Amasundo 1 - WAKALATA WANO WALI

Ivya mwe Kalata wee

¹ Mwekalatanye wee amuno muli ivintu vino Musa wanenile awina Israeli pano walinji mumavunje kapela kaluzi lwakwe Yordani. Walinji mumupata wakwe Yordani mupipi nu Sufi; akaya kakwe Parani kalinji mbali, nutwaya twakwe Tofeli, Labani, Hazeroti, nu Dizahabu mbali zinji.

² (Amusinzo wamanda ikumi nuwanda wonga ukufuma pa Mwamba Sinai ukufika kwe Kadeshi Barnea ukupita inzila yamyamba yakwe Edomu.)

³ Pawanda wakutalika wa mwezi wachiti-ikumi numwezi wonga wamwaka wachiti amakumi yani ukufumilila pane wafumizile mu Ijeputi, Musa wanenile awantu vyonsi vino Imfumu e Leza wamukomelezizye ukuti awanene.

⁴ Choo chachisilwe pane Imfumu e Leza wachimvizye e Sihoni imfumu ya wa Amori, wino walinji amfumu ya mu Heshiboni, papano wachimvizye Ogi imfumu ya mu Bashani, wino walinji amfumu yatwaya twakwe Ashitaroti nu Edrei.

⁵ Pano awantu walinji kapela kakwe Yordani munsi ya Moabu, Musa atalika ukulondolola amasundo yakwe Leza nimisambilizizye yakwe. At,

⁶ Pano twalinji pa Mwamba Sinai, Imfumu e Leza, e Leza witu watunenile ati, Mwikala impindi yakula pamwamba woo.

⁷ Mongolani nkambi, muwapita. Yanji kunsi yamyamba ya wa Amori na kumasyo yonsi yano wano wapalamana nawo wakakwikala mumupata wakwe Yordani, munsi yamyamba, niyamusenene, kukambazwa, nakwakwe sumbi wakwe Mediteraneani. Muye kunsi ya Wakenani ukuchila Umwamba Lebanoni ukuyafika kuluzi lukulu Yufureti.

⁸ Lolani, yoo ayil’ insi yino Nenenye, ne Mfumu e Leza, nalayilizizye ukupa wasokulu, Abrahamu, Ayizeki, nu Jekapu, nukwizapa ikwata lyawo. Kokonye yanji ikawe ansi yinu.

Musa asontola Wakapanzya wakuwatungulula

⁹ Musa ati, Pampindinye yoyo nawanenile inti, Umulimo wakuwatungulula wamvinda nkaninye, napotwa. Ntanga mbuchite nenga.

¹⁰ Imfumu e Leza, e Leza winu wawanyamya ngati antanda zyamupela.

¹¹ Sivyo Imfumu e Leza, e Leza wakwe wasokulu, aleka amonjelezya ukunyama impindi imyanda ikumi, aleke muwasangalala ndimuno walayilizizye!

¹² Nga nenenye nenga ingasenda umulimo wung’wame uwakutasya impokoto zinu wuli?

¹³ Solani mu myiko yinu yonsi awamano wamwi, wano wali ninjele zyakwiluka, nandi ndeke wawe awasongo winu.

¹⁴ Namwe mwazumizile amuti choo achintu chizima ukuchita.

¹⁵ Achaleka mwasozile awantu wano wamanyile ukukolelela na mano ukufuma mumyiko yinu, mbasenda, ndeka awawa awasongo winu. Wamwi walinji awasongo pawantu imyanda ikumi, wamwi, pamwanda, wanji pamakumi yasano, nawamwi pikumi. Swinya nasontozile ninkombe zinji mumyiko yonsi.

¹⁶ Pampindinye yoyo nawalayilizizye inti, Yivwanji kumpokoto zyonsi zino zikwiza kwe mwemwe izyawantu winu. Muwapanzya impokoto zyonsi ichetechete, chingatenga ampokoto yawantu wako nanti ayaweninye wano mwikala nawo.

¹⁷ Mutize muwayumbila mbali pakupanzya kwinu; muwapanzya wonsi mumwata wuliwonga, chingatenga awe amuntu-chi. Mutize muwatina umuntu wumwi, amuno amapanzyo yinu yafuma kwe Leza. Ndi umulandu wumwi wawatalila, amuwuleta kwenene, njiza mbupanzya.

¹⁸ Pampindinye iyiliyonga nawasambilizizye vyonsi vino mungachita.

Amanengwe ayatumwa ukufuma pa Kadeshi Barnea

¹⁹ Twachisile chino Imfumu e Leza, e Leza witu watukomelezizye ukuchita. Twafumile pamwamba Sinai atupita mulumpalang’ ang’a lukulu ulwakutinia atufika munsi yamyamba ya wa Amori. Twalanga vino twafika pa Kadeshi Barnea,

²⁰ Nawanenile inti, Kanonzi mwiza munsi yamyamba ya wa Amori, insi yino Imfumu e Leza, e Leza witu akutupa.

