Ester 1 - Ja yab'al ja Dyosi

Ja niwan k'in sb'a mandaranum Asuero

^1-3 Jach' ek' ja k'ak'u jumasa sb'a mandaranum Asuero b'a Persia, ma' ay ya'tel b'a India sok man b'a Etiopia ay jun syen jun tajb'e sok juke (127) chonab' jumasa, ja sniwanil ja chonab' b'a a'tiji, sb'i'il Susa. B'a yoxil jab'il mandaranum ayi schapa jun niwan k'in sb'a spetsanil ja ma'tik ay ya'tel b'a niwan chonab'i. Cho sloko ja ma'tik niwak ya'tel yuj ja soldado jumasa b'a Persia, b'a Medo sok ja ma'tik ay ya'tel mandaranum jumasa b'a tuktukil chonab'i.

⁴ B'a yojol wake ixaw wa'n sje'jel jan jastal jel ja jastik sb'aj sok jastal jel niwan ja yip ja mandaranumi.

⁵ Tsa'an cho yala ab'i chapxuk pilan k'in sb'a spetsanil ja ma'tik ti' ajyi ye b'a chonab' Susa, man ma' niwak ya'tel cho jach'ni ja ma' mey ya'teli. Ja k'ini, ti ajyi b'a yoj nichim b'a niwan na'its juke k'ak'u alb'i ja k'ini.

⁶ B'a niwak syojyal marmoli, ti och lib'an jun k'u'uts sak sok ya'ax smochowe sok ak' b'a jel lek ja yelawi, ch'aktik ochel jun sakal tak'in, ya'we och kujlayub' toj k'anal tak'in, sok sak b'a wax b'atxi sakal marmol sok k'ik'tik.

⁷ Ya'we ek' jitsan pajal ya'lel ts'usub', ja mandaranumi yujni jel leka. Ja b'is jumasa b'a ya'we ek'uk ja ya'lel ts'usub'i, toj k'anal tak'in, ja b'a jujune'i, tsamal lek tojb'el.

⁸ Jasa, yala ja mandaranum, mok b'i ma' t'injuk t'ilan b'a oj yu', jujune wa sna'a janek' wa sk'ana oj yu'.

⁹ Jaxa ixawalal Vasti cho sk'u'lan jun k'in ja ye'n b'a sti' ja niwan na'its b'a'y ja mandaranum Asuero stsomo spetsanil ja ixuk jumasa b'a k'in jawi, ja sb'a ixuke jumasa, it slokoneji.

Ja ixawalal Vasti sk'oko ja jas yala ja mandaranumi

¹⁰ B'a sjukil k'ak'u ja k'ini, jel tsamal ay ja yaltsil ja mandaranum yuj ja wa'n yu'jeli, ti sjeka spayjel juke ja ma' ay sniwanil sk'ujol soki: Ja b'ajtani, Mehuman, Bizta, Harbona, Bigta, Abagta, Zetar sok Carcas,

^11-12 Yal yabye ab'i waj sle'e jan ja ixawalal Vasti. Yal yabye ja ye'n jel t'ilan oj jak wa'n lijpel ja skorona b'a ixawalalili, b'a jach' oj yil'e ja stsamalil ja kristyano sok ja ma'tik niwak ya'teli, yujni jel tsamala. Jasa, ja ye'n mi sk'u'an ja jas yala ja mandaranum. Yajni yab' ja mandaranum ja jastal iti, jel tajki

¹³ ti sjob'o yi' jas oj sk'u'luk ja ma'tik wa sna'awe lek jastal kulan yujile'i, yujni jach' k'ajyel wa sjob'o yi ja ma'tik wa sna'awe leka,

¹⁴ ja ma'tik wax koltaji lek yuji, ja Carsena, ja Setari, ja Admata, ja Tarsisi, ja Meresi, ja Marsena, sok ja Memucani; ja jukwane winik iti, ay niwak ya'tele b'a Persia sok b'a Medo. Ay lek niwan ya'tele sok ja mandaranum b'a niwan chonab'i.

¹⁵ Ja'yuj ja mandaranumi ti sjob'o yi'e'a: —Ja ixawalal Vasti, mi sk'u'an ja jastik kala. Sok ja jastal wax yala b'a ts'ijb'anub'ali, ¿Jas oj k'u'luktik yi' ja ye'n b'a?

¹⁶ Jaxa Memucani, ti yal yab' ja mandaranum sok ja tuk ma'tik wa stojowe lo'ili: —Ja ixawalal Vasti, mi kechan ja sta'a smul sok mandaranumi, cho jach'ni sok spetsanil ja tatal jumasa jach'ni sok spetsanil ja swinkil ja chonab'i.

^17-18 Yajnix waj yabye ja ixuke jumasa sb'a Persia sok sb'a medo ja jas k'u'lan ja ixawalali, mini oj cho skis ja statam ye'nle'a. Ya'n oj ch'ak yalwe yab' ja statame ja ixuke jumasa ja jas sk'u'lan ja ixawalal Vasti, jel oj jta'tik ab'al k'umal soke.

¹⁹ Yuj k'a lek waxa wila niwan mandaranum ala yuj mixa ixawalaluk ja Vasti, jaxa jas oj ja wali, jach' oj sk'u'uke b'a Persia sok b'a Medo, b'a jach' mi ma' oj stukb'es ja jas oj yali. Tsa'a we'n junuk ja ma' lek waxa wila sb'a ixawalalili.

²⁰ Yajnix waj sna'e ja jas oj ja wal ja kristyano jumasa b'a chonab' iti, spetsanil ja ixuke'i, jel oj skis ja statame'i, a'nima ay ma mey ja sb'aj.

²¹ Ja mandaranum sok ja ma'tik wa stojowe lo'ili, jel lek yabye ja lo'il iti. Ja'yuj ja mandaranumi, ti

²² sjeka ju'un b'a spetsanil ja chonab' jumasa. Ja ju'un jumasa jach' ts'ijb'axi, ja jastal wax k'umaniye b'a jujune chonab'i, ti yala'a spetsanil ja tatamal jumasa a yal yab' toj ja jas oj sk'u'luk ja swinkil snaji, cho jach'ni ja b'a yoj snaje'i, jani oj yal'e ja jastal ja sk'umale'a.