Yosua 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Allah en e, “O Kanaan sebeli ’gwi lu o,” oluk Yosua mo’gulesi wene

¹ Nenaik ’gain Onuk Logo a’ge en, at eragam a’ge Musa ebe waragarikmu en, at Musa ot Yosua, ap Nun omlogo disogo mo’gulesi,

² “An neragam a’ge Musa ebe arat waragarikmu re, yogodak hat emin, aphwami Israel a’ge ’berlegat emin, ik Yordan ’balogo, o an en wokhentaikmu eba ’gogup en e, di a’ge yu a’ge degelogo pomup o.

³ An en Musa mo’gulegis ’gela’ge, o hat hoyuk sobut hagun o’gwe ’berlegat hat hebe emin, an neiyagai Israel a’ge ’berlegat emin, wokhentaik o.

⁴ Honowi wolorogupmu eba ebe re, o leimu aphwami erlakma ik o’but hegit eba en ’bekhit ik elaruk hegit o Libanon hwerli dom petne emin, ye, ik lok Efrat mo yegelogo orlu ago hegit en ’bekhit aphwami ena’gul onuk Het a’ge onowi pam en hwerli ik laut onuk ’Burl a’ge mo obuksogo ’gwi lasu hwerli eba ’berlegat wolorogup ani o.

⁵ An en naduk Musa tenak modok welegi ai ’gela’ge, hat ukhobo erlakma en tenhiarok modok weleik ai en e, aphwami mu a’ge en hat modok mi-miarak hobo elit erlak o.

⁶ An en hene’balak o ’gwiang wogentaigoluk wene werak enebegimu eba hat en is wogonoboluk o eba sebeluogoluk ’gogun ai en e, hede ha’buktak poluk, hogorlok erlaksogoat wolomup o.

⁷ Holuk e, an neragam a’ge Musa en e, Disogo tip, asogo tip, oluk mo’gulhentesi a’ge ano mesik sagalogo ukpo erlakma en hwelak poluk nak togun en e, hede ha’buktak poluk, hogorlok erlaksogoat wolomup o. Wene ai a’ge weisogo logon ukpo erlakma en, hegitsogo nak togun holuk e, hat en di paget yu paget tagokhwe re, elit nak aga lema ani o.

⁸ Hat en e, wene an Allah en, Disogo tip, asogo tip, oluk egimu pelal wogo oruak a’ge ai, ’berlegat hegitsogo taga leigoluk holuk e, wene ebe pelal wogo a’ge ai, hup erlige onuk mo’guliso modok wolomup o. Asogo tagalat, wene pelal wogo a’ge ai ’berlegat an neiyagai enilem onuk mo’guliso modok wolomup o. Hat en ’berlegat asogo taga lorogun holuk, hat hebe op welat, di paget yu paget tagoam e, elit nak aga lema ani o.

⁹ An en e, Hede ha’buktak welat hogorlok erlaksogo wolomup o, oluk hesa’go weregis a’ge ai, hede eberak modok wolomup o. An haik ’gain Nonuk Logo a’ge en e, hat ’geba lagun holuk, tenhiarok modok weleik ai en e, hede perik welat hogorlok en, he’gik hebit pam tagalat, tu mia o,” oluk mo’gulesi.

Yosua en, “Disogo tip, asogo tip,” oluk mo’gulesi wene

^10-11 Asogo mo’gulesimu, at Yosua en e, aphwami Israel a’ge ’berlegat onowi sum owi a’ge werik o’gwe oruakma onuelak en disogo mo’gulentil laga lemagoluk, mo’gulentasulat, “O nene’gik agauwa ’biren wolomtik tono at ik Yordan henaganak a’ge en, o Nenaik ’gain Onuk Logo a’ge Allah en woknontouwema ik etle akhit libotluk eba arat sebelul ai en e, henebabut heberlogo welat, di a’ge yu a’ge degelogo pomup o,” oluk mo’gulentil louwagoluk mo’gulentesi.

¹² Asogo mo’gulentesirik, aphwami ena’gul onuk Ruben a’ge emin, Gad a’ge emin, ena’gul onuk Manasye a’ge logon emin, disogo mo’gulentesi,

¹³ “At Musa Nenaik ’gain Onuk Logo a’ge Allah eragam a’ge ano en e, o ik Yordan abel yu akhit mo yegelogo orlu ago hegit yema his honowi eiye orogup oluk Nenaik ’gain Onuk Logo a’ge en wokhontouwa ani o. His eba set hwalogup, oluk mo’gulhentesi a’ge ano henede eberak wolomup o.

¹⁴ Holuk e, henemalik honugwami ’berlek emin, honuam emin, o yema oruakhwe re, honosi tentara his henebaget weim obua a’ge nak e, enarilak ap Israel a’ge logon mu a’ge ena’gul onuk logon pobuk weim obogwiam en de, lerontouwogoluk, is naduk wa’gun segen woluk naduk ik Yordan ’balogo lebemak o.

¹⁵ Lobotluk e, is en lerontoluk, o ik Yordan etle akhit o mo obuk oso hegit Nenaik ’gain Onuk Logo a’ge en woknentesimu eba sebelo ’guak o. Asogo sebelo ’gogwiam, Nenaik ’gain Onuk Logo a’ge en is aphwami Israel a’ge ena’gul onuk logon eba ’berlegat opsogo la’bulogo enebasuam, is togolik o Allah eragam a’ge Musa en o mo yegelogo orlu ago hegit honowi edip wokhentesimu yema manup o,” oluk mo’gulentesi.

¹⁶ Asogo mo’gulentesimu is aphwami ena’gul onuk Ruben a’ge emin, Gad a’ge emin, ena’gul onuk Manasye a’ge pema emin, ebano en e, disogo mo’guligisa, “Hat en e, Disogo tip, oluk mo’gulnentagun holuk e, nis en tulat o. Ye, Ebela ebane lit, oluk mo’gulnentagun holuk e, lulat o.

¹⁷ Nis Musa en mo’gulnentasu a’ge modok hwelak poluk togu lege ai ’gela’ge, hat hiak hwelak poluk togu lomulat o. Nenaik ’gain Onuk Logo a’ge en Musa tenharok modok welaga ai ’gela’ge, hat tenhiarok modok welemak o.

¹⁸ Aphwami logon hat en sennentarok oruakma heragam ’gonu oluk, hiak hwelak poluk tu enebit a’ge holuk enebe lo’bok modogat warenebise lema o. Holuk e, hat en, hede ha’buktak poluk hogorlok erlaksogoat wolomup o,” oluk mo’guligisa.