Esdras 1 - Ja yab'al ja Dyosi

Ja Ciro lek yila ja oj kumxuk ja judio jumasa

^1-4 Ja sb'ajtanil jab'il och ya'tel b'a Persia ja Ciro, ja mandaranum iti, jach' yal yab' jastal it spetsanil ja kristyano jumasa b'a wa'n a'teli: —Ja Dyos b'a satk'inali, ye'n sb'aj spetsanil ja jastik jumasa, ye'n ya och kon mandaranumil b'a spetsanil ja niwak chonab' jumasa, cho yal kab' oj tojb'es jun snajtsil tsomjel b'a chonab' Jerusalen b'a sts'e'el ja slujmal Juda. Ja'yuj a petsanilex ja ma' ti ayex b'a chonab' Juda, ta wan k'axa k'ana oj ja tojb'esex ja snajtsil tsomjeli, oj kala wabyex oj wajanik b'a Jerusalen. Ja Dyos yuj ja israelenio yujni ti wax ajyi tiwa, ojni cho skoltayexa. —Spetsanil ja ma' wa sk'ana oj waj a'tel b'a stojb'esjel ja snajtsil tsomjel b'a Jerusaleni, ojni koltajuk sok tak'in yuj ja ma'tik mojan yi'oj sb'aj soki, oj cho koltajuke sok ja jas oj yabye'i, oj a'juk yi swakaxe. Jaxa b'a snaj ja Dyosi, ay jas oj cho k'eb'juk yi'e. Ja Ciro, ye'n mandaranum ja b'a chonab' Persia. Sok ja jastal iti, k'ot smeranil ja jas alji yab' ja aluman Dyos Jeremias yuj ja Dyosi.

⁵ Yajni ch'ak yabye ja jastal it ja tatal jumasa b'a k'ole sb'a Juda sok sb'a Benjamini, sneb'awe yujni Dyos wax k'anjiye yuj b'a oj wajuke ja stojb'esjel ja snajtsil ja tsomjel b'a Jerusalena. Cho jach'ni sneb'awe jastal jaw ja pagre jumasa, ja skoltanume'i, sok jitsan ja judio jumasa jach' sneb'awe jastal jawi.

⁶ Spetsanile ja ma'tik mojan yi'oj sb'aje soki, a'jiyi'e niwak ye'tal b'a toj k'anal tak'in, b'a toj sakal tak'in, jastik oj yabye, swakaxe, a'jiyi'e jitsan tuk jastik jumasa b'a ay lek sts'akol, jel jitsan ja jas k'eb'ji yi'e'i.

^7-8 Jaxa ye'n ja mandaranum Ciro, yal yab' ja Mitridates nolo tak'ini, a ya kumxuk yi ja judio jumasa ja jastik wax makuni b'a snajtsil stsomjel ja Dyosi. Ja jastik jumasa iti, ye'n ch'ak ya eluk ja mandaranum Nabucodonosori, ti ch'ak yi'och b'a snaj ja dyos jumasa sb'aj ye'n. Jaxa Mitridatesi, ch'ak schap spetsanil ja jastik jumasa iti, ti'xa ya'yi b'a sk'ab' ja Sesbasar mandaranum b'a Juda.

^9-10 Ja jastik jumasa b'a ya'we kumxuki, ja it jumasa: 30 niwak tasa toj k'anal tak'in, 1,000 niwan tasa toj sakal tak'in, 29 kuchilu, 30 ch'in tasa toj k'anal tak'in, 410 tasa b'a toj sakal tak'in jun ita schol spetsanil, sok ay jitsan jastik b'a wax makuni'i.

¹¹ Ja spetsanil ja jastik b'a ya kumxuk ja nolo tak'ini, ay jo'e mil sok chane syen (5,400) jastik b'a toj k'anal tak'in sok b'a toj sakal tak'in. Spetsanil ja jastik jumasa iti, ti ch'ak yi' b'a Jerusalen ja Sesbasar ja yajni kumxi sok ja judio jumasa, jitsan jab'il ti i'ji och b'a niwan chonab' b'a Babilonia.