Marko 1 - WAKALATA WANO WALI

Ukuwizya kwilandwe zima ukwakwe Yohani Kabatizya

¹ Lyoo alilandwe zima ilyakwe Yesu Klistu, uMwanakwe Leza.

² Lyatalichizile ndimuno lyawalichilwa numutumwa Ayizeya: Leza akuti, Lolani intumi yane; yino nandi ntume pankolelo pakwe mwemwe kukuyania inzila yako.

³ Izwi lyakwe wumwi likupunda mulumpalang'ang'a, likuti, Yaniani ekumba wa Mfumu e Leza; molole ninzila yakwe iyakupita mwenemo!

⁴ Achaleka Yohani walolesile mulu­mpalang'ang'a, awabatizya awantu swi­nya nukuwawilila Ilandwe zima, ilyaku­ti, Tontolokwani kuluwembu lwinu mubatizwe nukubatizwa, mwewantu­mwe, apano Leza awatetele kuluwembu lwinu.

⁵ Wonsi wano wafumile mwe Yudeya nawano wafumile mukaya kamwe Yerusalemu wayile mukwivwa Yohani. Awazumila amawembuko yawo awabatizya nukuwabatizya muluzi mwe Yordani.

⁶ Yohani wazwalanga ivizwalo vyameya yangamila, numupango wamu­kwela mumutembeleko wakwe; walya. nga makanta nuwuchi wamulonde.

⁷ Wawumbulilanga awantu akuti, Umu­ntu wino asyalichile penene wakula wandusya; wino ntazipila nanti akwi­nama ukusapula indyatu zyakwe.

⁸ Nku­wabatizya naminzi, ukuwa weni aliwa­wabatizya nu Muzimu Mwimichile.

Ukubatizwa kwakwe Yesu nukwelezwa kwakwe

⁹ Apala pazimba katichi Yesu afuma mwe Nazareti, wamwe Galileya, aya abatizwa nu Yohani mwe Yordani.

¹⁰ Napaponapapo ala vino wazuwuka muminzi alola iyulu likwiyuka nu Muzimu wukwika pakwe weliwe ngati ankunda.

¹¹ Nizwi alifuma mwiyulu aliti, Wemwanane ekankundwa wane. Nkusechela nawe nkaninye.

¹² Napaponapapo Umuzimu awuleka aya mulumpalang'ang'a.

¹³ Aya ayikala kokonye amanda amakumi yani, alanga akwelezwa nu Satana. Ninyama zyalo­ndenye zyalinji kokonye, ukuwa awa­ngeli awaya kweneko awamupyunjila.

Yesu ayita awalondo wani

¹⁴ Walile pano Yohani wiyalilwa muvingololo, Yesu aya ku Galileya mukuwizya Ilandwe zima ilyakwe Leza. Ati,

¹⁵ Impindi yafichila, nu Wufumu wakwe Leza wapalamila! Tontolokwani kuluwembu lwinu musuwile Ilandwe zima!

¹⁶ Ala pano Yesu akupita mumbali yakwe sumbi wakwe Galileya, alola awalondo wawili, e Simoni numunyina e Andreya, wakulema inswi nikonde mwesumbi.

¹⁷ Yesu awanena ati, Nko­nkani, nandi njize mbasambilizye uwu­londo wakulema awantu.

¹⁸ Nanti kuzi­nguluka awasya amakonde yawo awa­mukonka.

¹⁹ Ala vino wapita katichi alola swinya awang'anda yonga wawili, e Jemusi nu Yohani, awanakwe Zebediya. Walinji muwato wawo wakuyania amakonde.

²⁰ Ala Yesu wawalola awita; awasya yisi e Zebediya muwato apaliponga nawantu wano walalisilwe, weni awa­konka Yesu.

Umuntu wino walinji numuzimu wuwipe

²¹ Awaya kukaya kakwe Kapema­humi, nga pawanda wasabata Yesu aya mung'anda yakupepela atalika ukusa­mbilizya.

