Luka 1 - WAKALATA WANO WALI

Amazwi yakulondolola

¹ Mukundwe wane Tiyofila: Awavulenye walesya ukuwalika ivyavintu vino vyachitwa mwesweswe.

² Wawalika vino twivwa kwewano wavi­weni pakutalika nukuviwumbula.

³ Achaleka, Mulali, muno nelelezya ivintunye vyoo ukufumilila pane vyata­lichila, achaleka nelenginie ukuti mba­walichile Ilandwe lyonsi ichete-chete.

⁴ Nachita wonye-woo alyakuti muma­nye ukusimichila kwavintunye vyoo vyonsi vino mwasambilila.

Ukuwumbulika kwankwatwa yakwe Yohani kabatizya

⁵ Pampindi yino Herodi walinji amfu­mu munsi ya Israeli, kwalinji esimapepo wino witwanga izina lyakwe Zakariya, wino walinji awamuchiwanza chakwe Abija esimapepo. Umuchi walinji we Elizabeth; nawenye walinji awamuchiwanza chawusimapepo.

⁶ Wonsinye wowiliwalinji awalungamane pankolelo paminso yakwe Leza, watontelanga amasundo niviwilo vya Mfumu e Leza vyonsi.

⁷ Watalinji nikwata limwi amu­no Elizabeth walinji ang'umba, swinya wonsinye wowili watezile wakota.

⁸ Wanda wumwi pano Zakariya wa­pyunganga umulimo wawusimapepo pankolelo pakwe Leza, ndimuno wachi­tilanga penye.

⁹ Ndimuno umwata wa­wusimapepo wawela, wasozilwe muvi­pendo ukuti awakocha uwusule wunu­nchile pakavuwa. Achaleka wayile mu­ng'anda ya Mfumu e Leza,

¹⁰ pano iwumba lyonsi ilyawantu lyapepanga palonde pampindi yakocha uwusule wununchile.

¹¹ Umungeli wa Mfumu amulolechela, afika ayimilila lwakwe ndilo pakavuwa kakochela uwusule wununchile.

¹² Ala Zakariya walola umungeli intete azimulema.

¹³ Ukuwa umungeli amunena ati, Utatina Zakari­ya! Amuno Leza wivwa ukulambilizya kwako, Elizabeth ewakwako wandi akukwatile umwanamonsi. Uyize umwi­te izina lyakwe Yohani.

¹⁴ Ye ulizewela wuli uwazevya nukuzevya, nawavulenye walizewela wuli pankwatwa yakwe!

¹⁵ Amuno aliwa amukulu nkani panko­lelo paminso ya Mfumu e Leza. Atali­wang'wa ipala nanti alipala lule. Ali­fuma wizuzwa nu Muzimu Mwimichile kuchalinye.

¹⁶ Alipetulila awa Israeli wavule ku Mfumu e Leza wawo.

¹⁷ Alikolela pankolelo pakwe Leza, nukukazawana namaka ndivino umutu­mwa Eliya. Alileka awakwasi nawana wawe apaliponga swinya; alipetula imintawela ukuti wapita munzila zyawu­lungamane; ukusenganizizya Imfumu e Leza awantu wakwe ukuti waye kwe­weliwe.

¹⁸ Nga Zakariya anena umungeli ati, Ngachonye-choo ndichimanya wuli? Vino nakota woo nuwakwanenenye awuliwonga.

¹⁹ Umungeli atolelela ati, Nenenye ne Gabrieli, nemuntu nkapakata Leza, wino antumile kukwiza kunena Ilandwe zima lyoo.

²⁰ Ukuwa wakana ukusuwi­la amazwi yane, yano yalila yale yafiswe pampindi yoyonye. Muno ukanile uku­suwila wandi uwe wewiwi; wandi ula­nge wewiwinye ukwizafika pawanda wuno ilayilizyo lyane lilifiswa.

²¹ Pampindinye yoyo awantu walindi­lilanga Zakariya, awazunguka chino wazimbila mung'anda yakwe Leza.

²² Ala wafuma apotwa ukuvwanga na­wo, achaleka awiluka awati walozwa mung'anda yakwe Leza. Muno chamu­posile ukuvwanga, wawasinizyanga awowo.

