Hebreos 1 - Ja yab'al ja Dyosi

Ja sb'ajtanili

¹ Ja najate, ja aluman Dyos jumasa, ye'n yalawe yab' ja yab'al ja Dyos ja ma' ek' paxta kujtiki. Jitsan bwelta yalawe sok sle'awe modo jastal sk'u'lane.

² Jaxa ya'n, ja b'a k'ak'u jumasa jakumi, ja Dyosi ja Yunin jak sje'ki'tik ja smandari, yuj ja ye'n stojb'es ja Dyos ja lu'um k'inali, sok ya'yi b'a sk'ab' spetsanil ja kosa jumasa.

³ Ja yunin ja Dyosi, wa sje'aki'tik jastal jel niwan ja yip jas Tati, ja yunin ja Dyosi, jach' jastal jas Tati, yuj ja sniwanil ja Yipi, ja'yuj mix ch'ak ja jas sk'u'luneji. Ja yunin ja Dyosi, sta'a smodo'il jastal sch'ayata spetsanil ja jmultik jumasa ja Dyosi, tsa'an ti' waj b'a satk'inal ti waj kulan b'a lado stojol sk'ab' jas tati ja b'a kulan ek'i.

Ja yunin ja Dyos sok ja anjel jumasa

⁴ Ja yunin ja Dyosi, mas niwan ja ye'n yuj ja anjel jumasa, ja Dyosi, ya'yi jun sb'i'il mas niwan yuj ja sb'i'il ye'nle'i.

⁵ Jasyuj ja Dyosi, mini b'a yal yab' jun anjel ja jastal iti: —We'na ja Kunina; man ya'n ke'n a Taton—. Cho mi b'a yala sb'aj jun anjel ja jastal iti: —Ja ke'n, ye'nani jas Tatoni, jaxa ye'n, ye'nani Kunina—.

⁶ Jaxa yajni sjekakon ja yunin ja Dyos ja b'a lu'um iti, ti yal yab' jastal ita: —Spetsanil ja kanjel jumasa, ojni stoy'e leka.

⁷ Mi kechanuka, ja yajni ay jas oj yal ja Dyos yuj ja anjel jumasa, ti wax yala jastal ita: —Ja kanjel jumasa ik' ason aye ek'e, jaxa ka'tijum jumasa, wax lijpiye jastal tsantsewal.

⁸ Jaxa yajni wa sta'a ti ja yunini, jach' wax yala jastal it ja Dyosi: —Jawa mandari mini oj ch'akuka, jaxa wa wipi, toj lek oj wa makunuk.

⁹ Toj lek ja jas oj a je'i, ja jas mi lekuki, mi lek oj ja wile. Ke'n oj kal a wab' kechan we'n ja jmandaranuma b'a jel wax k'ana, —ja mandaranum jawi, jel tsamal oj ajyuk ja b'a lu'umi iti—.

¹⁰ Sok wax cho yala: —Kajwal, desde k'e' kujlajuk ja kosa jumasa we'nani a k'u'lan ja lu'uma; cho we'nani ja satk'inali,

¹¹ takal takal wa'n ch'akel, jastal ja k'u' wexali, sok oj k'ot jun k'ak'u oj a ch'ay sna'jel. —Jaxa we'n mini waxa tukb'es ab'aja;

¹² tola bida junxta aya, sok mini oj chamana—.

¹³ Ja Dyosi mini b'a yal yab' jun anjel ja jastal iti: —Ti la kulani b'a lado stojol jk'ab', —Man oj ch'ay sna'jel spetsanil ja ma mi lek wax yilawa'—.

¹⁴ Jasyuj ja anjel jumasa ik' ason aye ek' wax ya'teltaye ja Dyosi, sok ye'n wa sjeka ja Dyos b'a oj wa skolta spetsanil ja kristyano ja ma ojto skolta.