Izililo 5 - IZIBHALO EZINGCWELE

Umthandazo weZiyon wokucela ukuhlangulwa

¹ Kukhumbule, Yehova, okusihleleyo; Bheka, uyibone ingcikivo yethu.

² Ilifa lethu lisuke lenziwa elabasemzini, Izindlu zethu zalunga kwabolunye uhlanga.

³ Siziinkedama, asinabawo; Oma banjengabahlolokazi.

⁴ Amanzi ethu siwasela ngesilivere; Iinkuni zethu ziza kuthi ngexabiso.

⁵ Intshutshiso iphezu kwentamo yethu; Sidiniwe, asinakuphumla.

⁶ Isandla sisinika amaYiputa, Nama-Asiriya, ukuba sihluthe sisonka.

⁷ Oobawo bonile, àbasekho; Thina sithwele ubugwenxa babo.

⁸ Silawulwa ngabakhonzi; Akukho usiqhiwulayo ezandleni zabo.

⁹ Isonka sethu sisizuza ngomphefumlo wethu ùsisichenge. Ngenxa yekrele lasentlango.

¹⁰ Ulùsu lwethu luyavutha njengeziko Ngenxa yolophu lwendlala.

¹¹ Badlwengulé abafazi eZiyon, Iintombi emizini yakwaYuda.

¹² Baxhomé abathetheli ngezandla; Ubuso bamadoda amakhulu àbubékwa.

¹³ Amadodana athwala amatye okusila, Amakhwenkwe akhubeka phantsi kweenkuni.

¹⁴ Amadoda amakhulu aphezile ukuya esangweni; Amadodana, ekubetheni uhadi.

¹⁵ Iphelile imihlali yentliziyo yethu, Ukuqamba kwethu kujike kwaba kukumbambazela.

¹⁶ Síwile isithsaba entlokweni yethu; Yeha ke thina! kuba sonile.

¹⁷ Ngenxa yoko ityhafile intliziyo yethu; Ngenxa yezo zinto amnyama amehlo ethu;

¹⁸ Ngenxa yentaba yaseZiyon, kuba ibharhile, Kuhamba iimpungutye phezu kwayo.

¹⁹ Wena, Yehova, uhleli ngonaphakade; Itrone yakho ikwisizukulwana ngesizukulwana.

²⁰ Yini na ukuba usilibale ngonaphakade, Usilahle imihla emide?

²¹ Síbuyisele kuwe, Yehova; sobuya; Hlaziya imihla yethu njengokwamandulo.

²² Ùngaba usicekise mpela na, Wanoburhalarhume kuthi ngokukhulukazi na?