Apocalipsis 1 - Ja yab'al ja Dyosi

Slekil jumasa

^1-2 Ja Dyosi, sje'a yi ja Kajwaltik Jesús ja jas jelxa mojan oj ek'uki, b'a jach' ye'nxa oj sje'yi ja ya'tijum jumasa. Ja'yuj ja Kajwaltik Jesusi yala ojxa aljuk yab' yuj jun anjel ja Juan ya'tijumi; jaxa Juani spetsanil ja jas sts'ijb'a smeranil.

³ —Jel lek oj iljuk yuj ja Dyos ja ma' oj sk'umuk ja ab'al it b'a sti' sat jitsan kristyano jumasa. Cho jach'ni jel lek oj iljuk ja ma' oj smakla sok ja ma' oj sk'u'uki. Jakumxa ja k'ak'u oj k'ot smeranil ja jas yala jan ja Dyos b'a ju'un iti—

Spatulab'il k'ujolal

^4-5 Ja ke'n Juan jb'i'il, wax jeka spatulab'il sk'ujole ja juk k'ole jmoj alijeltik jumasa, ja iti, ti aye b'a slujmal jumasa b'a Asia, ja Dyosi, ye'n ja sak'an leki ye'n ja ma' ti'ni ay jani, cho ye'n ja ma' jelxa mojan oj jakuki. Wax k'ana yi ja Dyos sok ja Kajwaltik Jesusi, sok ja jukwane ma' ik' ason aye ek'i it ti aye b'a kulan k'ot ja Dyosi, a syajtanex sok a ya'wex laman. Oj ka'tik lek sniwanil jk'ujoltik ja Kajwaltik Jesusi wani syajtayotika, sok wax yala ja smeranil sb'a Dyosi. Ye'n ja b'ajtan sak'wi'i, cho ye'n ja jel niwan ja ya'tel yuj spetsanil ja mandaranum jumasa b'a lu'umi. Yuj ja cham ja Kajwaltik Jesusi, ja'yuj ja Dyosi, b'ob' sch'ay ja jmultik jumasa.

⁶ Mi kechanuka, ja Kajwaltik Jesusi, wa sk'ana oj ya' ka'teltik jastal niwak mandaranum, cho ya'ta ochkotik pagre'il b'a oj ka'teltatik ja Dyos ja stati. Ja'yuj, —toyowik a petsanilex ja Kajwaltik Jesusi, yuj ja kechani ye'n jel ja yip ja b'a lu'um iti. —Jach'ni'a.

⁷ —K'elawilex— —Ja Kajwaltik Jesusi, ti oj jak b'a yoj ason— A petsanilex oj a wil'ex jastal oj jakuk, cho ojni yil ja ma'tik smilawe'i; spetsanil ja kristyano jumasa b'a lu'umi jel oj ok'uke ja yajnix yilawe'i. Jach'ni oj ek' jastal ita. —Jach'ni'a.

⁸ Ja Kajwaltik it kechan ye'n jel ja yipi, ja ma' sak'an ayi, sok ja ma' tola bida sak'an oj ajyuki, cho ja'ni ja ma' it jelxa mojan oj jakuki, jach' wax yala jastal iti: —Desde k'e' kujlajuk ti'xani ayon ja ke'na, man stik'anal ti'ni oj cho ajyukona—. Ja yora k'e k'ujlajuki ti ayon ja ke'n cho tini ja b'a stik'anali.

Ja jas wa sk'ana ja Jesusi

⁹ Ja ke'n Juan jb'i'il, jmoj alijel jb'ajtik yuj ja Kajwaltik Jesusi, ja we'nlex sok ja ke'n ye'nani ay lek sniwanil jk'ujoltika. Yuja ja ye'n niwan jk'ujoltiki, ja'yuj cho ti'ni ayon sok ja b'a kulan k'ot ja Dyosi, cho jach'ni ja we'nlexi; jel ki'oj ja ab'al k'umal sok ja wokol jumasa, kechan wanix ya'a kip ja Dyos b'a oj kuch kuj ja wokol jumasa jawi. Yuj ja waj kal ek' ja yab'al ja Dyosi, sok yuj ja cho jta'a ti' ja Kajwaltik Jesusi, ja'yuj ti jekji yon b'a yoj paman ja' b'a xe'n takin lu'um k'inal b'a Patmos.

¹⁰ Jasa, jun k'ak'u domingo tey jmok ja Espiritu Santo. Ja'yuj ti jmakla jun tsatsal k'umal ja b'a jts'e'eli, jach' jastal yok'el korneta.

¹¹ Ja k'umal jawi, ti yala kab'a: —Ja jas wa'na yiljeli, ts'ijb'a b'a jun ju'un, sok ti'xa jeka yi'e ja juk k'ole jmoj alijeltik it ti aye b'a Asia, ma oj cho kaltik ja juk k'ole jmoj alijeltik it ti aye b'a Efesio, b'a Esmirna, b'a Pergamo, b'a Tiatira, b'a Sardes, b'a Filadelfia sok b'a Laodicea—.

¹² Yajni jsutu jb'aj jk'ela machunk'a wa sk'umanoni, ti kila juke kandelerio toj k'anal tak'in.

¹³ B'a snalan ja kandelerio jumasa jawi, ay ma kila, jach' jastal ja Kajwaltik Jesús yunin ja winik it jak manxuk jastal winiki. Lapan yuj jun spal k'u' k'otel man b'a yok, jaxa b'a sni' sk'ujoli, ay jun syujch'il toj k'anal tak'in.

¹⁴ Ja stso'otsil s'olomi, sak jastal ja k'u' cheji, lajan sok potsob'al sok b'at. Ja sati, lajan sok jastal wax tiltuni ja k'ak'i,

¹⁵ jaxa yok jumasa wax lijpi jastal ja tak'in bronce wax och b'a yoj k'ak'i. Jaxa sk'umali jach' jastal wax ju'u'i ja niwan yok ja'i.

¹⁶ Ja b'a stojol sk'ab'i ti yaman yuj juke k'anal, jaxa b'a sti'i ti wax el jun machit schab'il lado ay yej. Ja sati, jach' wax lijpi jastal wax lijpi ja k'ak'u.

¹⁷ Yajni kila ti mok'yon ko b'a yok lajan sok toj chamel wajyon. Jaxa ye'n ti ya' kajan ja stojol sk'ab' b'a jkwerpo, ti yala kab'a: —Mok xiwan. Ja ke'n ti ayon ja yora kujlaji, cho tini oj ajyukon man b'a stik'anala,

¹⁸ cho sak'anoni'a. Chamelon ajyi, jaxa ya'n spetsanil k'ak'u sak'an oj ajyukon, ja ya'n ke'n wax kala jas oj sk'u'luk ja chamel ch'akeli.

¹⁹ —Ch'akan ts'ijb'a ja jas a wila, spetsanil ja jas wa'n ek'el ja ya'n, sok jach'ni ja jas ojto ek'uk ja tsa'ani.

²⁰ Ke'n oj kala wab' jasun wa sk'ana yal ja juke k'anal it a wila yaman kuji, sok ja juke kandelerio toj k'anal tak'ini. Ja juke k'anali, ja wa slaja ja anjel jumasa b'a juk tsome jmoj alijeltiki, Jaxa juke kandelerio'i ja wax ya' na'tik ja juk tsome jmoj alijeltiki.