Daniel 1 - Ja yab'al ja Dyosi

Ja jastal ek' yuj ja Danieli ( 1—6 ) Stuluyi ja jas ek'i

^1-2 Ja mandaranum Nabucodonosor b'a Babilonia k'ot ja b'a chonab' Jerusalen sok jas soldado jumasa b'a oj sb'ajuk ja chonab'i, jaxa Dyosi ya'a k'ab'al oj i'juk lutan ja mandaranum Joacini sok jitsan israelenio, ti oj i'juke b'a Babilonia. Cho jach'ni cho ya'a k'ab'al ja Dyos b'a oj yi' jitsan ja jastik junuk wax makuni ja b'a snajtsil tsomjel b'a Jerusaleni. Ja Nabucodonosori yi'aj ti ya sta' sb'aj sok jas tak'in it tey b'a snajtsil ja sk'u'lub'al dyos jumasa. Ja yajni ek' ja iti, ja Joacini ay xa oxe jab'il wan yajel yab'al sok ja Juda.

^3-5 Ja mandaranum Nabucodonosori wa sk'ana oj yi b'a ya'tijum winik b'a keremto b'a lek yiljel, mini jun syajb'el aya; mi kechanuka t'ilan oj sna' b'a spetsanil. Ja'yujil ya'a ja smandari ja b'a ma'tik lutan preso ja israelenio jumasa, a yi'e och ja keremtik jumasa ma'tik untikto b'a mas was na'awe' yuj ja tuk jumasa ja b'a jel lek ja tsome smoj alijel sb'aje'i. B'a yojol oxe jab'il, ja keremtik jumasa jawi, ja oj yabye sok oj yu'e ja jastal jun xta wax yab' ja mandaranumi; mi kechanuka cho ti oj sneb'e ju'un, sok oj sneb'e' ja sk'umal sok jas jastale ja babilonio jumasa. Yajnix ek' ja k'ak'u jawi, ye'n oj ochuke b'a oj ya'tel taye ja b'a niwan na'its ja mandaranumi. Jaxa Aspenaz, ja ma olomal ay yujile ja ma'tik wax a'tijiye b'a niwan na'its, ye'n ay b'a xchol b'a oj ch'ak sk'u'luk ja jas wax yala ja mandaranumi.

Ja Daniel sok ja yamigo jumasa b'a sniwan snaj ja mandaranumi

⁶ Ja b'a janek' i'jiye och ja b'a sniwan snaj ja mandaranumi tey chane keremtik b'a k'ole sb'a Juda. Ja sb'i'ile'i Daniel, Ananias, Misael sok Azarias,

⁷ jayuj ja ma' jel niwan ja ya'tel yujile ja ma'tik wax a'tijiye' b'a niwan na'its stukb'es ja sb'i'ile'i. Ja Danieli ya sb'i'iluk Beltsasar, ja Ananiasi ya sb'i'iluk Sadrak, ja Misaeli ya sb'i'iluk Mesac, jaxa Azariasi ya sb'i'iluk Abed-nego.

⁸ Ja Danieli sneb'a mi oj yu'e sok mi oj yabye ja jastal jun xta oj yab' ja mandaranumi, yuj ja b'a ye'ni juni mulala wax yab'a. Ja'yujil sk'anayi ja Aspenazi mok st'en t'ilan b'a oj sle' smul ja ye'n sok ja matik lek wa xyi'a sb'a soki, b'a mi oj yabye ja jastik junuk jumasa jawi.

⁹ A'nima ja Dyosi sk'ulunej ja Daniel oj yi lek ja Aspenazi,

¹⁰ Jaxa ja Aspenazi ti yala'a: Ja mandaranumi yalata ja jas oj ja wabyex sok ja jas oj ja wu'exi. Jaxa ke'n wani la xiwyon yuj. Ta wajk'ax yila ja jawa satex jel kistal ay, jaxa tuk keremtik jumasa lek aye', oj sjek ma oj smil'on. Ja jastal jawi we'ni oj ja mulukexa—.

¹¹ Ja'yuj ja Danieli waj sk'umuk ja ma wax talnaji yuj ja ye'n sok ja matik wa xyi'ab'a soki, ti yala yab'a:

¹² Ja ke'ntikoni wanix ch'ak k'u'uktikon ja jas waxa wala'a. Ja ke'n wax k'ana awi b'a we'n i'ajotikon jastal oj ja k'ulukotikon preba b'a yojol lajune k'ak'u. B'a yojol ja k'ak'u jumasa jawi, kechan oj kab'tikon itaj, sok a ku'tikon ja'.

¹³ Yajnix ek' ja lajune k'ak'u'i, tix wa slaj ja satikon sok ja keremtik jumasa wax yakb'iye ja jastik wax yab' ja mandaranumi. Jachuk oj b'ob' a k'uluk ki'tikon jastal waxa wila lek ja we'n—.

^14-15 Jaxa ma wax talnani lek yi'aj ja jastal sk'ana ja Danieli, yajni ek' ja lajune k'ak'u ja Daniel sok ja matik wa xyi'ab'a soki jel lek aye' sok tsats aye' ja ye'nle yuj ja keremtik jumasa ma'tik wax ch'ak yab' ja jas wax yab' ja Mandaranumi.

¹⁶ Ja'yuj ja ma wax talnaji yuj ja ye'nle'i mixa wax a'ji yi'ile ya'al ts'usub' sok ja wa'el it t'ilan wax a'ji yabye sok oj yu'e'i, ja b'a jawi wax aji yabye itaj.

¹⁷ Ja chane keremtik iti a'jiyi'le yuj ja Dyos jitsan sneb'jel jastal jel oj sna'e b'a oj yabye sb'ej spetsanil tik'e ju'un b'a jel oj sna'e. Mi kechanuk ja jawi ja Danieli wax b'ob' sna' jasun wa sk'ana yal ja wayichal jumasa sok jun naj satinel.

¹⁸ Yajni k'ot ja k'ak'u jumasa janek' yalunej ja mandaranumi, ja Aspenazi ti yi'aj och ja keremtik jumasa jaw b'a sti sat ja mandaranum Nabucodonosori.

¹⁹ Jaxa mandaranumi och lo'lanuk sok spetsanil ja keremtik jumasa, jayuj mini jun sta'a ja b'a ye'nle jastal ja Daniel jel sna'a sok jastal ja matik wa xyi'ab'a sok ja Ananiasi, ja Misaeli sok ja Azariasi. Ja'yuj schanwanile ja ye'nle'i kanye b'a oj a'tijuk soke ja Mandaranumi,

²⁰ wa sk'u'lane spetsanil ja jas wax yala ja Mandaranumi, sok wa sk'u'lane lek ja ye'nle sok jel sna'awe yuj spetsanil ja ma'tik jel sna'a sok ja k'intanum jumasa it ti lajan aye' b'a wa xya'a yab'al ja mandaranumi.

²¹ Jach' waj jastal jaw ja ti kan b'a Babilonia ja Danieli man ek' jun jab'il ja k'ot ja mandaranum Ciro b'a Persia.