²³ Yalile pano impindi yakuwomba umulimo mung'anda yakwe Leza yasi­la, awela kumwawo.

²⁴ Pansizi pampi­ndinye yoyo umuchi Elizabeth awa napanji, alanga wikala mung'andanye kumyezi yisano.

²⁵ Ati, Kanonzi paku­pelelechezyanye apano Imfumu e Leza wanjavwa wonye-woo. Wamfumya inso­ni kuwantu!

Ukuwumbulika kwankwata yakwe Yesu

²⁶ Pamwezi wachitimutanda uwawula wakwe Elizabeth Leza atuma e Gabrieli umungeli kukaya ka mu Galileya izina we Nazareti.

²⁷ Aya anena umukazyana wino wimalwanga nu Jozefu, uwapachi­wanza chakwe Davidi amazwi. Izina lyamukazyana walinji we Mariya.

²⁸ Umungeli aya kweweliwe ati, Umu­tende wuwe nawe! Imfumu e Leza ali nawe, wakupepa walutilizya!

²⁹ Mariya atamichisya namazwi yano umungeli wamunenile awazunguka chi­no yasulanga.

³⁰ Umungeli amunena ati, Mariya, utatina, amuno Leza ali ninku­mbu nawe.

³¹ Wandi uwe napanji uyize ukwate umwanamonsi umwite izi­na uti we Yesu.

³² Aliwa amukulu aliwa­kwitwa aMwana wawamwilewelewe e Leza. Imfumu e Leza-nye alileka awe amfumu, ndivino yisikulu e Davidi walinji,

³³ aliwa amfumu yikwata lya­kwe Jekapu amanda nuwinji; uwufumu wakwe wutalisila nawanda!

³⁴ Mariya anene umungeli ati, Nga­chonye-choo chingawa wuli, vino ne­mwali wino ntamanya umonsi?

³⁵ Umungeli amutolelela amunena ati, Umuzimu Mwimichile wandi wu­kwizile, amaka yakwe Leza yalikuwila. Muno achonyechoo umwana wino alikwatwa aliwa amwimichile awakwi­twa aMwanakwe Leza.

³⁶ Yizuka uluko lwako Elizabeth. Chavwangwa chati atanga awe nikwata; ukuwa lola kano­nzi ali nuwula wamyezi mutanda, chi­ngatenga wakota awoo.

³⁷ Amuno pasi chimwi chino chingapota Leza ukuchita.

³⁸ Mariya ati, Nemuwomvi wa Mfu­mu e Leza, ndichiwe kwenene ndimuno wanenela. Nga umungeli afuma kwakwe weliwe.

Mariya aya asyungula Elizabeth

³⁹ Napaponapapo Mariya akatuka aya kunsi yamyamba, kukaya kamwe Yuda.

⁴⁰ Aya mung'anda yakwe Zaka­riya alamuka Elizabeth.

⁴¹ Ala Eliza­beth wivwa umulamu wakwe Mariya, umwana achena munda yakwe. Nga Elizabeth ayizuzwa nu Muzimu Mwimi­chile,

⁴² apazamuka ati, Wemwanachi mupepwe ukulusye awanachi wonsi, numwananye wino ulikwata aliwa amu­pepwe!

⁴³ Nga ichintu chikulunye ndi­choo chachitwa wuli kwenene, ichakuti nyina waMfumu ayize kwenene?

⁴⁴ Amuno pano nala nivwila umulamu wako numwana wachena nichimwemwe munda yane.

⁴⁵ Ye wewalongo wuli muno wasuwila kuno yano wivwa ku Mfumu e Leza yalifiswa.

Mariya ayimbila ulwimbo lwakutumvya

⁴⁶ Mariya ati, Umwezo wane wukutumvya Imfu­mu e Leza;

⁴⁷ numuzimu wane wazewela muno we Leza e Katula wane,

⁴⁸ amuno walanguluka umulanda umuntu wakwe! Ukufumilila kanonzi inkulo zyawa­ntu wonsi zyandi ziwati newalo­ngo,

⁴⁹ amuno avintu vikulu vino e Leza wamaka yonsi wanchitila. Izina lyakwe alitele;

⁵⁰ akuwanga ninkumbu kwewano wakamutina, awankulo nankulo.

