Yesaya 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Aphwami o Yerusalem a’ge emin, Yehuda a’ge logon emin, enebaget mo’gulentasu laga wene

¹ Wene yu ebe re, aphwami Yehuda a’ge onuelak naduk Uzia, e’berlik Yotam, e’berlik Ahas, e’berlik e, ebe pobuk Hizkia, enebe ’gain a’ge nak welat senentarok welegesa eria pam, Allah en aphwami Yerusalem a’ge emin, Yehuda a’ge logon emin, enemin en tu a’ge, ap Amos omlogo an nonuk Yesaya en mo’gulontouwagoluk nabi ’gela’ge pam mo’gulnese laga o.

Allah en eiyagai ene’gerli wusogo wene yagentesi wene

² His ’gwiang emin, ’bogorl emin, Nenaik ’gain Onuk Logo a’ge iak ua a’ge ai, henesa’go opsogo hwelip o. At en e, “An neiyagai nu’gwarek en yo’gul enebiselat, mo’gulentasulat, tagenebegi a’ge neragam wolom enebit en uknoboluk libegesa ai o.

³ Wam sapi aik eiye a’ge ebe elaluk welat, Ye, wam keledai aik en oso’boru pasumu alugat welat, asogo tago a’geat de, is An neiyagai Israel a’ge asogo tu eneperlak welat, pobitu miayat o,” oluk egei o.

⁴ Eige! His hene’balak enebabut wiak a’ge en dogo’gwe a’geatma henebabut modok wiak, wiak nak togulat, wene e’gin a’ge henebam oruak o. Modok wiagat egeptik welegep o. His en e, Nenaik ’gain Onuk Logo a’ge Israel Enaik Allah u’gwarek ebe ’gektak welago a’ge erliktogulom a’geat de, At ebe nenebit, oluk ukpoluk hono’borl wogeigeptik welegep ai, wiagaphonobua o.

⁵ His en e, “Allah ebe nenebit,” oluk ogwi modok wolorogup ai nopaget? His henebabut wiak togu legep ai en, Allah en wene henebam pasu ai honogola mia en pobuk wene e’gin a’ge henebam pou wagoluk togu legep a? Hena’gul petne ’berlegat yebil wiak a’ge agalat, henede obotut otluk wiak a’ge we’gerlogulat, tuagoluk egeimu welegep ai o.

⁶ Hena’gul hwerli en honoyuk hwerli henebetne op a’ge mesik wolorogup erlak, we, wiak nak henebetne da perik ya perik a’ge emin, heniebil emin, ’gerat wathwerlegep a’ge emin, a’bik welarat de, erlak emagoluk emerogulat, a’bosu wusogo e’gela pam het togulat, tu erlakma en welegep ai o.

⁷ Honowi da ya erlagap pasulat, honowi kota o. Wi perlengsogo modok nasulat, tegei o. His henilem ap ’bok a’ge en hono’gwiang at de, sebelogulat, di a’ge yu a’ge ’berlegat wiagap pogulat, tigisa o.

⁸ Asogo erlagap pogulat, his aphwami o Yerusalem a’ge, Sion agalogo ’gela’ge welat, honomu nak ukhenebegesema welegep a’geat de, o tabo anggur yabukmu de a? ’Gorluk yabukmu de a, lodu paget worogumu welago ai ’gela’ge welegep o.

⁹ Nenaik ’gain Onuk Logo di a’ge yu a’ge tu nak a’ge ano en ap nis a’ge logon delenebelip erlak wellepma re, nis nenebe aphwami o Sodom, Gomora a’ge Allah en modok erlagap enebesi ai ’gela’ge erlagap nenebelip o.

¹⁰ His aphwami Yerusalem a’ge honuelak enemin o Sodom Gomora a’ge enebabut wegep a’ge yu logwe. Nenaik ’gain Onuk Logo a’ge Allah en mo’gulhentasu a’ge ai, henesa’go opsogo hologulat, wene mo’gulhentasu a’ge ai, henesa’go dokhumsogoat hologo welat, togu lomup o.

¹¹ At Nenaik ’gain Onuk Logo a’ge en e, disogo egei, “His en wam, di a’ge yu a’ge a’bigat watnogu legep ai nopaget. His en wam di a’ge yu a’ge wusogo narlnogu legep ai emin, sapi emalik esei nobogu legep a’ge ai emin, sapi ierak a’ge emin, domba emin, kambing emin, emep nobogu legep ai emin, An nebit modok agama welegi o.

¹² His en An nebaget tuogoluk wotluk, An nu’gwarek nowi werikmu eba honoyuk hesabele a’ge yogunat lak-wak ogu legep ai, sa en mo’gulhentesimu togu legep.

^13-14 His en di a’ge yu a’ge An nobouwogoluk woluk waga legep ai, we ’burlat almasogo woluk waga legep o. An en e’ben sangholuk eme tu ’gela’ge taknebasu o. His henebe dugwi ’get a’ge pelelisoam odoktogulat, agauwa sabit a’ge pam An nebaget weat wolomogoluk odoktogulat, toluk e, his en, Allah paget agauwa ai pam odoktuok o, oluk odoktogulat, togu legep ai, ’berlegat napseri werak honoboluk pobuk togukhwe nil yethentasulom nebit o. Wiak togulat asogo togu legep ai, wiagat ago yo. Sum a’ge e’gin a’ge woluk lagalat enebit ago ’gela’ge, his asogo togu legep ai nebam modok e’gin agama nebit aga o.

¹⁵ His se’ban uogoluk hene’gik lagabak pogwiam, nil yethentasulom nebit o. His en aphwami enebe a’bigat waronobogu legep a’ge enemep hene’gik pam oruak ai en e, his en se’ban a’bigat ogu legep a’geat de, heniak nesa’go holu nebit en ukpaik o.

