Philemon 1 - WAKALATA WANO WALI

¹ E kalata wee wafumile kwe Pauli, umukungwe muno we Klistu Yesu, nukufuma kwe Timoti umwana­witu— Kumukundwe witu swinya umuwo­mvi wunji e Filimoni,

² nawachiwanza chi Klezia wane mukawungana nawo mung'anda yako, swinya nakunkazi yitu e Afiya nakwe Arkipasi echita wunji:

³ Ndi e Leza e Tata ni Mfumu e Yesu Klistu awafwila inkumbu nuku­wapa umutende.

Ulukundo lwakwe Filimoni nisuwilo lyakwe

⁴ Ponsinye pano nkapepa, mwana­witu Filimoni, nkakutaka ndanga nku­salifya Leza wane.

⁵ Amuno nkakwivwa ivyalukundo lwako luno wakunda awantu wakwe Leza swinya nisuwilo lyako lino uli nalyo mu Mfumu e Yesu.

⁶ Nkapepa Leza nkuti aleke tuwakwa­vwana mwisuwilo tuwasambilizyania ivizima vyonsi vino tuli navyo ndi twalemasya Klistu.

⁷ Ulukundo lwako, mukundwe wane, lukampa ichimwe­mwe chikulu mbali nukunsimpisya! Wasansamusya imyezo yawantu wakwe Leza yonsi.

Ukulambilizizya Onesimasi

⁸ Muno wemwanawitu mwe Klistu, indi nukusinga konsi, ukuti ingakutuma uchite chino chazipila ukuchita.

⁹ Lelo muno alukundo napatichizwa ukuti nkulambilizye awowo. Nachita awonye­woo chingatenga ne Pauli, nemulasi wakwe Klistu Yesu swinya wino ka­nonzi ali muvingololo muno alizina lyakwe.

¹⁰ Nkukulambilizizya Onesi­masi, wino anenenye nayipapila mwe Klistu: wino mukapindinye kaa kano indi muvingololo namukwata kumu­zimu.

¹¹ Kali walinji awavye kwewewe, ukuwa kanonzi wawa amuntu mwene­cho kwewewe nakwenenenye.

¹² Kanonzi weyo namunyosya kwe­wewe, numwezo wane wuli pakwe weliwe.

¹³ Nalondesyanga ukuti ndange indi nawe konye-koo, pano indi muvi­ngololonye muno Amazwi Matele, alyakuti alange akunjavwa pane usipo.

¹⁴ Ukuwa nsinakulonda ukukupatichi­zya ukuti unjavwe; ukuwa chingazipa ndi ungachita wowonye nukulonda kwako. Achaleka ntanga nchite chimwi suka ndi wayizumilila.

¹⁵ Nche pamwi Onesimasi wafumile kwewewe kumpindi ntichi alyakuti ndi wiza ayize alange ali nawe penye.

¹⁶ Kanonzi asi amuzya awowo, ukuwa alusizye umuzya: amwanawitu umu­kundwe mwe Klistu. Ali nuwuzi wu­kulu wuli kwenene! Swinya vino aliwa nuwuzi kwakwe wewe, amuzya wako swinya amunyonko mu Mfumu!

¹⁷ Achaleka ndi ukwelengania kuno nene nemuwuyo, uyize umupochelele swinya ndimuno ungampochclelela nene.

¹⁸ Ukuwa ndi wakuwifya chimwi, nanti ndi wakukopa chimwi, umpe nene umulandu.

¹⁹ Paa, nandi mbalike nikasa lyane inti, Nenenye, ne Pauli nalwane, ndilipa. (Ukuwa kweni, na­chawuzimanye, nsinakulonda ukukwi­zusya kuno uwulanzi wako wakongola kwenene.)

²⁰ Achaleka, mwanawitu, mfwila inkumbu, muno a Mfumu e Leza; sansamusya umwezo wane, ne­munyonko mwe Klistu!

²¹ Kweni pano nkuwalika kalatanye wee, nkusimichila kuno wandi uchite ndimuno nakunenela — lelo naponye wandi uchite ulutilizye napapo.

²² Swi­nyanye nkukulambilizya ukuti undolele indo lyankani, amuno nkusuwila kuno Leza wandi ayivwe amapepo yinu mwensi ambwezezye kwemwemwe.

Umulamu wakupelelechezya

²³ Epafurasi, umukungwe wunji muno we Klistu Yesu, akukulamuka,

²⁴ nawawomvi wanjinye e Marko, nu Aristarikasi, nu Demasi, nga nu Luka wakukulamuka.

²⁵ Ndi Imfumu Yesu Klistu awawa­fwila inkumbu mwensi.