Ester 5 - Ja yab'al ja Dyosi

Ja Esteri jak sje' sb'aj yi ja mandaranumi

¹ Ek' oxe k'ak'u, ja ixawalal Esteri, slapa ja sk'u' sjuna b'a ixawalalili. Ti waj b'a wax ajyi ochel b'a niwan na'its b'a'y ja mandaranumi, ti k'ot tek'an b'a sti' sat.

² Jaxa mandaranumi, yajni yila ja Esteri, jel tsamalaxi yab'i, ti slika ja snab'ante' yaman yuj it toj k'anal tak'ini. Jaxa Esteri och mojan syama yi ja sni' snajb'ante'i.

³ Ti job'ji yi yuj ja mandaranumi: —¿Jasun waxa k'ana Ester? ¿Ja jas oj ja k'an ki'i, oj ka' wi'? —A'nima ja'uk snalan b'a wa'non a'teli ojni ka'wi ta yuj k'a ja' waxa k'ana ki'i—.

⁴ Ti yala ja Esteri: —Niwan mandaranum, jchapunej a wi jun wa'el. Yuj k'a lekxa wab'i, cho loko ja Amani.

⁵ Jaxa mandaranumi, ti yal yab' ja ya'tijum jumasa: —Kax payawik ja Amani, oj wajkotikon ja b'a wa'el chapan yuj ja ixawalal Esteri. Jachuk ja mandaranum sok ja Amani, wajye b'a wa'el jawi.

⁶ Yajni wane'xa yu'jel ja pajal yalel tsutsub' ja mandaranumi, ti sjob'o yi' ja Esteri: —¿Jasun waxa k'ana b'a? K'anaki, ja jas waxa k'ana. A'nima ja snalan b'a wala a'tijiyoni, oj ka'wi'.

^7-8 Ti yala ja Esteri: —Yuj k'a lek waxa wila ja jas wa'non sk'u'lajel niwan mandaranum ta lek k'a waxa wila oj k'ot smeranil ja jas wax k'ana, wax k'ana oj cho jlok ex pilan wa'el ja we'n sok ja Aman ja jecheli, ti oj kala wab' tiw ja jas wax k'ana.

Ja Amani, tajkel lek yuj ja Mardoqueo

⁹ Ja k'ak'u jaw ja Amani jel tsamal yab' ja oj wajuk b'a wa'el jawi. Jasa, yajni och ja b'a wax ajyi ochel b'a niwan na'itsi, ti yila mix k'e' tek'an ja Mardoqueo, cho mini t'un snika sb'aj ja jel tajki ja Amani.

¹⁰ Jasa, mi sje'a ta yuj tajki, kechan ti'xta ela, waj b'a snaj sjeka spayjel ja ma'tik lek xyila sb'aj sok ja sche'um Zeresi.

¹¹ Ti och yal jastal jel ja jastik sb'aji, jaye ja yuntikili, spetsanil ja jastal jel wax yajtaji yuj ja mandaranumi, jastal a'ji schol b'a oj yal yab' jas oj sk'u'luk ja a'tijum jumasa, sok ja skoltanum jumasa ja mandaranumi.

¹² Tsa'an ti cho yala'a: —Jaxa ixawalal Esteri, kechan ja' sloko wa'el ja mandaranum sok ja ke'n, mi kechanuka ja jecheli, cho slokowotikon b'a pilan wa'el.

¹³ Jaxa stsamalil jk'ujoli, wax ch'ak ja yajni wax kila ti kulan k'ot b'a wax ajyi ochel b'a niwan na'its ja tan judio Mardoqueo.

¹⁴ Ti alji yab' yuj ja sche'um Zeres sok ja ma'tik lek xyila sb'aj soki: —Jeka tojb'esnum jun te' b'a ti oj wa el jorka tiwi, jun te' b'a ay set b'a jun tajb'e sok chab' (22) metro ja snajtili. Sajto lek ja sab'eli, al yab' ja mandaranum a ya' k'e' lokan tiw ja Mardoqueo. B'a jach' lek sok tsamal oj wa'an sok ja mandaranuma. Ja jastal alji yab' ja Amani, jel tsamal yab'i, ja'yuj sjekani k'u'luman ja te' jawa.