Genesis 1 - Ja yab'al ja Dyosi

Ja b'a wa stuluyi spetsanili ( 1—11 ) Sk'e'ub' ja jastik sk'u'lan ja Dyosi

¹ Yajni k'e sk'u'luk ja Dyos ja satk'inal sok ja lu'umi.

² Ja lu'umi, mix b'ob' ilxuk cho mi jas sak'an ay. Jaxa ja' jumasa, toj k'ik'inal ja b'a'yi, jaxa b'a sat ja ja'i, ti' wa'n nijkel ja yespiritu ja Dyosi.

Ja sb'ajtan k'ak'u

³ Ti yala jastal it ja Dyosi: —Wax k'ana ay jas oj ijlab'anuk— —Ti'xta'a, ijlab'ani—

⁴ Yajni yila ja Dyos jel tsamal ja jastal ijlab'ani, ti spila ja k'ik'inali.

⁵ Ya sb'i'iluk —k'ak'u—. Jaxa k'ik'inali ya' sb'i'iluk —a'kwal—. Jachuk, och ja a'kwali, cho el jul ja sakb'eli. Jach' waj ja sb'ajtanil k'ak'u.

Chab'il k'ak'u

⁶ Ti yala ja Dyosi: —Wax k'ana ay jas tsats oj ajyuk b'a yoj ja' b'a oj spili—

⁷ —Ti'xta'a jach'ni waj ja—. Ja Dyosi, ay jas toj ya stim ja ja' jumasa, ja snalan ja ja'i, ib'elajel kani jaxa pilan snalani, ti waj b'a nalan cha'an.

⁸ Yajni yila tsamalil ja jas sk'u'lan Ja Dyosi, ya' sb'i'iluk —satk'inal—. Och ja a'kwali, cho el jul ja sakb'eli, Jach' sk'u'lan ja schab'il k'ak'u.

Yoxil k'ak'u

⁹ Ti yala ja Dyosi: —Wax k'ana, spetsanil ja ja' it tey b'a yib'el ja satk'inali a stsom sb'aj b'a junxta oj ajyuke, a chiknajuk ja b'a takini—. —Ti'xta'a jach'ni waj ja—.

¹⁰ —Lu'um— ya sb'i'iluk ja Dyos ja b'a takijkani, jaxa b'a stsomo sb'aj ja ja'i, ya' sb'i'iluk —niwan paman ja'—.

¹¹ Yajni yila ja Dyos ja stsamalili, ti yala'a: —Wax k'ana oj ajyuk b'a lu'umi, tek'ul jumasa sok itaj b'a oj satinuk sok b'a oj ya' yintil. —Ti'xta'a jach'ni waj ja—.

¹² Ja b'a lu'umi, k'i' tek'ul sok itaj jumasa; ja tek'ul jumasa ya'a sat, jaxa itaj jumasa ya'a yintil. Jel tsamal yila ja Dyos ja jas sk'u'lani,

¹³ Och ja a'kwali, cho el jul ja sakb'eli, jach' b'ob' ja yoxil k'ak'u.

Chanil k'ak'u

¹⁴ Ti yala ja Dyosi: —Wax k'ana b'a satk'inali, oj ijlab'anuk b'a oj spil ja k'ak'u sok ja a'kwali Ja k'ak' jawi, ja oj sje' jastal oj ek'uk, ja k'ak'u, sok ja jab'il jumasa;

¹⁵ oj lijpuk ja b'a yaxal satk'inal b'a oj ya' ijlab'anuk ja lu'umi. —Ti'xta'a jach'ni waj ja—.

¹⁶ Ja Dyosi, sk'u'lan ja chab' niwak k'ak'i: ja k'ak'u ja oj ijlab'anuk ja sat k'ak'u, ja nan ixawi ja oj ijlab'anuk ja a'kwali. Cho sk'u'lani ja k'anal jumasa.

