Ester 6 - Ja yab'al ja Dyosi

Ja Mardoqueo yi'aj ja smajtan a'ji yi'i

¹ Ja mandaranum ja a'kwal jawi mi b'ob' wayuk. Ja'yuj ti yala oj i'juk jan yi ja ju'un b'a ts'ijb'anub'al ja jastik ch'akta ek' b'a chonab'i, b'a oj k'umajuk ja jas niwan ek'el b'a ye'n wa'n a'teli.

² Yajni sk'umane ja jas ts'ijb'anub'ali, ti sta'awe' ja jas yalunej ja Mardoqueo yuj ja jastal lajan yujile ja Bigtan sok ja Teres b'a oj smil'e ja mandaranum Asuero,

³ ti sjob'o ja mandaranumi: —¿Ja smajtanil yi'ajta ja Mardoqueo yuj ja it b'a? ¿Jasunk'a lek a'xita yi'i? —Ti yalawe ja a'tijum jumasa: —Mini jas wax k'u'laxi yi'a, —xchiye.

⁴ Jaxa Amani, ti och b'a sti' ja niwan na'itsi, ja' wax waj sle' ja mandaranum b'a oj yal yab' a ya k'e' lokan ja Mardoqueo b'a te' it tojb'el yuji. Jaxa mandaranumi, ti job'ji yi' yuj ja: —¿Machunk'a ti wa'n b'ejyel ek' jaw b'a?

⁵ Ja a'tijum jumasa ti yalawe yab' ja mandaranum ja Amani, jaxa mandaranumi, ti yala'a: —Awik och jani.

⁶ Yajni ochta ja Amani, ti job'ji yi yuj ja mandaranumi: —¿Jasun oj ka' yi ja winik ma' wax k'ana oj toy b'a? Jaxa Amani, juts'in ek' sk'ujol yuj ja jas wa'n yaljel ja mandaranumi, yuj ye'n oj k'u'lajuk yi jachuk ja'yuj

⁷ ti yala yab'a: —Niwan mandaranum oj b'ob' a k'u'l jastal iti:

⁸ Jeka ma' oj waj yi' jan wa chompa, sok junuk wa kawu jumasa, a tojb'esjuk lek yi ja s'olomi.

⁹ Tsa'an jeka junuk wa wa'tijum b'a niwan ja ya'teli, a ya slap ja wa chompa ja winik jaw niwan mandaranum, a ya k'e' b'a wa kawu tix waj ya paxyalanuk b'a k'achinub' b'a. Ja a'tijum jawi, ti oj yal ek'a. Ja winik ma' lek wax ilji yuj ja mandaranumi, jach' wax k'u'laji yi jastal iti, oj chi'uk ek'e—

¹⁰ Jaxa mandaranumi, ti yal yab' ja Amani: —Lek ay ta jachuki, spetsanil ja jas a wala kax k'u'lan yi jachuk ja judio Mardoqueo. Kax i'ajana jchompa sok ja kawu it a wala, kax le'a b'a ya, chapa lek, mok ch'ayuk a k'ujol mini june ja jastik it a wala.

¹¹ Jaxa Amani, yi'aj ja k'u'al sok ja kawu, ya' slap ja Mardoqueo, tsa'an ti ya k'e' b'a skawu, ti waj ya b'ejyuk ek' b'a k'achinub' b'a yoj chonab', jaxa Amani, ti wa'n yaljel ek'a: —Jach' wax k'u'laji yi jastal it ja winik ma' lek wax ilji yuj ja mandaranumi—.

¹² Tsa'an ja Mardoqueo ti kumxi jan b'a wax ajyi ochel b'a niwan na'its yuj ja mandaranumi, jaxa Amani, jel cham ja sk'ujoli, ajnel waj b'a snaj jel wa'n k'ixwel, smakunej och ja sati.

¹³ Yajni k'ot b'a snaji, ti ch'ak yal yab' ja sche'um sok spetsanil ja ma'tik lek wax yila sb'aj sok ja jastik ch'ak ek'uki. Jaxa sche'umi sok ja ma'tik lek wax yila sb'aj soki, ja ma'tik je sna'awe'i, ti yalawe yab'a: —Ja Mardoqueo judio mok ek' a k'ujol yuj oj ja wil sk'ujol. Ja' iti wantox och k'e'uk sok iljita ni a k'ujola—.

¹⁴ Ti'toni wane' lo'il ja yajni k'ot ja ya'tijum jumasa ja mandaranumi, waj yi'e ja Aman b'a oj wajuke b'a wa'el chapan yuj ja ixawalal Esteri.