Joel 1 - WAKALATA WANO WALI

Ukulosya muno akononeka kwa vizawalo

¹ Amazwi ya Mfumu e Leza kwe Joel, umwanakwe Petuel, ayakuti,

² Si-teyelezyani, mwe wasongo, nawila muntu wensi uwa mwe Yuda, ndi ateyelezye. Wuzye ichintu chimwi ichamwata ndi woo chikatela achiloleka muwulanzi winu, pamwi pa mpindi yakwe waso?

³ Landilani awana winu chochonye; nawo wize walandile awana wawo, nawawonye wize walandile inkulo zinji.

⁴ Makanta mukulu walile ivizawalo vimwi, nga makanta mwana uwachisensela alya ivizawalo vino vyasyazile.

⁵ Ziwukani, lilanji mwe wachakolwa-mwe. Si-lilanji mwensi mwe waching’wipala; ivikomwa vyakusut’ ipala ’pya vyati avyononwa.

⁶ Isumo lyakwe makanta lyasandika insi yitu; ali na maka makulu swinya amuntapendwa; swinya amino yakwe yakola ngati ayachimbwi.

⁷ Wononile imiti yavikomwa asyola imikunyu yitu yonsinye. Wayifopolania amapapa pyu, achaleka ninsamba zyasyala palwenze.

⁸ Mwe wantu si-lilani ngati amukazyana wino akulosya imfwa ya monsi wino wakalonda ukutwalana.

⁹ Pas’ ulupumba nanti longa nanti alipala ivyakufima mu ng’anda yakupepela Leza; mwe wasikapemba mwe wantu mukatwala ivifimwa ku Mfumu e Leza, losyanji.

¹⁰ Muvyalo mwasyala muli ngwa; insi ikulosya amuno ingano yononeka, ivikomwa vyakala, ni miti ya mingungu nayonye yanyala.

¹¹ Si-lilizikanji mwe walimi, lilanji mwe wantu mukalima nu kusayila ivyalo vya vikomwa, amuno ingano ninkumba ni vizawalo vyonsinye pyu vyononeka.

¹² Imiti ya vikomwa yakala ’pyu, nayo imikunyu yapululuka, imiti yamalongwe, utunchindu, ni miti yavikomwa yonsinye yanyala pyu. Nichimwemwe cha wantunye nacho chasila.

¹³ Mwe wasikapemba mwe wantu mukafima inzuwi pakavuwa ka 2 Mfumu e Leza zwalani ivizwalo vyamalosyo muwalosya, yinjilani mu ng’anda yakupepela Leza, mwikale momonye uwusiku wonsi mulange muzwite ni myenda yamalosyo. Amuno kusi ulupumba nanti longa, nanti avyakung’wa vimwi ivyakufima mu ng’anda yakwe Leza winu.

¹⁴ Yuma imbila unene awantu ivyakusolezya ukulya, uwunganike iwungwe kukuya kukupepa, uwunganike wasongo na wantu wonsi awa mwe Yuda, mwinjile mu ng’anda yakupepela Imfumu e Leza winu, mumulilile.

¹⁵ Uwanda wa Mfumu e Leza wapalamila; wandi wulete uwononi wukulu wufume ku wa Maka Yonsi. Uwandanye wowo wuliwa awamanzi nu kutinia!

¹⁶ Ivizawalo vyononilwe paminso yitunye: mu ng’anda yakupepela Leza witu musi ichimwemwe.

¹⁷ Imbeyu zyafwila mu musili wukale, Kusi amalezi yakulonga, achaleka munkoma musi chimwi, zyamongoka.

¹⁸ Yemwe, vino ing’onzi ni ng’ombe zyalila inzala! Amawufyo ya ng’ombe yakulungana, amuno umulemvwe wakwe zyolizyo nawumwi. Na mawufyo ya ng’onzinye yakuyimba.

¹⁹ Nkukulilila wewenye Mfumu Leza, muno isote ni mitinye vyakala, vili ngati vyapya kumulilo.

²⁰ Ni vinyamana vyalondenye navyonye vikukulilila wewenye, muno ni nduzinye zyakala, nisote lyakala lyawa ngati lyapya nu mulilo.