Cantares 1 - Ja yab'al ja Dyosi

¹ Ja ts'eb'oj it ja jel tsamal sb'a Salomoni.

Sb'ajtanil ts'eb'oj Makb'en ixuk

² —We'nani jex k'anawa, jex k'ana oj ja wujts'ukon— Jex k'ana we'n oj ja chikiltayon, yuj ja oj ku' ya'lel ts'usub'i;

³ Jex k'ana oj kab' lek yik'il wa perjume jumasa. Ja jawi, we'nani'a: —jun perjume b'a jel lek— —Ja ya'n jakta jk'ujol jasyuj ja je sk'anawa ja ixuke jumasa—

⁴ —Wajtik nutsa b'aj i'ajon we'na— —I'ajonxa b'a wa naj jumasa, we'n swinkila ja jsak'anili— Yuj ja we'n oj k'u'ltik k'in yuj ja we'n jel tsamal oj ajyukotikon; oj ch'ay jk'ujoltik ja ya'lel ts'usub'i sok jel tsamal oj kab' ja oj ja mastala'ukoni. —Ja ya'n jakta jk'ujol jasyuj ja je sk'anawa ja ixuke jumasa—

⁵ —Ixuke jumasa b'a Jerusalen— ja ke'n k'ik' jb'ak'tel, jach' jastal ja na'its jumasa k'u'lub'al sok k'u'uts b'a Quedari. Sok jelni tsamalon jastal ja skortina jumasa ja Salomoni.

⁶ Mok a k'el'ex ja lom k'ik' ja jts'ujmili, yuj ja stsikaki ja k'ak'u. Ja jmoj alijel jumasa jel tajkiye jmok st'enawone oj talna ja ste'il sts'usub'e'i, —jach' mi b'ob' jtalna ste'il jts'usub' ke'n—

⁷ Ala kab'i, ja ke'n yujni jex k'anawa'a ¿b'a waxa wa'kan wa chej jumasa b'a? Ja nalan k'ak'u yajni wala way t'usani, ¿b'a wax wa jijluk a b'a'a? B'a jach' mi lom oj ochkon ek' b'ejyel jastal jun ma' mi sna'a b'a oj wajuka; —Me'y sb'ej ti oj waj le'a ek' b'a yoj schej ja ma'tik lekxa wila b'aj soki—

Ja talna chej jumasa

⁸ Kechan ta yuj mixa na'a ixuk tsamal b'a yojol ja ixuke tsamal jumasa nocho b'a ek' ja yok ja chej jumasa kax a wa'uk wa yal chivo jumasa b'a snaje k'u'lub'al sok k'u'uts ja talna chej jumasa.

Ja makb'en winiki

⁹ Ja we'n jex k'anawa, ja wa b'ejyeli, jastal wax cha'ni wax b'ejyi ja nan kawu jumasa wa sts'a'a k'e sb'aj b'a skarro ja mandaranumi.

¹⁰ —Jel tsamal wax ilxi wa choj jumasa b'a snalan ja sch'itulab'il wa olomi— jel tsamal wa sje'a sb'aj wa nuk'i sok wa wuj jumasa—

¹¹ —Oj k'eb' a wi tuk ujal jumasa b'a toj k'anal tak'in, b'a cho ochel sok sakal tak'in—

Ja makb'en ixuki

¹² Yajnix och kulan ja mandaranumi ti' oj eluk ja yik'il ja jperjume'a.

¹³ Ja ma' jex k'ana jb'ajni ke'na'a jach' jastal ja yal k'u'al ay lek yik'il ti ki'oj b'a sni' jk'ujoli.

¹⁴ Ja we'n jb'ajani ke'na'a jach' jastal ja yal k'ab' nichim jumasa b'a alajaltik b'a En-gadi.

Ja makb'en ixuki

¹⁵ —Ja we'n jel tsamala jex k'anawa; jelni tsamala'a— —Ja wa sati lajan sok chab' k'anal—

Ja makb'en ixuki

¹⁶ —Ja we'n jel tsamala sok jex k'anawa— —Ja we'n jun winik jel tsamala— Yajni la nupanitiki yaxal k'ul oj waynub'uktik,

Schawanile ja makb'enali

¹⁷ b'a yaxub'il ja segro jumasa ti oj k'u'ltik tiw ja jsojtiki.