²² Awantu wano walinji mwe­nemo awazunguka kumisambilizizye yakwe. Weni atalinji ndivino awasambi­lizya wamasundo; ukuwa weni wasambi­lizyanga namaka.

²³ Mung'andanye yoyo iyakupepela akwiza umuntu wino walinji numuzimu wuwipe apunda nkaninye ati,

²⁴ Nga ukasi utuchite chani, we Yesu wamwe Nazareti? Siwiza tonona? Nkumanyile: wentumi ntele iyakwe Leza!

²⁵ Yesu akalipila umuzimu ati, Mya­lala, ufume mumuntu!

²⁶ Umuzimu wuwipe awuyingania u­muntu ichilumelume, nga apunda afwi­na nkaninye, awufuma mwakwe weliwe.

²⁷ Awantu wonsi awazunguka awatalika nukuvwanzyania wakuti, Ngachonye­choo achani? Wuzye amisimbilizizye mipya? Umuntunye wee alinamaka yakusundila imizimu miwipe, imutonte­la nukumutontela!

²⁸ Achaleka Ilandwe lyakulumbililwa kwakwe Yesu akukwila munsi ya Galileya monsi nanti kuzimba.

Yesu apozya awantu wavule

²⁹ Awafuma mung'anda yakupepela awalungama kumwawo kwakwe Simoni nu Andreya; awapita apaliponga nu Jemusi nu Yohani.

³⁰ Enyinavyala Si­moni walwile inzekema alala pachitala, achaleka walanga pano Yesu wafika awamunena ivyandwala.

³¹ Aya kumu­lwale, amulema ikasa, amukatusya. Inzekema imutaya atalika awawapyu­njila.

³² Akula kwila, pano ilanzi lyinjila, awantu awatwalila Yesu awalwale wo­nsi wano walwile imizimu miwipe.

³³ Awantu wonsi awawungana pamu­lyango.

³⁴ Yesu apozya wonsinye wano walwile indwala zyamisango-misango afumya imizimu miwipe yonsi. Amyala­lika imizimu miwipe, amuno yamuma­nyile.

Yesu awawizya mu Galileya

³⁵ Uwacha mwepwi, pano ilanzi litani litunke, Yesu akatuka afuma mung'a­nda. Afuma mukaya aya ukuvwame, awapepa kweneko.

³⁶ Ukuwa Simoni nawawuye awaya mukumuvwamba;

³⁷ awala wamuzana awati, Wonsinye wakukuvwamba.

³⁸ Ukuwa Yesu awatolelela ati, Tu­yani kunji mutwaya twamumbali. Nako­nye nkawizye Ilandwe zima, amuno achino nizizile.

³⁹ Achaleka wapisile munsi ya Galile­ya monsi, alanga akuwizya mung'anda zyakupepela mbali nukufumya imizimu miwipe.

Yesu aswefya uwamambombo

⁴⁰ Uwamambombo aya kwe Yesu, afika asokowala, amulambilizya ukuti amutule. Ati, Ndachino ukulonda, unganswefya.

⁴¹ Ichilanda achilema Yesu, atamba­lika ikasa lyakwe amulema. Ati, Nku­londa, Telepa!

⁴² Napaponapapo ama­bombo ayafuma kumuntu aswepa.

⁴³ Ngapano Yesu akalipila umuntu aleka apita nanti kuzimba.

⁴⁴ Ati, Yivwa, utize ukanene wumwi. Ukuwa yanga kwesimapepo uleke akakuche­chete; ngapano ufime inzuwi zino Musa wakomelezya, kukulanjizya kwe­wonsi kuno kanonzi waswepa.

⁴⁵ Ukuwa umuntu apita asasya Ilandwe monsinye. Nachawuzimanye, wa­vwanjichisizye nkaninye chino chalesi­zye nu Uesu ukuya mukaya ichilola. Ukuwa, alanga ali wenga ukuvwame, awantu wavule awaya kweweliwe awa­fuma monsinye.