Mateyu 1 - WAKALATA WANO WALI

Ivyankwatwa yakwe Yesu Klistu

¹ Koo akulondolola kwankwatwa yakwe Yesu Klistu, uwamwikwata lyakwe Davidi, mwikwata lyakwe Abrahamu.

² Abrahamu apapa Ayizeki; Ayizeki apapa Jekapu; 'Jekapu apapa Yuda nawanyina;

³ nawe Yuda apapa Perezi nu Zera (mwakwe Tamari); Perezi apapa Hezroni; Hezroni walinji weyisi wakwe Rama;

⁴ Rama apapa Aminadabu; Aminadabu apapa Nashoni; Nashoni apapa Salimoni;

⁵ Salimoni apapa Boazi (mwakwe Rahabu); nawe Boazi apapa Obedi (mwakwe Ruti); Obedi apapa Jese;

⁶ Jese apapa imfumu Davidi. Davidi apapa Solomoni mwakwe muka Yuriya;

⁷ Solomoni apapa Rehoboamu; Rehoboamu apapa Abija; Abija apapa Asa;

⁸ Asa apapa Jehoshafati; Jeshoshafati apapa Yoramu; Yoramu apapa Uzia;

⁹ Uzia apapa Jothamu; Jothamu apapa Ahazi; Ahazi apapa Hezekiya;

¹⁰ Hezekiya apapa Manase; Manase apapa Amoni; Amoni apapa Josia;

¹¹ Josia apapa Jekoniya nawanyina, pampindi yino awa Israeli watwazilwe ku Babeloni.

¹² Walanga pano wasendwa watwalwa ku Babeloni; Jekoniya apapa Shealtieli; Shealtieli apapa Zerubabeli;

¹³ Zerubabeli apapa Abiudi; Abiudi apapa Eliakimu; Eliakimu apapa Azori;

¹⁴ Azori apapa Zadoki; Zadoki apapa Akimu; Akimu apapa Eliudi;

¹⁵ Eliudi apapa Eleazara; Eleazara apapa Matani; Matani apapa Jekapu;

¹⁶ Jekapu apapa Jozefu, emuka Mariya wino walinji wenyina wakwe Yesu, wino wisilwe ilyakwe Mesaya.

¹⁷ Achaleka inkulo zyonsi zili ikumi nazini ukufumilila kwakwe Abrahamu ukufika kwe Davidi, nako ukufumilila kwe Davidi ukufika kwakutwalwa kwa wa Israeli ku Babeloni inkulo zili ikumi nazini, nako ukufumilila kumpindi yakutwalwa ku Babeloni ukufika kunkwatwa yakwe Mesaya kuli inkulo ikumi nazini.

Inkwatwa yakwe Yesu

¹⁸ Inkwatwa yakwe Yesu Klistu yalinji woo. Mariya enyina wimalwanga nu Jozefu, ukuwa walanga pano atani amutwale amanyikwa kuno walinji napanji ku Muzimu Mwimichile.

¹⁹ E Jozefu wino wimalanga Mariya, walinji amulungamane; atalondanga ukumuwumbula, achaleka awakwelengania ukuti aleke ukumwimala nanti kuti wumwi amanye.

²⁰ Ala pano achili akwelengania wowonye, umungeli wa Mfumu e Leza amulolechela muchilota ati, Jozefu, mwanakwe Davidi, utatina ukutwala Mariya ewakwako. Amuno chino alinacho chafuma ku Muzimu Mwimichile.

²¹ Alikwata umwanamonsi uyize umwite izina lyakwe Yesu­—amuno weliwenye awino alitula awantu wakwe kuluwembu lwawo.

²² Ukuwa chonye-choo chachitwa alyakuti chino Imfumu e Leza wavwanjizile mumulomo wamutumwa chifiswe. Ichakuti,

²³ Lolani emwali musimbe aliwa napanji akwate umwanamonsi, ayize ayitwe izina lyakwe Emanueli (chino chikusula ukuti, Leza ali naswe).

²⁴ Walile Jozefu waziwuka achitila ndimuno umungeli wa Mfumu e Leza wamunenezile ukuti atwale Mariya.

²⁵ Atatela asunkane nawe asuka umwana ayiza akwatwa. Amwita izina ati we Yesu.