Filipenses 1 - Teusö Tä Waheta

¹ Paulo sa. Jesus Cristo a na hiliposö tili makö pewö kua koka naio wi, ĩ makö na Timóteo a solo hi waheta sama tä simöpali ke. Jesus Cristo anö samakö kalipalama sinomo wi ĩ samakö. Jesus a thapo wi ĩ töpö pewö na ai makö patamo sinomo wi ĩ makö, ai makönö Jesus a thapo wi ĩ ma töpö pewö pasilipo sinomo wi ĩ makö, ĩ na makö kui makö na hi waheta sama tä simöa naipali ke.

² Kamakö hai ĩ pö̃ Teusö a, Jesus Cristo pata tä, ĩ na kilii töpö na ĩ na sa kuu: ‑Hiliposö tili töpö pewö totiapala apaö! Ĩ töpö pi topapalama apaö!‑ ĩ na sa kuu.

Teusö a na Paulo a hapalo noai ĩ ta

³ Kamakö na sa pi tapomo sinomoö. Sa pi tapomo nö, ‑Aitaköö! Ĩ töpö topa apa thaliö!‑ ĩ na ipa Teusö a na ĩ na sa kuu sinomoö.

^4-5 Jesus sa ta wäsä tä, kamakönö sa pasilipo sinomoö, Jesus ma ta wäsä naio sinomoö, ĩ na makö kua thali. Jesus ma thapo tute tä, ĩ na makö kuatima, ĩ na makö kua soaö. Ĩ na makö kua soaö ha, Teusö a na makö a wäsä nö, sa pi mönaha apöki nö, makö a wäsäö.

⁶ Kamakö õsi na Teusö anö toitai tä thakö noai, Jesus Cristo a huu kõo paio mi tä, Teusö anö toitai tä thaa soatio kitä. Jesus a huu kõa tä, kamakö õsi na toitai tä thaa hötötöki kitä. Ĩ pitili tä sai a.

⁷ Kamisanö makö pi ipa kutenö, ĩ na sa kuu kule: Pi naka. ‑Jesus a kai holisi‑ ai töpö kuu pi wasöaö ha, ‑Naiö! Pitili tahaö!‑ ĩ na sa kuu hö̃töa kule. ‑Awai. Jesus a kai pitili‑ ĩ na sa töpö pi thama sinomoö. Ĩ na sa töpö pi thama tä, Teusö anö sa totiapalaö. Huki, hi sai a lototole, ĩ a sai ha sa titia kule maaki, Teusö anö sa totiapalaö. Sa totiapala apati tä, Teusö anö makö totiapala naia kule. Ĩ na tä kuaö ha, kamisanö makö pi ipaö.

⁸ Jesus Cristo anö makö pii kua wi na, ĩ na kamisanö makö pii kua hö̃töoö. Pitili ta. ‑Ĩ pitili ta‑ Teusö a kuu naioö.

⁹ Teusö a na sa hapalo nö, ‑Hiliposö tili töpö noimaso palasopö, tä thapalöö! Töpö pi hatukua apöki nö, töpö pi tao opa wi, ĩ na töpö pi hatukua thaa naipamanöö!‑ ĩ na sa kuu.

¹⁰ Ĩ na Teusö anö makö thamaö ha, tä toita sati ipii, ĩ ma tä saili kitä. Tä toita sati ipii, ĩ ma tä sailöma, Cristo a walo kõa tä, kamakö na wanisala tä kupo mai kitä. ‑Wa wanisala apapiliö!‑ Cristo a kuu mai kitä.

¹¹ Kamakö õsi na Jesus Cristo a kalipalo waikia kutenö, toitai ma tä tha apa kitä. Toitai ma tä tha apaö ha, ‑Teusö a hai, ĩ pata tä sai. Ĩ a totiatalo opa asaö‑ ĩ na ai töpö kuu kitä.

Cristo a na sa nokapalo pi topa sisaö

¹² Ipa pö! Pi naka. Titita wi a sai ha sa titiköma kutenö, Jesus a thapo wi ĩ töpö satehea apa kimati.

¹³ Ĩ na tä kuaö ha, kaikana tä sai pö ha sotatu töpö läo sinomo wi ĩ töpö, ai töpö pewö solo, ‑Paulo anö Cristo a kai wäsä sinomoö ha, a titiköma‑ ĩ na ĩ töpö pewö pi kupalo opama.

¹⁴ Hisimö sa titia salo, Jesus a thapo wi ĩ ai töpö satehe epii töpö kili mai, ĩ töpönö Teusö ta wäsä kule. Ĩ töpö wäo kili noai, Teusö anö ĩ tä mapamanöma kutenö, töpö kili mai, Teusö ta wäsä kule.

¹⁵ Ai töpö aiki, ‑Paulo anö ta wäsä wi, ai satehe epii töpönö ĩ ta hini silia apa sisatio saiö!‑ ĩ na ai töpö pi kuu salo, ĩ töpönö Paulo sa hĩsu thaa pasioö. Sa hĩsu thaa pasio nö, ‑Paulo anö Cristo ta wäsä lotetea apa asa thali maaki, huki kamisanö sa ta wäsä asa kuleö!‑ ĩ na ai töpö pi kuu nö, Cristo ta wäsä kule. Ĩ töpönö sa hĩsu thaa nö, Cristo ta wäsä kule maaki, ai töpönö Teusö ta wäsä pi topa apa salo, ĩ töpönö Cristo ta wäsä kule.

¹⁶ ‑“Cristo ta pitili” ĩ na töpö pi thama pia salo, Teusö anö Paulo a simönöma‑ ĩ na ĩ töpö pi kuu nö, sa pi ipa salo, ĩ töpönö Cristo ta wäsä nömöa kule.

