Imizekeliso 1 - Incwadi Yeziba̔lo Ezingcwele 1864 1902 (Xhosa Appleyard)

ISAHLUKO I.

¹ IMIZEKELISO ka‐Solomone, unyana ka‐Davide, ukumkani wo‐Sirayeli;

² yokuba kwaziwe ubulumko nemfundiso; yokuba kuqondwe iziteto zengqondo;

³ yokuba kwamkelwe imfundiso yobutelekelelo; ubulungisa, nobugwebo, nolungelelwano;

⁴ yokunika izidenge ubuciko, nomfana ukwazi nentelekeleliso.

⁵ Ilumko liya kuva, landise ufundo; noqondayo uya kuzuza amaqinga alumkileyo:

⁶ kuze kuqondwe umzekeliso nenteto esiteleyo, amazwi amalumko nezintsonkotelo zawo.

⁷ UKWOYIKA uyehova kusisiqalo sokwazi: ubulumko nemfundiso amahilihili ayazidela.

⁸ Yiva, nyana wam! imfundiso kayihlo, ungalahli umteto kanyoko.

⁹ Ngokuba ziya kuba sisitsaba esihle zona kuyo intloko yako, nemixokelelwane entanyeni yako.

¹⁰ Nyana wam! ukuba aboni bayakuhenda, zungavumi ke.

¹¹ Ukuba bati: Hamba nati, masilalele igazi, masizifihlele ofumana engenatyala;

¹² masibaginye behleli njengayo ihadesi; kwa besapilile, babe njengabahleleyo esihogweni:

¹³ yonke impahla enobomi soyifumana; siya kuzalisa izindlu zetu ngamaxoba:

¹⁴ iqashiso lako uya kulenza pakati kwetu; inxowa inye yoba kuti sonke:

¹⁵ nyana wam! zungahambi nabo endleleni; nqanda unyawo lwako emizileni yabo:

¹⁶ ngokuba inyawo zabo zibalekela ububi, zinxamela ukupalaza igazi.

¹⁷ Ngenyaniso kufumana kusanekwa utambo emehlweni enye intaka:

¹⁸ kanti bona bayalalela elabo igazi, bayazifihlela obabo ubomi.

¹⁹ Zinjalo ke indlela zabo bonke ababawela impango; iyasusa ubomi bomniniyo.

²⁰ UBULUMKO buyadanduluka ngapandle; buyapakamisa ilizwi labo ezitarateni:

²¹ kwezinkulu indawo zembutumbutu buyabiza, ezitubeni zamasango; esixekweni buyateta iziteto zabo, busiti:

²² Kwoba kade kangakananina, zidenge! niya kutanda ubudenge, nabagxeki bazinqwenele ukugxeka, namageza atiye ukwazi?

²³ Ziguquleni ngokwohlwaya kwam; bona ke, ndiya kunigalelela umoya wam; ndiya kunazisa amazwi am.

²⁴ Ngokokuba ndibizile, nala nina; ndolulile isandla sam, kungabangako owapulapulayo;

²⁵ koko nilahlile lonke icebo lam, nesohlwayo sam ningasivumanga;

²⁶ nam ndiya kuhleka ilishwa lenu; ndiya kugculela kwakufika isoyiko senu;

²⁷ kwakufika isoyiko senu njengalo uquta, liti ilishwa lenu lize njengaso isaqwiti; kwakufika pezu kwenu ubunzima nesitukutezi.

²⁸ Baya kwandul’ ukundibiza, kanti andiyi kusabela; baya kundifuna msinya, kanti abasayi kundifumana:

²⁹ ngenxa yokuba betiyile ukwazi, nokuba bengaqashanga ukwoyika uyehova.

³⁰ Abavumanga icebo lam; badela konke ukwohlwaya kwam:

³¹ ngako baya kutya kwisiqa̔mo seyabo indlela, badikwe ngawabo amacebo.

³² Ngokuba ukupambuka kwezidenge kuya kuzibulala, nokungakatali kwamageza kuya kuwabubisa.

³³ Kodwa ondivayo mna wohlala ngokunqaba; uya kwonwaba, kungeko kwoyika ububi.