2 João 1 - Teusö Tä Waheta

A kai a pitili ipii, ĩ ma kai a hini sinomo kutenö, makö pi ipaö

¹ Teusö a thapo wi ĩ töpö kokamo sinomo wi ĩ töpö na sa patamo sinomo wi ĩ sa. Teusö anö suö wa sailö noai ĩ wa, au ulu töpö, ĩ na kilii makö na hi waheta sa tä simöpa pia kule. Kamisanö makö pi ipa sai. Ta pitilia apöle ĩ ta taö öpa wi, ĩ töpönö makö pii hö̃töoö.

² Pili makö õsi pewö na ta pitilii ĩ ta kua hö̃töa kule. Kamakö õsi pewö na ĩ pitili ta kuo soatio kitä. Ĩ na tä kua kutenö, kamisamakönö makö pi ipaö.

³ Pö̃ Teusö a, pelupö Jesus Cristo a, ĩ na töpö kui töpö holisimo mi. Ĩ töpönö makö pi ipaö. Ĩ töpönö makö pi ipa salo, makö totiapala apaö, makö pea tä, makö pasilipoö, makö pi topapalama apaö, ĩ na ĩ töpö kua kitä.

⁴ Au ulu ai sa töpö huu talalö nö, ‑Ĩ töpönö ta pitili ipii ĩ ta hini totio noa‑ ĩ na sa pi thamama. Ĩ na sa pi thamaö ha, sa pi mönaha apama. ‑Pitili ma ta hinia totilöö!‑ kamakö pewö na ĩ na pö̃ Teusö a kuuma ha, au ulu ai töpönö ĩ pitili ta hinia totia waikilöma kutenö, sa pi mönaha apama.

⁵ Suö ai! ‑Makö pewö noimaso totiopököö!‑ ĩ na sa kuu kule. ‑Makö noimasopököö!‑ sa kuu wi, ĩ tute ta mai kitä. Somi sai tä, ĩ ma ta kuu hini somama.

⁶ Teusö ma noimaö, ai ma töpö noimaö, ĩ na makö kua tä, ‑Ĩ na makö kuapöö!‑ ĩ na Teusö anö makö noa thaa wi, ĩ ma ta hinia totili kitä. ‑Ĩ na makö kuapöö! Pö noimaso totihoö!‑ ĩ na somi tä, ĩ na ma ta kuu hini waikioma.

Ai töpö mönama sinomoti wi, ĩ töpö na makö pi mosawiköö!

⁷ Ai töpö mönama sinomo wi, ĩ tä uli pewö hamö satehe epii ĩ töpö hupalo opa thali. ‑Jesus Cristo a hai, ĩ sanöma tä sai kupo totio maama‑ ĩ na ĩ töpö kuu thali. Ĩ na ai tä kuu wi ĩ a hai, töpö mönama sinomo wi ĩ a. Cristo a wanipo opa wi ĩ a.

⁸ Pö pi mosawiköö! Makö pi mosawi mi tä, ai tänö makö mönama matimö. Makö kasiapalo opati nö, pe epii makö kalipalo opatima maaki, ai tänö makö mönama läköma, makö kalipalo noai ĩ ma tä noa pewö täa makoka kõo mai kitä. Makö pi mosawia totia tä, Teusö anö noa tä pewö totoa totia hö̃töki kitä.

⁹ Cristo a kai na ai tä pi wani luluo mai, Cristo a kai a hosa tä, ĩ a waninö Teusö a thapo mi. Cristo a kai na ai tä pi wani lulua apöle, ĩ a waninö pö̃ a thapoö, pelupö a thapoö, ĩ na ĩ a wani kua pasioö.

¹⁰ Cristo a kai a wäsä mai, tiko ta wäsä wi, kamakö na ĩ a wani talasoö ha, ĩ a wani naka läo maikiö! ‑Kamisa sai pö ha a kuiköö!‑ ĩ na pö kuu ti!

¹¹ ‑Kamisa sai pö ha a kuiköö!‑ ĩ na wa kuu kuköma, tiko ta wäsä wi ĩ a waninö wanisala tä thaa kua wi na, ĩ na kawanö wanisala wa tä thaa kua naio kuki kitä. ‑Ĩ a sai pö ha tiko ta wäsä wi ĩ a naka lälöma kutenö, “Tiko ta wäsä pole, ĩ tä topa waikia kule” ĩ na ĩ a pi wani kuu hãto alu kuleö!‑ ĩ na ai wa töpö pi thama totio kitä.

Kamakö na sa hama huu pi topa kule

¹² Kamakö na sa ta wäsä pi topa apöle ĩ ta kua apa soa kule maaki, waheta tä na ĩ sa tä sãökati wani ipö. Kamakö na sa hama waloiki nö, kamakö na pili sa kai sainö sa hapalo pi topa toitia kule. Ĩ na sa kua solö ha, ĩ makö pewö pi mönaha apa kuki kitä.

¹³ Suö ai! Teusö anö au hoosa a sailö noai, ĩ a hai ulu töpö aiki, ‑“Wa topa kule?” ĩ na ipa nao a hai pepala na ĩ na wa kuu!‑ ĩ na ĩ töpö kuu kule. Ĩ na pätawö.