Yunus 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Yunus en Allah iak sagalogo ukpoluk laga wene

¹ Agauwa mesik pam e, at Nenaik ’gain Onuk Logo a’ge en ap Amitai omlogo onuk Yunus ai disogo mo’gulesi,

² “Hat hebe perlenesogo inotluk e, o kota Niniwe lokma ano lu o. Loluk e, is wiak modok togwi a’ge ai an arat naluk egirik welegi ai en e, Allah en wiagaphonobua, oluk hoso’bi hiak ningsogo mo’gulontomup o,” oluk mo’gulesi.

³ A’geat de, at Yunus ede en e, Allah ukpoluk emin wolom pukmu en ogoiyesogo walegat o Spanyol laik, oluk ede eberegei. Asogo eberegeitik, o Yope laga ’gal e, aphwami ik so pam o Spanyol louwogoluk togumu entai laga. Entai lagarik e, so ano o’go wogontoluk, ogola ’gwegeitik, Allah ogoiyesogo ukpoluk is enemin o Spanyol walegat louwogoluk legesa.

^4-5 Lagalat, at Yunus ano so olukhwe akhit o ’berlapmu ’gela’ge ’begeitik nogo lebeksogo nogosi. Asogo nogo lebek osokhwe, at Allah en yasobu annisogo ik laut pam perakpou waga. Yasobu ano loksogo punhau wagalat e, ik hererimtak logat tagalat, so wiak om ’gela’ge aga. Asogo agoam e, is ap so woluk legesa a’ge ebano onogorlok a’bik hegesa. Onogorlok otluk enasua lo’bok yo’go pogulat, ye, so ano se emagoluk suma’ge so ogola yagarak a’ge ik olomu hwik-hwak hogulat, tigisa. Is asogo til lagalat e,

⁶ is ap so woluk legesa a’ge ebano onue ai so ogola ’berlapmu ’gela’ge ano ’begei ’gal e, Yunus nogo osoma il hesirik e, disogo mo’gulesi, “Disogo togukhweat de, nogo u no? Helaluk emin o. Hat haik erliktaga legen a’ge ai en nis edeapnonoboluk e, nenebe almarema no oluk, delnonobu a’ge wolom o. Holuk e, yo’go pemen o,” oluk mo’gulesi.

⁷ Mo’gulesirik, e’birek orlu egesema re, is so woluk legesa a’ge ebano en is-is nak ogulat, “Edip sa wiak tegeimu nis wene nenebam aga, oluk nenede we’gerlemagoluk, helebe’gen hwikhai lagalat, hwikhau wagalat, tuok o,” oluk egesarik walhegesa a’ge re, at Yunus ebam aga.

⁸ At ebam agama re, is en at disogo mo’guligisa, “Demat hat wiak tigenma nis wene nenebam aga ya? Perlenesogo mo’gulnentemin o. Hat yabuk ’gesogo tise legen a’ge? Hat howi o ’ga a’ge? Ha’gul onuk e, ’ge a’ge no?” oluk hin wokhegesa.

⁹ Asogo hin wokhegesema at en e, “An nebe Ibrani a’ge o. Ye, naik Allah ’gain Onuk Logo ’bogorl pam a’ge ik laut ye’gelak emin, ’gwiang emin, walhesi a’ge ai, erliktaga legi a’ge o,” oluk mo’gulentesi.

¹⁰ Asogo mo’gulentesirik, mesik disogo egei, “Asogo erliktaga legi a’geat de, an at iak sagalogo ukpoluk, ogoiyesogo hweiye o walegat laik, oluk wegirikmu o,” oluk mo’gulentesimu, is ap ebano enesa’go hwelegisarik e, ebenagaikmu onogorlok otluk e, disogo mo’guligisa, “Hat modok wiagat tigenma o,” oluk mo’guligisa.

¹¹ Asogo ogukhwe erianoat, ik ebenagaikmu annisogo hererimtak modok mu ebelesogo tegei. Asogo tagoam, is ebano en e, Yunus disogo mo’guligisa, “Ik hererim en nis watnonobuano oluk, ha’buk uagoluk, nis en hat ’gesogo takhobo?” oluk mo’gulegisema re,

¹² at Yunus en e, “Edip anat wiak tegismu ik hererim modok lok en wathonobu ’gela’ge ago ai, an arat pobi tegis o. Holuk e, an nebe ha’boksogo ik laut pam ’belaknebagupmu yasobu o’borlogouk ha’buk ua o,”

¹³ oluk asogo mo’gulentesi a’geat de, is ap ebano so ano wusogo sogulogo ik laut esa’goma lo’bok laumogoluk enannisogo werigisa a’ge re, ik hererim modok ebenagaikmu sebelenebigoluk tegeimu wom ebele mia aga.

¹⁴ Miayat agama re, is en eniak loksogo Nenaik ’gain Onuk Logo a’ge disogo mo’guligisa, “Nenaik! Hat hogola hagai hegen hegitsogo taknenebasu legen ai en, ap yu en nis wiak logon taknonobo erlak a’geat de, ik olomu pelang hul ai, at emep nis nenebam poluk wiagap nonobogun no yo!” oluk yo’go pegesa.

¹⁵ Asogo yo’go pegesarik e, Yunus ano ha’boksogo ik olomu ’belakpegesema re, ik hererimtak modok sebelonobu ’gela’ge taga laga a’ge ano arat ha’buk egei.

¹⁶ Ha’buk egeimu re, is ap ebano onogorlok modok a’bik aga. Onogorlok otluk, onuam mesik Allah paget wusogo narlik ebegesarik, is en e, “Nis hat heiyagai omul o,” oluk onuk ho’buk ’balogo mo’guligisa.

¹⁷ Is asogo til lagaihwe re, at Allah en hiane lok a’ge mesik yo’go pesimu, Yunus ano ebe haumsogo ogum ogola ’gwelakpesi. Asogo ’gwelakpesimu, o hup agalat, dakha eselat, tisokhwe, agauwa henagan hiane ogola modok welaga.