan jaman ja snaji— —Mi b'i ma oj ajyuk ja tiwi— —pilan b'i ma oj sk'u'luk ja ya'teli—

^21-22 —Ja'yuj jel t'ilan pilan ma oj ochuk ja b'a slok'ol ja Judasi, b'a lajanxa oj waj kaltik ek' sok b'a sutunal satk'inal, ke sak'wi ja Jesusi. Jel t'ilan june ti k'e b'ejyuk jmoktik lajan sok ja Jesús ja k'ak'u k'e stul ja ya'teli, june ma' yila jastal ya' yi' ja' ja kristyano jumasa ja Juani, asta man i'ji k'e b'a satk'inal ja Jesusi.

²³ Ja ma' tsa'ji b'a oj slok'oluk ja Judasi chawane. June ja ye'nle'i, sb'i'il Jose Barsabas, wax cho alji sb'aji, —Justo—, jaxa juni Matias sb'i'il.

²⁴ Tsa'an ti och sk'umuke spetsanile ja Dyosi: —Kajwal, ja we'n waxa na'a lek ja jas wa'n ek'el k'ujoltikoni, sok ja jas wax na'atikoni, ja'yuj wax k'anatikon a wi pabor je'a ki'tikon machunkiluk ja b'a schab'il ja it jumasa,

²⁵ Oj sk'u'luk ja a'tel it yi'oj ajyi ja Judasi, —xchiye.

²⁶ Yajni ch'ak sk'umuke ja Dyosi, ti'xa yilawe ma' oj ko' sb'aja, ja ma ko' sb'aji ja Matiasi. Ja k'ak'u jawi, ti'xa och ja Matias sok ja juluche sjekab'anum ja Jesusi.