Amos 1 - Ja yab'al ja Dyosi

Jun talna wakax och aluman Dyos

¹ Ja b'a chonab' Tecoa ajyi jun winik sb'i'il Amos jel ja swakaxi, jel ja jas yal yab' ja israelenio jumasa yuj ja jastik alji yab' yuj ja Dyosi. Ja ek' ja iti, ja' yajni ayto sk'ana chab' jab'il oj nijkuk ja lu'umi, ja yajni ye'n mandaranum ay ja Ozias b'a Juda sok ja Jeroboam yunin ja Joasi mandaranum ay yuj ja israelenio.

² Ja' lo'il jumasa it ja alji yab' ja Amosi: Yajni wax tajki ja Dyosi ti wax k'umani man Jerusalen, wax takji ja ak jumasa; —wax takji ja wits Carmelo—

Ja jas mi lek oj ek' yuj ja niwak chonab' jumasa Cho jach'ni b'a Damasco

³ Ja ma' Dyos yuj ja israelenio jumasa yalata: Ja we'nlex swinkil Damasco, jelxa jelxiyexta sok ja jas mi leki. Ja'yuj mini oj ch'ay wa mulexa— Xe'ntiyam a wa'ex wajuk ja swinkil ja Galaad jastal wax juch'xi trigo b'a jun tak'ini

⁴ Ja'yujil oj jlap sk'ajk'al ja niwan na'its yuj ja mandaranum Hazaeli sok ja sb'a yunin Ben-hadad;

⁵ Oj ch'ak jip ja b'a niwak wax ajyi ochel b'a Damasco, oj ch'ak sna'jel ja mandaranum jumasa b'a Bicat-aven sok b'a Bet-eden, jachuk a petsanil ja we'nlexi oj i'janik b'a chonab' Quir. Ja jas wax kala yujni jach' oj k'u'luka—.

Ja jas mi lek oj ek' yuj ja Gaza

⁶ Ja Dyos yuj ja israelenio yalata: Ja we'nlex swinkil Gaza, jelxa jelxiyexta sok ja jas mi leki. Ja'yuj —mini oj ch'ay wa mulexa— A lutuwex spetsanil ja swinkil ja chonab'i, jaxa swinkil Edomi a chonowex b'a yib' k'ab'al oj ajyuke.

⁷ —Ja'yuj oj jlap sk'ajk'al ja cha'anil ts'akab' ton jumasa b'a Gaza jaxa niwan na'its jumasa kechan ja' oj kanuk ja sta'anili;

⁸ oj ch'ak sna'jel ja mandaranum jumasa b'a Asdod sok b'a Ascaloni, oj yil janek' ja kip ja Ecroni, ja we'nlexi, man oj ch'ak chamanik a petsanilex. Ja jas wax kala yujni jach' oj k'u'luka—.

Ja jas mi lek oj ek' b'a Tiro

⁹ Ja Dyos yuj ja israelenio jumasa yalata: Ja we'nlex swinkil Tiro, jelxa jelxiyexta sok ja jas mi leki. Ja'yuj, —mini oj ch'ay wa mulexa— A lutuwex spetsanil ja swinkil ja chonab'i jaxa swinkil Edomi a chonowex b'a yib' k'ab'al oj ajyuke; —Mi a kisawex ja trato sb'a moj alijel a b'ajexi ja jastal a k'u'lanex yi ja kristyano jumasa jawi—

¹⁰ Ja'yuj oj jlap sk'ajk'al ja cha'anil ts'akab' ton jumasa b'a Tiro jaxa niwan na'its jumasa kechan ja kan ja sta'anili—.

Ja jas mi lek oj ek' b'a Edomi

¹¹ Ja Dyos yuj ja israelenio jumasa yalata: Ja we'nlex swinkil Edom, jelxa jelxiyexta sok ja jas mi leki. Ja'yuj, —Mini oj ch'ay wa mulexa— A wi'ajex spatik wa moj alijelexi a milawex mi a talnayex sya'ujlale; mi t'un a komo wa tajkelexi, yujni ti nolan a wujilex wa takelex jawa.

¹² Ja'yuj oj jlap sk'ajk'al ja chonab' Teman sok ja Bosra, jaxa niwan na'its jumasa kechan ja oj kan ja sta'anili—.

Ja jas mi lek oj ek' yuj ja Amoni

¹³ Ja Dyos yuj ja israelenio jumasa yalata: Ja we'nlex swinkil Amon, jelxa jelxiyexta sok ja jas mi leki. Ja'yuj, —mini oj ch'ay wa mulexa— B'a oj yil slekil ja swinkil wa chonab'ilexi, b'a Galaadi a pojowex snalan ja ixuk jumasa ma'tik kuchan yuj niwak chameli.

¹⁴ Ja'yuj oj jlap sk'ajk'al ja cha'anil ts'akab' ton jumasa b'a Raba, jaxa niwan na'its jumasa kechan ja oj kan ja sta'anili. Ja iti, ja oj k'u'luk ja sk'ak'u'il tiro'aneli, ay jas jel tsats oj b'ojtuk jun sk'ak'u'il tsatsal ik',

¹⁵ jaxa wa mandaranumex jumasa sok ja ma'tik niwak ya'teli oj i'juke b'a pilan chonab'. Ja jas wax kala yujni jach' oj ek'uka—.