Ester 4 - Ja yab'al ja Dyosi

Ja scham k'ujol yuj ja judio jumasa

¹ Yajni yab' ja Mardoqueo spetsanil ja jas ch'akta ek'uki, ti sch'i'a ja sk'u' yuj ja scham k'ujoli, ti slapa jun skoton k'u'lub'al sok stso'otsil chivo, stika yi' sts'ub'il ta'an ja s'olomi, ti och tsatsal ok' ek' b'a yoj chonab'i.

² K'ot man b'a wax ajyi ochel b'a niwan na'its yuj ja mandaranumi, mi ochi, yuj ja mi sb'ejuk ja jastal lapan yuj ja sk'u'i.

³ Yajni ch'ak yabye ja tuktukil chonab' jumasa ja jas spukuta ek' ja mandaranumi, spetsanil ja judio jumasa jel cham sk'ujol'e. Mix wa'ye', jel ok' ye, ja b'a wax waye'i, stikawe ta'an, ja sk'u' lapan yujile'i, jach' jastal koton.

Ja Mardoqueo sk'ana skoltajel sok ja Esteri

⁴ Yajni yabye ja ya'tijum ixuk sok ja ma'tik wax talnaji yuj ja ixawalal Esteri, ti yalwe yab' ja jas wa'n ek'eli, jach'ni ja ye'n jel cham sk'ujol, ja'yuj ti sjeka yi' sk'u swex ja Mardoqueo b'a jach' ojxa ya el kan ja skoton lapan yuji, jaxa ye'n mi skisa.

⁵ Ti'xta ja Esteri, spaya ja Hatac ja june ja ya'tijum ja mandaranumi, ye'n jekub'al b'a oj a'tijuk sok ja Esteri, ti sjeka b'a oj waj sjob' yi ja Mardoqueo jas yuj jach' ayi.

⁶ Jaxa Hataki, waj man k'achinub' b'a mojan wax ajyi ochel b'a niwan na'itsi, ti sjob'o yi tiw ja Mardoqueo

⁷ Mardoqueo, jasyuj ja jach' aya. Ti alji yab' yuj ja Mardoqueo, ja Amani, yalata oj ya' och jitsan tak'in b'a wa snolo stak'in ja mandaranumi, ja' b'i wa'n stupjel b'a oj ch'ak smil spetsanil ja judio jumasa.

⁸ Mi kechanuka, ya'a jun skopia'il ja ju'un it pukxi b'a chonab' Susa, ja b'a ju'un jawi, jani wax yala oj ch'ay sna'jel spetsanil ja judio jumasa'a, ab'i a'juk yi ja ixawalal Esteri, b'a jach' b'i oj ch'ak sna' jastal ay ja ye'n, jaxa Mardoqueo cho sk'ana a wajuk ja ixawalal Ester a waj sk'umuk ja mandaranumi, b'a oj yal yab' mok sch'ay sna'jel ja judio jumasa.

⁹ Ti'xa waj ja Hataki, ch'ak waj yal yab' spetsanil ja Ester ja jas alji yab' yuj ja Mardoqueo.

¹⁰ Jaxa Esteri, cho sjeka pilan majke ja Hatac b'a oj waj yal yab' jastal it ja Mardoqueo:

¹¹ —Ja k'ak'u jawi ayxa jun tajb'e sok lajune k'ak'u (30) me sjeka jpayjel. Spetsanil ja ya'tijum ja mandaranum sok spetsanil ja kristyano jumasa b'a chonab' iti, wani sna'awe' mi ma' oj b'ob' ochuk ja b'a sti ja niwan na'itsa, ta yuj k'a mi payub'aluki, yuj k'a ay ma waj ochuki, yujni sb'a oj miljuk ja kristyano jawa. Kechan ta slika k'a ja snajb'ante' it toj k'anal tak'ini, oj ni sta' skoltajela, —xchi ja Esteri.

¹² Yajni yab' ja Mardoqueo ja jas wax alji yab' yuj ja Esteri,

¹³ ti cho yala ja ye'n: —Ja we'n mi oj ja kolta a b'aj kechan yuj ja ti aya b'a niwan na'its jawi.

¹⁴ Yuj k'a ch'ab'anxta oj ajyan ja we'n ja k'ak'u jumasa iti, ja ma oj koltajuk yuj ja judio jumasa tuk b'a oj jakuka, jaxa we'n sok ja wa moj alijel jumasa ojni ch'ak chamanika. —Ja ke'n wax k'u'an yuj ja ochya ixawalalili, ja b'a oj ja kolta sok ja swokol ja wa moj jumasa—.

Ja Esteri, yala oj koltanuk

¹⁵ Ja'yuj ja Esteri, sjeka yaljel yab' ja Mardoqueo:

¹⁶ —Tsomo spetsanil ja judio jumasa ma' tey b'a Susa, komo wa wa'elex yuj ja ke'n, mok wa'anik mok a wu'ex ja' b'a yojol oxe k'ak'u. Cho jach'ni ja ke'n sok ja ka'tijum ixuk jumasa, oj cho jkom ja jwa'eltikoni. Tsa'an ti oj ochkon ja b'a'y ja mandaranumi, a'nima mi jach' wax yala ja mandaranumi. Yuk k'a ja' ti oj chamkona, ti la chamyona—.

¹⁷ Jaxa Mardoqueo, ti waj ja waj sk'u'l spetsanil ja jas alji yab' yuj ja Esteri.