²¹ Lolani, Yoo ayil’ insi yino Imfumu e Leza, e Leza wakwe wasokulu akutupa. Yanji ikawe ansi yinu ndimuno wakomelezezizye. Mutize muwatina nanti akutentemuka.

²² Ukuwa mwizile kwenene amuti, Tukulonda tukolezye awantu pankolelo ukuyanengula insi alyakuti wangiza watunene inzila nzima iyakupita watunene namuno utwaya twamwenemo tuwezile.

²³ Ilango lyalinji alizima, achaleka nasozile awantu ikumi nawantu wawili, wenga mwakwe wila mwiko.

²⁴ Wayile munsi yamyamba awaya awafika ku Mupata wa Eshikolo awawulola.

²⁵ Kokonye wayile awakuntula ivikomwa vimwi awatuletela, awalongola awati insi yino Imfumu e Leza, e Leza witu wandi atupe ansi yamuvundo nkaninye.

²⁶ Ukuwa mwapiluchizile isundo lya Mfumu e Leza, e Leza winu nanti kuti mukinjile munsi.

²⁷ Amuwakwinulukakwinuluka amuti, Imfumu e Leza watupata. Achino watufumizizye mu Ijeputi ukuti ayize atulemeke kwe waa awa Amori ukuti watukome.

²⁸ Ngachani chino tungayila kweneko? Tukutina. Awantu wano twatumile wakutunena wakuti kuli awantu wakazawane ukulusye sweswe. Wakutunena wakuti wakwikalanga mutwaya twamalinga yano yafika mwiyulu. Swinya kokonye wayile awalola iviwantu vikulu.

²⁹ Ukuwa nawanenile inti, Mutize muwatina iviwantunye vyoo.

³⁰ Imfumu e Leza, e Leza winu wandi awakolelele, awalwile, ndivino mwaweni wachita mu Ijeputi,

³¹ namulumpalang’ang’a, Mwaweni vino wawalesile koo, inzila yonsi ukwizafika kumasyonye yaa, ndivino yisi wamuntu akasenda umwanakwe.

³² Ukuwa chingatenga nawanenile wowonye, naponye mutatela musuwile Imfumu e Leza,

³³ wino penye wakolelanga pankolelo pakwe mwemwe ukuyazana amasyo yakuzenga inkambi yinu. Wawakolelelanga muntumba yamulilo uwusiku, namuntumba yiwingo umusanya, ukuwalanjizya inzila.

Leza alayilizya awa Israeli

³⁴ Imfumu e Leza wivwile ukukwinuluka kwinu avitwa. Ayuma imbila alapa ati,

³⁵ Pasi nanti wenga-wenga pakwe mwemwe uwankulonye yoo iyaluwembu wino aliyinjila munsi yamuvundo yino nalayilizizye ukupa wasokulu.

³⁶ Suka ndi we Kalebu-nye nsu umwanakwe Jefune awino aliyinjila mwenemo. Wasyazile amusuwilwa kwakwe nene achino nani ndimupa njize impe nikwata lyakwe insi yino waya walola.

³⁷ Imfumu e Leza wamvitizilwe naninye muno amwemwe, ati, Nanti awewenye Musa, utaliya ukunjile munsi,

³⁸ ukuwa ekavwa wako, e Joshua umwanakwe Nuni, awino aliyinjila mwenemo. Musimpisye. Awino alitungulula awa Israeli ukuyayinjila munsi.

³⁹ Ngapano Imfumu e Leza watunenile swensi ati, Awana winu wano wachili atunya wane watamanya ichizima nanti achiwipe awano waliyinjila munsi, awana wano mutili walilemwa nawalwani winu. Awano ndiwapa insi wakikalange mwenemo.

⁴⁰ Ukuwa mwenji, petukaninye munyochele mulumpalang’ang’a munzila yino yalungama kwesumbi Wamatete.

Awa Israeli awachimba pa Horima

⁴¹ Mwatolelezile amuti, Musa, twawembuka ku Mfumu e Leza. Ukuwa kanonzi twandi tukalwisye, ndimuno Imfumu e Leza, e Leza witu watukomelezezizye. Paponye apano wensi uwakwe mwemwe wayisenginie ukulwa nukwelengania ukuti achipepuke ukupoka insi yamyamba.

⁴² Ukuwa Imfumu e Leza wanenile ati, Wasochele watize walwisye, amuno ntandi imbe nawo, awalwani wawo wandi wawachimvye.

⁴³ Nawanenile chino Imfumu e Leza watasile, ukuwa mutatela mupechele. Amumupiluchila amuwa ni chilumba amuwapita ukuya munsi yamyamba.

⁴⁴ Ngapano awa Amori wano wikalanga mumyambanye yoyo awawavundumuchila ngati achipupu chanzimu. Awawasambula awawachimvya pa Horima munsi yamyamba yakwe Edomu.

⁴⁵ Achaleka mwalilizile Imfumu e Leza ukuti awavwe, ukuwa atatela awivwe nanti akupechela atatela apechele.

⁴⁶ Muno achochonye achino mwikalizile pa Kadeshi impindi ntali.