Ayizeya 1 - WAKALATA WANO WALI

¹ Mwekalata wee muli amazwi yano Leza wawumbuzile kwe Ayizeya umwanakwe Amozi kuvyansi yakwe Yuda nu Yerusalemu, pampindi yino Uziya, Jothamu, Ahazi, nu Hezekiya zyalinji azyamfumu zya mwe Yuda.

Leza akalipila awantu wakwe

² Imfumu e Leza ati, Wensi-we nawe liyulu, teyelezyani chino nenenye ne Mtumu e Leza, nkutaka! Awana wano nenenye nakuzya wansanguchila.

³ Ing’ombe zikamanya yisikulu, nindokwenye zikamanya wino akazichema. Ukuwa awantu wane weni watamanya chonye-choo. Watapechela nanti akupechela.

⁴ Ye mwalowa wuli, mwe mwiko waluwembu-mwe, mwewachiluchilumwe awawembu wakulu! Mwewantu uluwembu lwinu lukawakwemela pansi! Mwakana ni Mfumu e Leza, e Leza mutele wawa Israeli, mwamufutatila.

⁵ Ngamuno achani chino mungalanga mwalandalila uwuchisanguka? Wuzye mukulonda ukusundwa swinya? We Israeli, ngavino muchimutwe chako avilonda vitupu, nichimwezo chakonye namano vyalwala.

⁶ Ukufumilila kumutwe ukufika kumatamba usi we mupuma nanti katichi-tichi mumuwili wako. Uli nimimfwanu mitupu nivilonda na vimwi vyatopoka. Ivilonda vyako ’vitopoke vitapwizwa nantiakunyeoelwa, Numulembo wusi penepo.

⁷ Insi yinu yasyala amapopa nutwaya twinu tochwa twamongoka nukumongoka. Namwe mukulola nukulola, kuno amakandi yakusenda insi yinu mbali nukonona ivintu vyonsi.

⁸ We Yerusalemu wenganye-nsu awino wasyala ayimilile, akaya kano kaliwilizwa —nichakuchita nachimwi ali ngati akang’anda kakwe kalima wachalo chamiti yavikomwa vino wakasuta ipala, pamwi ngati akalipembo muchalo chavimimbi.

⁹ Ndachino Imfumu e Leza wamaka yonsi atalondanga ukuti awantu wamwi wapusuke, ngali Yerusalemu wononwa wasowa napakusyala, ngati we Sodomu nu Gomora.

¹⁰ Iye we Yerusalemu, ngavino izyamfumu nawantu wamwenemo wali ngati awantu wa mwe Sodomu na wamwe Gomora. Kanonzi teyelezya chino Imfumu e Leza akuwanena. Teyelezyani chino e Leza witu akuwasambilizya.

¹¹ Akuti, Wuzye mukwelengania mukuti nkalonda izyanzuwinye zyoo zino mwanda mukamfimila? Napochelela natonta inzuwi zyang’onzi zinu zino mukanjochela, ni nyama zinu inzima injine. Natonta nuwazi wankambaku zinu nuwang’onzi nimbuzi.

¹² Ngaweni wawanenanga ukuti muwandetela vyoo pano mukwiza mukumfukamila? Ngaweni wawanenile ukuti mulange mukulyata-lyata mung’anda yane iyakupepela?

¹³ Nsinakulonda swinya ivifimwa vinu ivyawuwelewele. Ukununka kwawubani winu wuno mukafima kwamfutila. Ntanga nzizimichizye kuvyakulya vinu ivyakuyitopwa ivyamyezi mipya, nivyamanda yakusolezya, nanti amawungwe yinunye ayamapepo; vyonsinye vyakombezwa nuluwembu lwinu.

¹⁴ Napata ivyakulya vinu ivyakuyitopwa ivyamyezi mipya nivyamanda matele. Vyawa avisendo vikumpota nukunyamula.

¹⁵ Ndi mwatumpula amakasa yinu mupela pane mukupepa ntalilolechesya kweneko. Chingatenga nanti ndi mungapepa muti wuli, ntaliwateyelezya, amuno amakasa yinu yakombela nuluwembu.

¹⁶ Sambani muswepe. Lekani uluwembu lonsi luno nkalola mukuchita. Nachawuzimanye, lekani ukuchita uluwembu,

¹⁷ musambilile ukuchita ichete. Muwalungamika vyonsi—muwakwavwilizya wane wakukwelengulwa, muwachitila nawandekwa ichete, mbali nukuchinjilila awanachi wafwilwe awalume.

¹⁸ Imfumu e Leza wavwanga wati, Kanonzi, nkasi twivwane. Mwakombela nuluwembu luwenzu-che, ukuwa nandi mbapwizye muwe ngati wesusuwe. Chingatenga nanti ndi uluwembu lwinu Iwinjila nkani Iwawenza-che. Ukuwa naponye mwandi muswepe ngati wepamba.

¹⁹ Muwatontela nenenye nenga, mwize muwalya nivizima ivyamunsi.

²⁰ Ukuwa ndimwakana mwankwelengula, ye peni mwazipila imfwa mulowe. Anenenye ne Mfumu e Leza navwanga.

Akaya kaluwembu

²¹ Akaya kano kali kalinji akasuwilwa kanonzi kawa wechilende! Pakutalika awantu walungamane wikalanga mukayanye kako, ukuwa kanonzi mwikala wachikoma watupu.

²² Ye we Yerusalemu, ngavino kali walinji ngati we silivara, ukuwa kanonzi wawa wechavye-chavye; walinji ngati alipala zima, ukuwa kanonzi wasyala ’minzi matupu.

²³ Awawuyo weni wawa awachipiluka wakumbilizyania nawang’o awano wawa aviwuza vyawo; wakapochelela ivyawila nivilipwa vyamunkama. Wasilonda nanti akuchinjilila wandekwa mumapembo yamilandu, wakakana nukupochelela imilandu yawanachi wafwilwe awalume.

²⁴ Achaleka ale kanonzi we Yerusalemu, yivwa chino Imfumu e Leza, e Leza wamaka yakwe Israeli akutaka: akuti, Ndilandula kwakwe mwemwe mwewalwani wane, mbaputule nivikanza vino muli navyo.

²⁵ Nandi mbalozye. Nandi mbaswefye ndivino ichela chikakwengululwa achiswepa mbafumye ikombezya lyonsi.

²⁶ Nandi mbape awantu wakuwatungulula nawakuwapa ilango ndivino wawo wane mwalinji nawo kali. Apano Yerusalemu aliyitwa amulungamane akaya kasuwilwa.

²⁷ Amuno Imfumu e Leza amulungamane, alitula Yerusalemu atule nawonsi wane wali mwenemo ndi watontolokwa.

²⁸ Ukuwa alisyutungula wonsi wane wakawembuka swinya nukumusanguchila; ayize akome wonsi wane wamukana.

²⁹ Chiliwapa insoni pakwizuka kuno mwafukamilanga imiti nukukomela ivyalo vino mwimichizile.

³⁰ Mulinyala ngati amuwuyu wuno wati awuwakala, ngati achalo chino wumwi asikwitilila aminzi.

³¹ Ndivino intemele nkale ikapya nulupya, awowonye avino awantu wamaka waliyononwa nimilimo yawo imiwipe yino wachita, pasi nanti wenga wino alilesya uwononinye wowo.