¹⁶ Wiak a’ge henebam egelik ai, opsogo emerip o. His henebabut An nilem wiak togu legep a’ge ai ukpoluk, pobuk wiak togu lorogup no yo.

¹⁷ Henebabut hegitsogo togulom a’ge mo’gulip o. Mo’guloguptik e, hegitsogo togulom a’ge henannisogo logo pogu lomup o. At Allah en egei a’ge ai opsogo hwologo tugu lomup o. Is nin aphwami logon en wiagap onobogwi a’ge lerontogulat, is malik se’bin a’ge onowene ’beli’gogo hegitsogo hwalontogulat, hwami sugwe a’ge ai enakhit otluk erlele wogonobogulat, togu lomup o,” oluk egei.

¹⁸ Asogo egeitik, Nenaik ’gain Onuk Logo a’ge en wene mesik disogo egei, “His wiak togu legep a’ge ai, enemep ene’gik pam welago ’gela’ge ai wene henebam modok oruak a’geat de, an en ’gut op modogat hosogo ukpaik o. Ye, wiak logat togulat, e’gin a’ge togulat, togu legep a’geat de, an en erlagapsogo modok ukpaigat o. Holuk e, wene henebam a’ge ai hwaluogoluk e, ne’bek manis o.

¹⁹ His en niak hologo togu lorogup holuk, ’gwiang an en wokhentegismu yema welat, di a’ge yu a’ge yogo poluk opsogo no’gu lorogup ani o.”

²⁰ Asogo a’geat de, his en e, “At ebe nenebit, oluk niak sagalogo togu lorogup holuk, henebe weim obogulat wathonobua, oluk An Henaik ’gain Nonuk Logo a’ge en arat mo’gulhentegis ai o,” oluk egei.

Allah en aphwami Yerusalem a’ge wene enebam pesi wene

²¹ His aphwami o kota Yerusalem welegep a’ge yu logwe. His henebabut naduk e, henebe Allah emin hwedik welat op togulat, hegitsogo togulat, togu legep a’geat de, yogodak e, henebabut hwami danian nil denagai a’ge enebabut ’gela’ge agalat, apware a’ge nak agalat, togu legep ai o.

²² His aphwami Yerusalem a’ge naduk e, henebe perak op a’ge ’gela’ge welegep a’geat de, yogodak di a’ge yu a’ge degelogulat wiak a’ge ukpogwi a’ge ’gela’ge egeptik welegep o. Ye, naduk henebe anggur e’gen a’bosu op a’ge ’gela’ge welegep a’geat de, yogodak ik we a’ge emin mesikmu ye’gelogo pogwi ai ’gela’ge egeptik welegep o.

²³ His honuelak ’gaindek eba, Allah eragam wolom enebit en e, aphwami logon yogot wogwi a’ge enemin mangno oluk e, wiak togwi ai o. Asogo togulat, di a’ge yu a’ge weat wogontogwiam horlogulom enagai welat, is logon wene hwal ontogwiam, is en o’go wogontouwagoluk mugonoboluk-onoboluk hwerlai lagalat togwi ai o. Asogo horlogulat, malik se’bin a’ge ap wene edip ’belo’gogumu en wene enebam pogwiam is enakhit om erlakma en ugonobogulat, is logon en hwami sugwe a’ge wene enebam pogwiam hwalonto erlakma en ugonobogulat, togwi ai o.

²⁴ Is asogo togwi ai en, nis aphwami Israel a’ge Nenaik ’gain Onuk Logo a’ge Allah di a’ge yu a’ge tu nak a’ge ano en is disogo mo’gulentesi, “His en An nemin wiak welat, il ’bal nobogu legep ai en, nolot het emagoluk henebabut wiak togukhwe pobuk nede wathwerlasu leik no oluk, henebam e’gen pasu legi a’ge o’go wiagap henebik o.

²⁵ Aphwami en perak wiak a’ge emin oruakma odouk pam werakho degelogwi ’gela’ge, his di wiak yu wiak togu legep a’ge, An en wokholuk obaphenebik o.

²⁶ Pageat his honuelak wene enebam hegitsogo pogulat, no’gorlogulat, enesa’go opsogo worogulat, togu legesa ai ’gela’ge, pobuk enebabut ai a’geat edigonoboluk woghontouwa ani o. Asogo edigonobogulat woghontoma, his o kota Yerusalem a’ge at ’gain Onuk Logo a’ge emin lo’boksogo welat, hegitsogo tugulat Allah iak hwologo nak togwi, oluk ogu lema ani o,” oluk egei o.

²⁷ At Nenaik ’gain Onuk Logo a’ge hegitsogo tiso a’ge ano en his aphwami o Yerusalem welegep a’ge en e, Nis wiak tige, oluk enebabut heberlua a’ge holuk nak enebe delenebik ani o.

²⁸ Asogo a’geat de, is aphwami logon wiak togwi a’ge at Allah eragam wolom enebit a’ge ai, enebe wiagap onobogulat, is logon Allah ebe ukpoluk libegesa a’ge enebe modok erlagap enebiselat, tua o.

²⁹ His en, e a’ge erliktogulat, dogwi asua paget yabuk asuama, oluk ogulat, ogu legep ai paget pobuk hene’gerli ema o.

³⁰ His pobuk henebe e lok e’gela sawet a’ge ’gela’ge agalat, yabuk a’go’gwe ’gwelebak erlakhwe ik a’bosu erlak welago ’gela’ge agalat, tua o.

³¹ Is logon enanni a’bik welegesa a’geat de, enebe e’gela ’buk a’ge odouk en mesik erlige nasumu nekhi tu mia ago ai ’gela’ge, Allah en is enebe almaronobua ani o.