Filemon 1 - Ja yab'al ja Dyosi

Spatulab'il sk'ujolal

¹ Moj aljel Filemon, jmoj jb'ajtik a'tel: Ja iti, ja wa sts'ijb'a a wi ja Pablo. Wanixa na'a leka, yuj ja lutanoni ja'yuj ja wax ka'telta ja Kajwaltik Jesusi. Ti wax jekatikon spatulab'il a k'ujol sok ja kermanotik Timoteo.

² Wax cho jekatikon spatulab'il sk'ujol spetsanil ja jmoj aljeltik jumasa ma'tik wa stsomo sb'aje b'a wa naji, jach'ni ja jmoj aljeltik Apia sok ja moj aljeltik Arquipo jmojtikoni a'tela.

³ Sok spetsanil jk'ujoltikon wax k'anatikon yi ja jTatik Dyos sok ja Kajwaltik Jesús kada k'ak'u b'ut'el a ya ajyanik sok ja syajal sk'ujol'ei, cho a ya'we laman wa k'ujoli.

Ja Pablo sk'uman ja Dyos yuj ja Filemoni

⁴ Filemon, jel wax ka'yi ts'akatal ja Dyos ja yajni wax na'awa ja yajni wa'non sk'umajeli,

⁵ Yuj ja kab' ta jel waxa yajta sok jel waxa k'u'an ja Kajwaltik Jesusi, cho jach' jel waxa yajta ja we'n jastal ja jmoj aljeltik jumasa ma yujni kwentaxa aye sok ja yuntikil ja Dyosi.

⁶ Ja we'n waxa k'u'an ja Kajwaltik jastal ja ke'ntikoni. Ja'yuj wax k'anayi ja Dyos mok a wa'kan sk'u'ajel ja ye'n man oj ch'ak a na' spetsanil ja b'a lek oj ja k'u'luki, sts'akatal ja syajal sk'ujol ja Kajwaltik Jesús wax ya'a ki'tiki.

Ja Pablo sk'ana pavor, yuj ja Onesimo

⁷ Jmoj aljel Filemon, jel gusto ayon sok jel wax k'ujolan ja wax kab' jel waxa yajta ja jmoj aljeltik jumasa, yuj ja we'n a wa' kulan sk'ujole sok we'n a stsatsal k'ujolane spetsanile ja ma' ti'xa aye sok ja yuntikil ja Dyosi.

^8-9 Ja ke'n ay xa k'ujol, cho lutanon yuj ja wax ka'telta ja Kajwaltik Jesusi. Ja ke'n wax na'a wanixa yajtayona. Ja'yuj ojni b'ob' kal awab'a, yujni ye'n ya'ojki ja ka'tel ja Kajwaltik Jesusi, ja'yuj lek wax kab' ja oj k'an a wi pavor jastal iti:

¹⁰ A'a pavor, i'a lek ja Onesimo. Ja ke'n jach' wax kila jastal jun kunin, cho ke'nani kala yab' ja yab'al ja Dyosi, a'nima lutanukon ja ke'n.

¹¹ Ja b'ajtan ja Onesimo, och a moso'il b'aya mi makuni mini jun ya'tela, jaxa ya'n jelxa xmakuni kuj ja ke'n cho jach'ni ja we'n.

¹² Ja'yuj ja ya'n oj cho jekawi otro bwelta, wax majlan oj a wi' lek, ila jastal ke'na.

¹³ Wanikex k'ana oj kan jmok b'a oj skoltayon t'unuk b'a wa lok'ol we'n yaljel ja yab'al ja Dyos ja janek' ti'to lutanon ja ke'n.

¹⁴ Mi jas oj b'ob' jk'uluk ta yuj k'a mi lek waxa wila ja we'n, b'a jach' mi oj a wal yuj oj t'en'a kechan wa xk'anawi pavor.

¹⁵ Spila sb'aj a mok cha oxe k'ak'u ja Onesimo, ja'xa ya'n yujni ti'xa oj ajyuk a mok kada k'ak'u.

¹⁶ Jasa mixa jach' oj a wil jastal jun a moso, jach' oj a wil jastal jun a moj aljel b'a jel lekxa wila a b'aj sok, ja iti, yujni jel xa leka. Ja ke'n jel wax k'ana, jaxa we'n sb'ej jel oj a k'ane. K'ana jastal jun ma' ti'xa kwenta ay sok ja yuntikil ja Kajwaltiki, mok a wil jastal jun winik kwalkyera.

¹⁷ Ta yuj k'a smeranil ja waxa k'anawon jastal jun a moj aljel ja ke'n, wax k'ana a wi pavor i'a gusto lajan sok ke'nani waxa wi'ajon leka.

¹⁸ Ay k'a jas mi lekuk sk'ulunej a wi ja Onesimo, ma yuj ay sjel a wuj, tajb'ayon ke'na, ke'n oj tup'awi.

¹⁹ Sok ja ju'un it ke'n wa'non ts'ijb'ajeli, ke'n wax kala oj ch'ak tup a wi spetsanil. A'nima ja smeranili, minike sb'ejuk oj a tajb'ayon ja ke'n, yuj spetsanil ja jas a wi'oji sok ja jastal jel gusto aya, jelalni aya jmoka.

²⁰ Jmoj aljel Filemon, ts'akataluka'a, mok a k'ul yuj ke'na, k'u'lan yuj ja syajal wa k'ujol sok ja Kajwaltiki. Ja we'n sok ja ke'n jmoj aljel jb'ajtik: —a'ki jas lamanil jk'ujol jawi.

²¹ Wax ts'ijb'an a wi ja ju'un iti, yuj ja wax na'a ojni a k'u'luki ja jas wax k'ana a'wi'a, cho ayni jas jitsan oj ja k'u'luka.

²² Jel lek ja ti wa'non lo'il a moki, wax cho jk'ana, chapaki ja b'a oj jijlukoni, jasyuj wax k'u'an yuj ja wa'nex sk'umajel ja Dyos ja we'nlexi, ojni ya elkon ja b'a lutanoni, b'a jach' oj b'ob' waj kulatayex ja we'nlexi.

Ja spatulab'il k'ujolali

²³ Ja jmoj aljeltik Epafrasi, lajan lutanotikon yuj ja ya'teltajel ja Kajwaltik Jesusi, wa sjeka jitsan spatulab'il a k'ujol.

²⁴ Cho jach'ni wa sjekawe spatulab'il a k'ujol, ja Marcosi, ja Aristarco, ja Demas sok ja Lucasi, ja ye'nle'i, jmoj jb'aj soke a'tel.

²⁵ Wax k'ana sok spetsanil jk'ujol ja syajal sk'ujol ja Kajwaltik Jesusi tix ajyi a mokex tola bida—. Jach'ni'a.