⁵¹ Watambalisile ikasa lyakwe ilya­maka asasya awavilumba namelengania yawo yonsi.

⁵² Wisya izyamfumu zyamaka pa­ndulu zyawo, wakuzya awalanda.

⁵³ Wikusya awanzala nivintu viz ima, wawinga awachindame wapita makasavye.

⁵⁴ Wafisya ilayilizyo lino walayine nawatatakulu, wavwa umuwomvi wakwe e Israeli;

⁵⁵ ayizuka Abrahamu nawizikulu wakwe wonsi wawafwila inkumbu zyamuyayaya!

⁵⁶ Mariya ayikala nu Elizabeth imye­zi yitatu, nga awela kumwawo.

Inkwatwa yakwe Yohani kabatizya

⁵⁷ Apano impindi yakwe Elizabeth iyakupapa ifika, apapa umwanamonsi.

⁵⁸ Awawuye ninko zyakwe avivwa vino Imfumu yamufwila inkumbu nkaninye, awamusamalizya.

⁵⁹ Walile pano umwana wamala ama­nda kananimonsi awaya awamulemba uwusilamo; wakasi ukuti wamwite izina lyakwe Zakariya, eyisi.

⁶⁰ Ukuwa nyina ati, Awe lyolyo pole! Ukuwa izina lyakwe we Yohani.

⁶¹ Awamunena awati, Ukuwa paluko lwinu wumwi asikwitwa izina lyonye­lyoo!

⁶² Awasinizya yisi, awamuwuzya izina lino akasi ayite umwana.

⁶³ Zakariya alenga ekalata wakuwali­chila penepo. Awalika ati, Izina we Yohani. Wonsi awazunguka!

⁶⁴ Ngapa­ponye Zakariya atalika ukuvwanga swinya, atalika ukutumvya Leza.

⁶⁵ Intete azilema awawuye wonsi, ivi­ntunye vyonsi avisata munsi yamyamba yonsi iyakwe Yudeya.

⁶⁶ Wonsi wane wivwile awachiwika kunsingo awati, Nga umwananye-wee wandi awe wuli? Chamanyisilwe palwenzenye kuno ama­ka ya Mfumu e Leza yalinji nawe,

Uwutumwa wakwe Zakariya

⁶⁷ E Zakariya eyisi wakwe Yohani ayizuzwa nu Muzimu Mwimichile, atumwa ati,

⁶⁸ Ndi tuwachindika Imfumu e Leza wawa Israeli! amuno wizile mukutula awantu wakwe wawasapula mwikoli.

⁶⁹ Watukatusizya Katula wamaka, piwuvi lyakwe Davidi umuwomvi wakwe.

⁷⁰ Ndimuno wavwanjizile mumilo­mo yawatumwa wakwe awatele:

⁷¹ watulayilizizye ukututula kuwa­lwani witu, nukutupususya kumaka yakwe wo­nsi wane watupata.

⁷² Watili alifwila watatakulu inku­mbu. nukwizuka ilayano lyakwe ilya­muzilo.

^73-74 Walayilizizye alapa kwe tata­kulu Abrahamu, alapa kuno alitupususya kuwalwa­ni witu, ukuti tuwamupakata nanti ntete;

⁷⁵ tuwe swewatele swinya awalu­ngamane pakwe weliwe, muwumi witu wonsi.

⁷⁶ Ukuwa, wewenye mwanane, uli­wakwitwa wemutumwa wawa mwilewelewe e Leza. Amuno ulikolela pankolelo pa Mfumu e Leza kukuyania inzila yakwe;

⁷⁷ ukunena awantu wakwe ivya­kutulwa kwawo, nukutetelwa kwaluwembu lwawo.

⁷⁸ E Leza witu awankumbu nichi­kuku. Alileka ikomolwa lituwalile, ndivino ukucha kwamutondoto­ndo.

⁷⁹ Liwalile wonsi wano wali mumfi­nzi nawano wali muchizyungani cha­mfwa, ukututungulula munzila yamute­nde.

⁸⁰ Umwana awakula kumuwili nakumuzimu. Wikalanga mulumpala­ng'ang'a isuka impindi iyiza iyakuyiso­kolola ku wa Israeli.