Abdias 1 - Ja yab'al ja Dyosi

Ja lo'il yala ja Dyos sb'aj ja Edomi

^1-2 Ja Dyosi yal yab' ja aluman Abdias ja jas was sneb'a oj sk'u'l yi ja chonab' Edomi. Ti yala'a: Ke'non ja Dyos yuj ja israelenio jumasa, sok jekata jun aluman b'a spetsanil ja niwak chonab' jumasa. Maklayik lek ja jas oj yali: —Yamawik ja wa tujk'anub'ex kristyano jumasa— —La jak tiro'anukotik sok ja Edomi— —Jaxa we'nlex swinkilex Edom, maklayik lek: oj ka iljanik ja we'nlex jel ch'in yuj ja chonab' jumasa. —Spetsanil ja kristyano jumasa b'a lu'umi mi lek oj yil'a—

³ —Ja we'n waxa k'u'ana b'aj jel niwana yuj ja ti aya b'a snalan ja patak' jumasa; waxa k'u'an mi ma oj snik'a ja tiwi yuj ja ti aya b'a scha'anil yax k'ul jumasa; waxa k'u'an mi ma oj b'ob' sjip'a ko'e, —Jayuj jel ch'ayela—

⁴ —Ke'non ja Dyos it jel ja kipi, wax kala wab'i ojni jip'a ko'a a'nima wala jujpi jastal liklik ma ta waxa k'u'lan ja wa soj ja man b'a k'anal jumasa.

⁵ —Yaj ni oj yelk'ana jun elk'anum ja b'a yoj a'kwali, mi oj ch'ak ya elkawi spetsanil ja jas a wi'oji, kechan ja oj yi'awi ja jas cha'an sts'akoli; jaxa yajni waxa wa'wex eluk ja ts'usub' ja b'a yaljili, mi wax ch'ak awi'ex spetsanil spalanal.

⁶ —Jayuj ja we'n ch'akta aji elkawi spetsanil— —Ch'akta i'jukawi spetsanil ja wa tak'ini—

⁷ Ja ma'tik ti aye amoki wax yalawe el lek waxa wila ab'aj soke jayuj sk'u'lane, b'a jas oj ja lok a wok sok, cho slo'laya ja ye'nle'i; ja ma'tik lajan wala wa' sok ja b'a wa mesa mixa lek xyilawa, ya'we elan ja b'a wa a lu'umi —Jaxa we'n mini t'un a na'a'a—

⁸ —Maklayon Edom: ke'non ja Dyoson it jel ja kipi, meran wax kala jakum ja k'ak'u mi oj kanuk ja wa yax k'ul jumasa sok mini june ja ma'tik jel sna'a. —Ke'n oj ch'ak'e spetsanile ja jaw jumasa—

⁹ Ja b'a chonab' Temani ja ma'tik jel tsats awujili oj k'itk'unuke yuj ja xiweli, jaxa b'a yax k'ul jumasa b'a Edomi spetsanile oj ch'ak chamuke ja b'a tiro'aneli.

Ja mulal b'a Edomi

¹⁰ —Ja we'n Edom, jel k'ixwela ab'aj oj kanan oj ch'ak ana'jel yuj ja jel awixtala'an ja wa moj alijel jumasa, Israelita.

¹¹ Ja yajni snol k'ab'in ja soldado jumasa ja matik mi xyi'ab'a soki ja chonab' Jerusaleni sok ch'ak sjip ko ja b'a wax ajyi ochel jumasa, cho jachuk ak'u'lan ja we'n ja jastal sk'ulane' ja ye'nle'i; awila jastal wa spila sb'aje ja jastik jel yi'oj ja chonab'i, —sok mi jas ak'u'lan b'a oj ja wal yabye mi lekuk ja jas was k'u'lane'i—

¹² —Mi sb'ejuk oj ajyan lek ja yajni wan yi'jel wokol ja wa moj alijel jumasa; mi sb'ejuk oj tse'nan yajni ja Juda lajan sok jastal jun monton lu'um ay; mi sb'ejuk oj ja tse'uk ja ye'nle ja yajni cham k'ujol aye'i;

¹³ Mi sb'ejuk ochya ja b'a Jerusalen sok jel tsamal awila yuj mini jun ya'tel ay ja jchonab'ili; mi sb'ejuk ke'a welk'an ja jastik jel yi'oji ja yajni mixax b'ob' skoltan sb'aji.

¹⁴ Mi sb'ejuk oj kanan ja b'a was k'utsu sb'aj ja b'ej jumasa ja'yuj ti oj miljuk tiw ja ma'tik was paka ajneli, mini sb'ejuk oj ja wa'aj b'aj b'a sk'ab' ja matik mi xyi'ab'a soki ja yajni mixa sna'a ja jas oj sk'u'luke'i.

¹⁵ —Jayuj jel xa mojan ja k'ak'u b'a oj k'elyi ja smul spetsanil ja chonab' jumasa— —Ja k'ak'u jawi ojni ka'a tup ja jastal ni ja sb'eji— —Ja k'ak'u jawi oj kawi ja jastal ja chapa sok ja tuki—

Ja Dyosi oj ya stup ja smul spetsanil ja chonab' jumasa

¹⁶ —Ja jchonab'ili jel yi'aje ja wokol ja b'a wits it tey ja snajtsil ja tsomjeli; —Jayuj jach' oj cho yi'e ja wokol spetsanil ja pilan chonab' jumasa, jayuj ja stik'anili ojni ch'ay sna'jele'a— —Lajan sok jastal mini ajyiye'a—

¹⁷ —Jayuj ay chab' oxe ja jchonab'il jumasa oj sle' skoltajele ja b'a jnaji ja tiwi ojni b'ob' skoltan sb'aje'a, ja'yuj ja Sioni ja ni ja wits jel xk'ana'a. Tey tiw ja yintil jumasa ja Jacobi oj cha yi'e ja jas sb'aj ni ye'nle'i.

¹⁸ —Jach' jastal ja k'ak' was tsika ja jastik junuki, ja swinkil b'a Edomi oj ch'ak sna'jel yuj ja lajchawe yintil ja Israeli. —Mini june ja swinik ja Edomi oj kan sak'an— Ke'non ja Dyos yuj ja israelenio, meran wax kala jach'ni oj ek' jastal jawa.

¹⁹ —Ja israelenio jumasa b'a ko'el k'inali oj sb'ajuke ja yax k'ul jumasa b'a Edomi; jaxa israelenio jumasa b'a lajan k'inali oj sb'ajuke ja slu'ume jumasa ja filisteo, cho jach'ni ja slu'um jumasa b'a Efraini sok ja lu'um jumasa b'a Samaria; sok ja sb'a yintil jumasa ja Benjamini oj sb'ajuke ja lu'um jumasa b'a Galaadi;

²⁰ Ja jitsan israelenio jumasa i'ji ye lutan b'a pilan chonab'i yi'aje ja slu'um ja cananeo jumasa, man b'a chonab' Sarepta; jaxa swinkil ja Jerusalen it i'jiye b'a Sefaradi, oj yi'e ja chonab' jumasa b'a ko'el k'inali.

²¹ Spetsanil ja ye'nle'i oj jakuke ja b'a jnaji jastal jun chonab' b'a b'ob'el yujile; oj ya'e yab'ale ja tsamal chonab' Edomi, —Sok ke'nani ja smandaranumone'i—