¹⁷ ‑Sa hĩsu thaa nö, ai töpönö Cristo ta wäsä kule‑ sa kuuhe, ĩ töpö patamo pi topa päa salo, ta wäsä päa kule. ‑Paulo a titila tä, Cristo sa ta wäsä pasioma, “Häö. Wi na taköö!” Paulo a pi kuu nö, a pea kitä‑ ĩ na ĩ töpö pi kuu päoö.

¹⁸ Ĩ nakö pälaö! Kamisa aiki, ‑Wi na takö a?‑ sa pi kuu mai kitä. Hi ai töpönö sa pi ipa salo, Cristo ta wäsäö, ĩ na tä kua tä, ai töpönö sa hĩsu thaa salo, Cristo ta wäsäö, ĩ na töpö kua päla tä maaki, ĩ töpönö Cristo ta wäsä salo, sa pi mönaha satia apa kule.

¹⁹ Awai. Sa pi mönaha apa kitä. Teusö a na makö hapaloö, Jesus Cristo a õsi kua tolele ĩ anö sa pasilipoö, ĩ na sa kua salo, ‑Sa lisia kopamani kitäö!‑ ĩ na sa pi kuu nö, sa pi mönaha kule.

²⁰ ‑Paulo a wani tomöpo mi ipö saiö!‑ ĩ na sa töpö pi thama wani ipö sai. Sa kili mai ha, sa kuatipili na, huki ĩ na sa kua soaö. Ĩ na sa kua soa nö, ‑Paulo a kuati pole, ĩ ma tä taa nö, “Cristo a topa apaö” ĩ na makö pi kuu kuleö!‑ ĩ na sa töpö pi thama pi topa apa sisaö. Sa temö tä, ĩ na sa töpö pi thamaö, sa nomasoma maaki, ĩ na sa töpö pi thama satia soaö, ĩ na sa töpö pi thama pi topa apaö.

²¹ Sa temö tä, Cristo a na sa nokapalo pi topa apa sisaö. Sa nomano nö, Cristo a na sa kuo totio naitio kitä. Ĩ na tä kua kutenö, sa nomaso wi ĩ tä topa satia apa.

²² Ĩ tä topa satia kule maaki, sa noma paio mi tä, Cristo a na sa kalipalo nö, Cristo a na ai töpö satehe epii sa töpö nokapalama kitäö! Önö kutenö, ka pi sa tä sailöpö taka? Sa temötio wi ĩ sa tä saia hãtolöpö? Sa nomaso wi ĩ sa saia hãtolöpö? Sa tä sai tai mi ipö.

²³ Sa noma pi topa kule maaki, sa temötio wi, ĩ sa tä pi hö̃töa kule. Sa konasolöma, Cristo a na sa kutio kitä. Cristo a na sa kutio wi ĩ tä topa satia apa kutenö, sa kõo pi topa apaö.

²⁴ Sa kõo pi topa apa kule maaki, kamakö na Cristo sa ta wäsä paio pia salo, sa noma paio mai kitä. Sa nomasoma, wi na makö kua haiopö?

²⁵ ‑Ĩ pitili ta‑ ĩ na sa pi kuu salo, ‑Sa noma paio mai kitäö!‑ ĩ na sa pi kuu. Kamakö na sa kutiköma, makö õsi õsitioma maaki, makö õsi pataso kitä. ‑Cristo a pitili‑ ĩ na makö pi kuu totio nö, makö pi mönahapalo opati wi, kamisanö ĩ na makö thama pia salo, kamakö na sa kutio kõo kitä.

²⁶ Önö kutenö, Jesus Cristo ma thapo salo, kamakö na sa kua kõköma, makö pi mönaha apa kitä. Jesus Cristo anö sa noama waikioma kutenö, makö pi mönaha apa kitä.

²⁷ Pö sömöka taa totikiö! Cristo ta topa apöle ĩ ta hinia totilöheö! Ma ta hinia totilöma, Cristo ma hula mai kitä. ‑Cristo a kuu noai, ĩ na makö pewö kua totiatalo opapököö!‑ ĩ na makö kuu kitä. Makö pewö kasiapalo nö, Cristo ma ta hini sinomo nö, Cristo ma ta wäsä satimo opa kitä. Ĩ na makö kuaö ha, kamakö na sa waloa kõköma, ‑Makö kasiapalo opa noa‑ ĩ na sa kuupököö! Kamakö na sa walo paio mi päla tä maaki, ‑Hiliposö tili töpö kasiapalo opa thaliö!‑ ĩ na sa tä kuu hininönöpököö!

²⁸ Makö wanipo sinomo wi ĩ töpö na pö kili ti! Makö kili mi ha, makö wanipo wi ĩ töpö aiki, ‑Teusö anö ĩ töpö noama asa salo, ĩ ma töpö utitipama mai kitä. Teusö anö makö utitia pasipamani kitäö!‑ ĩ na ĩ töpö pi kuu kitä.

²⁹ Cristo a na makö nokapalo wi ĩ makö na Teusö aiki, ‑“Cristo a pitili” ĩ na makö pi kuu totiopököö!‑ kamakö na ĩ na Teusö a kuu asaö. ‑Cristo ma thapo salo, ai töpönö makö peama kuki kitä!‑ ĩ na kamakö na Teusö a kuu naio asaö.

³⁰ Cristo sa ta wäsätima kutenö, makö mamo tetela tä, ai töpönö sa peama kipili. Sa peama kipili maaki, Cristo sa ta wäsä satimo kipili. ‑Paulo a peama kule maaki, Cristo ta wäsä satimo kulaliö!‑ ĩ na ma ta kuu hini soa kule. Kamisa kua pole na, ĩ na makö kua hö̃töa kule.