Ester 3 - Ja yab'al ja Dyosi

Ja Mardoqueo sok ja Amani

¹ Tsa'an ja mandaranum Asuero ya' k'e' yi ja ya'tel ja Aman yuj ja tuk ma'tik ay ya'teli ja Aman yunin ja Hamedata, ja yintil ja Agag.

² Mi kechanuka, ja mandaranumi, yal yab' spetsanil ja ya'tijum jumasa, ab'i ko'uke mek'an a snujts'uk ja s'olome b'a stojol b'a'y ja Amani, b'a jach' wa sje'awe yuj wa skisawe. Jaxa Mardoqueo mi ko' mek'an sok mi snujts'in ja s'olomi,

³ Ja'yuj, ja a'tijum jumasa b'a niwan na'its b'a'y ja mandaranumi, sjob'owe yi ja Mardoqueo, jasyuj ja mi sk'u'an ja jas yala ja mandaranumi.

⁴ Jitsan majke sjob'owe yi, jaxa ye'n mini t'un skisa'a. Tsa'an ek' chab' oxe k'ak'u, ti yalawe yab' ja Amani. Jaxa ye'n wa sk'ana oj smakla ta meran jach' wax yala ja Mardoqueo ja jastal ch'akta aljuk yab'i; yuj ja lom mi sk'u'an ja ab'al jawi, ja'yuj ja judio ja ye'n.

⁵ Yajni yab' ja Aman mix ko' mek'an ja Mardoqueo, cho mi snujts'in ja s'olom b'a stojol ay ja ye'ni, jel tajki.

⁶ Yajni yab' yuj judio ja Mardoqueo, ja'yuj yala oj ya' yi' wokol, sok oj sch'ak sna'jel spetsanil ja judio jumasa ma' tey b'a wa'n a'tel ja Asuero.

Ja Amani, ya yab' sb'ej ja mandaranumi

⁷ Ja mandaranum Asuero ayxa lajchawe jab'il mandaranum ay ja yajni k'ot ja yixawil Abib, ja Aman ja jab'il jawi, sk'ele ja sk'ak'u'il oj ko' sb'a oj sk'u'luk ja jas chapan yuji, waj yile ja ko' sb'a ja ixaw Adari.

⁸ Ja'yuj ja Amani, yal yab' ja mandaranum Asuero: —Mandaranum, b'a wa wa'teli, ay ma' tuk yintile. B'a spetsanil ja b'a' ye ek'i, yujni t'ilan ay june'a. Tuk ja jastal kulan yujile wa sk'u'lan ja ye'nle'i, ja'yuj mi sk'u'ane ja jas waxa wala niwan mandaranum. Mi lekuk ja ti oj ajyuke jmoktik b'a wala a'tiji ja we'n.

⁹ Yuj k'a lek waxa wila we'n mandaranum, ala we'n a ch'ay sna'jel spetsanile, Jaxa ke'n oj ka' oxe syen jun tajb'e sok lajune mil (330,000) kilo toj sakal tak'in. Ja' oj ka' yi ja ma' wa stsomo ja tak'in sb'a mandaranumi.

¹⁰ Jaxa mandaranumi, ya' eluk ja yaniyo b'a sk'ab'i, ya' yi' ja Aman ma' mi lek wax yila sb'aj sok ja judio jumasa,

¹¹ ti yal yab'a: —Ja tak'in waxa k'apa, i'aj kan we'na, awik makunuk sok ja kristyano jumasa b'a jas lek waxa wila ja we'nlexi.

Ja jastal oj chay sna'jel ja judio jumasa

^12-13 Ja k'ak'u ox lajune yajtab' ja ixaw Abib, ja mandaranumi spaya spetsanil ja ts'ijb'anum jumasa b'a oj sts'ijb'ane spetsanil ja jas wa sk'ana oj sk'u'luk ja Amani, yuj ja oj ch'ak sjek e' yi ja ya'tijum ja mandaranum jumasa b'a tuktukil chonab' sok spetsanil ja ma'tik niwak ya'tel b'a niwak chonab' jumasa. Ja ju'un jumasa iti, ch'ak sjek e' b'a jujune chonab' jani jastal wax k'umani ye'a, sk'u'lunej pirmar sok sk'u'lunej seyar ja mandaranumi. Ja jas sk'u'lane'i, wax yala b'a yajtab' ox lajune ja yixawil Adar, oj ch'ay sna'jel spetsanil ja judio jumasa. Ja k'ak'u jawi oj ch'ak miljuk spetsanil ja judio jumasa, untik jumasa winik ma'tik ayxa sk'ujol, ixuke, yal untik, mi kechanuka, oj ch'ak japjuk yi'e spetsanil ja jasti sb'aje'i.

¹⁴ Ja trato iti, ch'ak a'ji sna' spetsanil ja chonab' jumasa b'a ye'n wa'n ya'teltajel ja mandaranumi, cho ya'we el jitsan skopia'il ja ju'un b'a jach' chapan oj ajyuke ja kristyano ja k'ak'u jawi.

¹⁵ Ja junxta trato iti, tsa'anto alxi b'a niwan chonab' Susa. Ja ma'tik waj ya'we kan ek' ja ju'un jumasa, juts'in ch'ak pukxuk, yajni yabye ja swinkil ja chonab' jumasa toj jomel olom ch'ak kanuke. Jaxa mandaranum sok ja Amani, ochye kulan yu'jel pajal ya'lel ts'usub'.