¹⁷ Ja Dyosi, ti sk'u'lan b'a satk'inal ja k'ak' jumasa it b'a oj ya' ijlab'anuk ja lu'umi,

¹⁸ ti oj ijlab'anuk b'a k'ak'u sok b'a a'kwali, ja k'ak' jawi, ja'ni b'a oj spil ja k'ik'inali. Yajni wa'n ek'el sk'ujol ja Dyos yuj ja stsamalili,

¹⁹ Och ja a'kwali, cho el jul ja sab'el k'inali. Jach' b'ob' ja schanil k'ak'u.

Sjo'il k'ak'u

²⁰ —Ti yala ja Dyosi: —Wax k'ana ja niwan paman ja' jumasa a b'ut schajnul. Wax k'ana, ja yal chan jumasa a jujpuke ek' b'a sat lu'um sok a sk'uts e' ja yaxal satk'inali.

²¹ Jach' sk'u'lan ja Dyos ja niwak schajnul jumasa ja niwan paman ja'i. Sk'u'lan tuktukil tik'e schajnul ja' b'a oj snik sb'aj ja b'a yoj ja'i, sok spetsanil ja yal chan jumasa wax jujpi. Yajni yila ja Dyos ja stsamalili,

²² ti jel tsamal ja jas yala sb'aji: —Wax k'ana, ja chay jumasa a pojxuke lek, a sb'ut' e' ja niwan paman ja' jumasa; wax k'ana, ja yal chan jumasa, a oj pojxuke lek ja b'a lu'umi—.

²³ Och ja a'kwali, cho sakb'i k'inal. Ja jawi ja sjo'il k'ak'u.

Swakil k'ak'u

²⁴ —Ti cho yala ja Dyosi: —Wax k'ana, oj ajyuk b'a lu'umi spetsanil tik'e chante jumasa: alak'il chante jumasa, chante jumasa sb'a k'u'l, b'its'il chan sok yal us jumasa—. —Ti'xta'a jach'ni waj ja—.

²⁵ Ja Dyosi, sk'u'lan ja chante jumasa sb'a k'uli, cho sk'u'lan ja alak'il chante jumasa, ja b'its'il chan sok ja yal us jumasa.

²⁶ Yajni, yila ja stsamalil ja Dyosi, ti yala'a: —Ja ya'n la jk'u'luktik ja winiki jach'ni ja jastalotik ja ke'ntiki. B'a oj stalna ja chay jumasa b'a niwan paman ja'i sok ja yal chan jumasa b'a wax jujpi', spetsanil ja chante jumasa b'a lu'umi, sok spetsanil ja b'itsb'il chan sok ja yal us jumasa—.

²⁷ Jach' sk'u'lan jastal jaw ja Dyos ja winiki jach'ni ja jastal ja Dyosi. Jach' stojb'es ja jastal ja ye'n. Sk'u'lan ja winik sok ja ixuki,

²⁸ ti yala yab' jastal ita: —Wax k'ana oj untikananik lek, wax k'ana oj pojxanik lek, wax k'ana oj ja b'ut'ex ja lu'umi sok we'n oj ja talnayex lek. Talnayik lek ja chay jumasa b'a mari, sok ja yal chan jumasa b'a wax jujpi, sok spetsanil ja chante jumasa b'a sak'an ay b'a wax b'its'ilji ek' b'a lu'umi—.

²⁹ Ti cho alji yabye yuj ja Dyosi: —Ya'n oj ch'ak ka' b'a a k'ab'ex spetsanil ja te' jumasa b'a wax ya' sb'ak'i sok spetsanil te' b'a wax ya'a sati. Spetsanil ja iti, ja oj makunuk b'a oj ja wabyex.

³⁰ Jaxa yaxal ak jumasa, ja' oj yab' ja chante jumasa—. —Ti'xta'a jach'ni waj ja—.

³¹ Ti'to wa'n ek'el sk'ujol ja Dyosi, yuj ja stsamalil ja jas sk'u'lani, och ja a'kwali, cho el jul ja sakb'eli. Jach' b'ob' ja b'a swakil k'ak'u.