Lamentations 1 - WAKALATA WANO WALI

Amalanda yakwe Yerusalemu

¹ Ye vino e Yerusalemu wino wizwile nawantu-pwi, vino wasowa nuwakusyala mwenemo! Kali wachindisilwe insi nuwukulu, kanonzi wasyala ngati amwanachi wino wafwilwa umulume; Utwaya tulumbililwe twasyala muwuzya.

² Akalila uwusiku wonsi; naminsozi yakapongoloka ayakonka amatama. Pewonsi wane wamukunzile kali, patasyala nanti wenga wino angamusansamusya. Iviwuza vyakwenye vyamukutilila, wonsinyepyu wamupata.

³ Awantu wa mwe Yuda wasyala awazya, wawingwa munsi yawo nuwakuwavwa wasowela kumwi. Waya wi kala munsi zinji, wasi namasyo yamwi— Waliwilizwa nawalwani, wasowa napano wangapusuchila.

⁴ Kanonzi pasi nanti wenga-wenga wino akuyanga kung’anda yakupepela Leza mumanda mimichile. Awakazyana wano wimbilanga mwenemo wakapunda iyapamutwe, nawasimapeponye wakalweta kutupu. Impongolo zyakaya zyayisyalila, nu Zioni ali muwulumila.

⁵ Awalwani wakwe wafotelezizye; awamulema awa amuzya wawo. Imfumu e Leza wamuyimvya muno aluwembu lwakwe uluvule. Nutunyanye twalemwa uwuntapwa twasendwa.

⁶ Ukulumbililwa kwawuzima wakwe Yerusalemu kwiwililwa. Wanankolelo wamwenemo wali ngati awampombo wane wakasamala awalumba, Wakapotwa nukuzana umulemvwe, kwela amaka yawo yawongoloka.

⁷ Kanonzi Yerusalemu wasyala amatongwa matupu, wasyala akwizuka ukulumbililwa kwawuzima wakwe ukukali. Pano waponezile mwikasa lyamulwani, wasovile nuwakumwavwa’ Achiwa achanseko kwewano wamuchimvizye.

⁸ Ukuchindikwa kwakwe kwasila; walemwa akanyanyangala, wasyala tupu. Akalweta, swinya akafisa impumi yakwe muno ansoni. Yerusalemu wayikombezizye nuluwembu lwakwe awa achikona.

⁹ Uwonzo wakwe walolesile palwenze, ukuwa nanti kupechela ivyakulowa kwakwe. Ukupona kwakwe kwalinji akwakutinia; asowa nuwakumusansamusya. Awalwani wakwe wamuchimvya, wasyala akalambilizya Imfumu e Leza ukuti amufwile inkumbu.

¹⁰ A walwani wakwe wamuposile insawo zyakwe. Alola wati wayilonga mung’anda yakupepela, Muno Imfumu e Leza walesizye amakandi ukwinjila mwenemo.

¹¹ Awantu wakwe wakalweta pano wakuvwamba chino wangalya; Wakalonzya insawo zyawo ukuti wakale ichakulya; alyakuti wapunge uwumi wawo. Akaya kakulila kakuti, Oko sindola we Mfumu Leza ndola ukuyimba kwane.

¹² Akalilila wensi wino akupita ati Sindola! Pasi nawumwi wino akatela ayivwa uwulumila ndivino nene, Uwulumila wuno Imfumu e Leza wamponezizye pane wamvitizilwe.

¹³ Watumile umulilo awufuma mupela, awunjocha lwamukasi. Wanteyile ichipingo antalamula pansi. Apano andechelezya, ansya muwulumila wamanda yonsi.

¹⁴ Alolechesya uluwembu lwane lonsi, alunyepa apaliponga; Alunyepelela munsingo yane, ntonta nukung’wamilwa. Imfumu e Leza andemeka kuwalwani wane nsowa nichakufungula kwewoliwo.

¹⁵ Imfumu e Leza aseka kuwavita vyane awakalambane; Atuma ivita vyakwe kukwizandwisya avilovya awalumendo wane pyu. Asyonongola awantu wane awazima ndivino awantu wakafina ivikomwa ivyakusuta ipala.

¹⁶ Achaleka muminso yane mukatantala aminsozi. Pasi wino angansansamusya; nu wakunsimpisya wasowela kumwi. Awalwani watuchimvya; awantu wane wasyala makasavye.

¹⁷ Nkatumpula amakasa yane, lelo asowa nuwakunjavwa. Imfumu e Leza wanjitila awalwani wiza mukundwisya monsi-monsi; Wanchita ngati awusali.

¹⁸ Ukuwa Imfumu e Leza awakusimichila, amuno nakana ukumutontela. Sinjivwani mwemyiko yansi zyonsi; lolani vino indi nuwulumila. Awalumendo wane nawakazyana walemwa wawa antapwa.

¹⁹ Nakutizile iviwuza vyane inkuta, ukuwa awakana ukunjavwa. Wasimapepo nawanankolelo wafwizile mumisolo yakaya, Awalanga wakulunkuwa wakuvwaamba chino wangalya ngawapungwe uwumi.

²⁰ Oko we Mfumu Leza, sindola uwulumila wane, ulole ukung’wamilwa kwamuzimu wane! Umwezo wane wafwa fwe muno aluwembu lwane. Mumisolo muli uwuchikoma wutupu, namumilyangonye amfwa ntupu.

²¹ Siyivwa vino nkulweta; nasowa nuwakunsansamusya. Awalwani wane wasechela muno wampunguluchizya umupamba. Sale leta uwanda wuno walayilizizye; uleke awalwani wane nawo wayimbe ndivino nkayimba.

²² Wapanzye kuwuwipe wawo wonsi: Wasunde ndivino nani wansunzile kuluwembu lwane. Nkulweta muno akuyimba kwane numwezo wane watotowala.